یانە هەورامانی بشناسدیٛ هەورامان چ وەختێ وەشەن؟

هەورامان چ وەختێ وەشەن؟

157

ئۆستوار تەوفێق مرادزاد٘ە هانەگەرمڵەیی 

چە وەختێ وەشا؟

شەوەی وەڵینە وەشتێ وارا بۆ
زەمینی تەژنەش، ئاوی دارا بۆ
خەلە هەورێشێ کەرۆ، نیمەش وته بۆ
وارانی ڕوەو ولاش شتێ بۆ
پلوورەوارانێ دابۆش سەرکەشا
تەماشە کەرد٘ەیش ئا وەختە وەشا

لالۆ حەمەلاو مرادی هانەگەرمڵەیی 

ساحبێ زوو هورزی نمات کەرد٘ێ بۆ
نامێ خود٘ای و خاسات بەرد٘ێ بۆ
زیابیرە بەر، گەلە نەزیا بۆ
چایخانەو بانوو حەوزی نریا بۆ
بلیۆ پەی یانەی ماس خاس گریا بۆ
وەر نەکەوتە بۆ، چای نەوریا بۆ
وەرەتاو گنۆ بەرزوو ئا کەشا
تەماشە کەرد٘ەی ئا وەختە وەشا

مۆمن یەزدانبەخش پاوەیی 

چە وەختێ وەشەن؟

سەحەر هۆربێزی جاڕێ دریا بۆ
دژمەن جە خاکم گرد٘ بەرکریا بۆ

سپاش تار و مار کز و مێڕیا بۆ
پاش نە یانەمان کۆتا و بڕیا بۆ

دامنەو گجی ئابڕوویش دڕیا بۆ
تەپڵوو بەدٚنامیش چاوش زڕیا بۆ

ئاڵاو سەربەرزی جا هۆردریا بۆ
بنچینەو شادٚی جە نۆ نریا بۆ

وەڵاتم یەکجار ئازادٚ کریا بۆ
قەومی بەش وریا بەشش دریا بۆ

دەنگوو مووسیقای بەیۆ جە شاران
ئا وەختە وەشەن سەیروو کۆساران

شەهریار تەوفێقی نەوسوود٘ی 

چە وەختێ وەشا؟

زمسان لوا بۆ کۆچش کەرد٘ە بۆ
ئامای وەهاری خەمش بەرد٘ە بۆ

هەورێ گرمنا و ئەرخەوان سوور بۆ
جا لادێنە بی و شار چنەت دوور بۆ

ساحبێ زوو بد٘یەی پەی گۆشەو دەرەی
بزڵێ ماشیە با ئەو چرۆو نەرەی

چۆڕەو پلوورەو سەروو بانی بێ
تەقەو ساجی و پنێ، بووەو نانی بێ

هارگا ئەیرش گڕۆ، سکەڵی گەشش
کتریە سەرشۆ، جا گیزەی وەشش

فەرامۆش کەری ویەرد٘ەو ساڵا
وەزیەرە دلێ باخچەو گۆراڵا

شەونم نیشتە بۆ ئەو پەڕەو گوڵا
گۆش دەی بە دەنگوو وەشوو بوڵبوڵا

پلوورەوارانێ دابۆش سەرکەشا
تەماشا کەرد٘ەیش ئا وەختە وەشا

تالب ئەداک ژیواری 

چە وەختێ وەشا؟

ساحبێ زوو هورزی زەڕ دەق دریا بۆ
بە باقە باقە پاڵت نریا بۆ
حەوت هەشت ملیاردێش چەنە ژماریا بۆ
پەیت مەعلووم نەبۆ چکۆ ئاما بۆ
جە لاو خود٘ایوە خەڵات کریا بۆ
نەوزیش کیسەت، نەکا دڕیا بۆ
بنیەیش ساکێوە شش قوڵف کریا بۆ
خەم و پەژارە چەنەت بڕیا بۆ
دۆلاریچ بە توون با هەر مەڕیا بۆ
ڕیش و سمێڵت با تێخ دریا بۆ
ئێتر کەواکەت بەش نەدڕیا بۆ
شەهریەو دانشگایت بێ خەم دریا بۆ
قەرزی دماینت پەڕۆ کریا بۆ
شەوەی وەڵینەش زەڕێ وارا بۆ
کیسەی تەژنەو تۆش ئاوی دارا بۆ
بە دڵی بێ خەم بلوو پەی بازاری
ئا فەسڵە پەی من بۆ بە ئازاد٘ی
پلوورەوارانێ دابۆش ئا کەشا
تەماشا کەرد٘ەیش ئا وەختە وەشا

قەیۆم دانشوەر نەرویەیی 

چە وەختێ وەشا؟

‍ ساحبێ زوو هۆرزی چای دەم کریا بۆ
هەنگوین و کەرە ڕەدیف دریا بۆ

پایز بۆ و تازە پەڵەکەش دابۆ
بزیەی دەلاقە ڕۆجیار زیا بۆ

هیتیار پەی هیتێ، تازە لوا بۆ
هێڵەش بڕیێ بۆ، تۆمەکەش شا بۆ

بلچی زەردٚێ با و تۆمە تەقا بۆ
تەمێوێ تازێ بیناش نیا بۆ

دار بە هەزار ڕەنگ، وێش نمانا بۆ
سوەیل ئەو مێوا سورمەش شانا بۆ

هەناسەو دەرا دابۆش سەرکەشا
تەماشەکەردەیش ئاوەختە وەشا

گلێرکەرد٘ەی: سوبحان ئەمینی

ئی شیٛعریٛ بە دەنگو کاک نەجیب حەسەنی بژنەودیٛ

 

 hewraman
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

خاتو کیانا عەبدڵاهی فەڕ مەدالیای ئاڵتونیش هوٙرگیٛرت

خاتو کیانا عەبدڵاهی فەڕ مەدالیای ئاڵتونیش هوٙرگیٛرت خاتو کیانا عەبدڵای فەڕ، کناچیٛ هەورامی…