ئەحمەق

55

ئەحمەق

نویـسەر: ئانتوان چێخۆف
هوٙرگیٛڵنای جە ئێنگلیسیوە: فەرشید ڕوستەمی

چن ڕوێ چێوەڵتەر یولیا واسیلیۆنا، خانمێوە کە مامۆساو زاوڵەکامنە و یانەنە هۆشش ئینا پۆشاوە چڕیەم پەی ئۆتاقوو کارەکەیم. قەرار پاسە بێ حەسێب و کتێبش کەروو چەنە.
واتم: فەرماوە نیشەرە یولیا واسیلیۆنا! با حەسێب و کتێبەکەیما دیاری کەرمێ. دڵنیانا تۆ بڕێ پووڵت گەرەکا. ڕەنگا ئامابۆ وەرۆ پووڵت ئەحتیاج بیەبۆ وەلێ هیچوەخت داوات نەکەردەنا چەنە. خواینە واچووت… ئێمە نیامارە کە حەقە زەحمەتوو یەک مانگیت سی ڕووبڵێ (پووڵوو ڕووسیەی) بۆ. پاسەن؟
ــ نا. چل ڕووبڵێ.
ــ نا! سی ڕووبڵێ. من دەفتەرەکەمنە ئینەم نویستەن. من هەمیشەی بە ماماو زاوڵەکام مانگێنە سی ڕووبڵێم دان.
ئیسەیچ… ئێـــــێ… خواینە واچووت… تۆ دوێ مانگێ کارت کەردەن پەی ئێمە.
ــ دوێ مانگێ و پەنج ڕوێ
ــ نا. ڕیک دوێ مانگێ. من دەفتەرەکەمنە ئینەم نویستەن. ئیسە من مشۆ شەس ڕووبڵێ دەو بە تۆ. جا نۆ دانە یەکشەمەیێ کەسر کەرە جە دوە مانگەکەی. چوونکای تۆ ڕوەکاو یەکشەمەینە کۆلیات وەی نەکەردێنە. ئاستێنەت جیا. زیێنیرە و لوێنی پیاسە کەردەی. شۆنوو ئانەیرە… یەرێ ڕوێ تەحتێڵیچ کەم کەرە جە شەس ڕوەکەی…
یولیا واسیلیۆنا ڕەنگەش پڕا و پەشۆکیا. بە دەس وێش خجڵنا گجیەکەیشەو. وەلێ ئەلفش نەترەکنا!
ـــ ئەرێ ئیتر… یەرێ ڕوێ تەحتێڵ بێ. ئیسە دوانزە ڕووبڵێ کەم کەرمێ جە مەعاشەکەیت. چوار ڕوێچ کۆلیا نەوەشە بێ. چا ماوەنە جایت نەبیەبێ لاشەو و لوێ بێنی پەی لاو وانیای. چوار ڕوێچ دد٘ان ئێشەت بێ و ژەنەکێم ئیجازە دای پەنە نیمە ڕۆ لاو زاوڵەکاوە بی و شۆنەو نان و چای نێمەڕۆیرە بەی سەروو کاری.
ئیسە… دوانزە و حەوت کەرۆ نۆزە. جا ئەر نۆزە کەم کەرمێ جە شەسەکەی مەنۆوە چل و یەک ڕووبڵێ. پاسەن؟
یولیا واسیلیۆنا چەموو چەپیش سوور بیوە. چەناکێش لەرازی لەرزێنیٛ. بە تووڕەییوە قۆزا و مشێوەش کەرد و واوەی لام تا کام ئەلفش نەترەکنا!
ــ شۆنوو ئانەیرە… سەروو ساڵەی تازێ پیاڵێوە و دەوریێت ماڕا.
دوێ ڕووبڵێ کەم کەرە! ئەڵبەت پیاڵەکە فرەتەر چانەی ئێژێ. بە میرات یاوابێ دەسوو ئێمە. وەلێ تازە واچی چێش؟! وێم کەردەن بە وێم هەڵای هەر کەما! ئینەیچم هۆش نەشۆ… ڕوێشەو بۆنەو ئانەیوە جایت نەبێ لاو کۆلیایوە وەستێبێ درەخت و کۆتەکەش دڕیابێ. ئینە چێگەیچ دە ڕووبڵێ…! واوەی ڕوێ تەریچ، هەر بۆنەو بێ سامانی تۆوە نۆکەرە وەڵینەکەما بەرشی و چەکمەکێ وانیایش دزیێ. مشۆ فرەتەر چەمێ کەریوە! بۆنەی ئی جۆرە چیواوە پووڵێوەت مدا، ئادیچ ئەگەر بدا! تازە واچی چێش… چاگەوە پەنج ڕووبڵێ تەر کەم کەرە! دەو ژانوویەیچنە دە ڕووبڵێم دێبێنی پەنە…
یولیا واسیلیۆنای وات: نا. من تا ئیسە هیچ پووڵێوەم نەگێرتەن جە شمە.
ــ وەلێ خۆ من نویستەنم دەفتەرەکەمنە!
ــ دەی خاسا… ڕەنگا پاسە بۆ…
جە چل و یەکەکەی ویس و حەوت ڕووبڵێ ئەگەر کەسر کەرمێ، مەنۆشەو چواردە ڕووبڵێ.
چەمەکێو یولیا واسیلیۆنای پەڕێ بیێ هەرسی. هەرسەکێش ئامێ ملوو ڕوێشرە و لووتە وەشڵالەکێش بیە چێروو هەرساوە… زایفێ!
بە دەنگێ کزەو واتش: من تەنیا یەکجار پووڵم گێرتەن. ئادیچ یەرێ ڕووبڵێ، جە ژەنەکێتا. تەنیا ئی جارە…
ــ زانی چەینا؟ ئێـــممم… من ئینەم نەنویستەن دەفتەرەکەمنە. ئیسە یەرێ جە چواردەی کەم کەرمێ کەرۆ یانزە ڕووبڵێ. ئینەیچ یانزە ڕووبڵەکەت گیان! ئینە یەرێ و یەرێ و یەرێ… ئینە یوەو ودوێ… ها گیان! گێرەش…
یانزە ڕووبڵێم دا پەنە. بە گولکەکاش کە لەرزای لەرزێنێ پووڵەکەش گێرت. نیاشنە کیسەش و چێروو لچانە واتش: مێرسی.
پڕانیوە پەیێ. بە تووڕەیێوە کە گردوو گیانیم هاوارش کەرێ دەسم کەرد ئامای و لوای کەردەی ئۆتاقەکێنە.
پەرسام چەنە: چی واتت مێرسی؟!
ــ بۆنەو پووڵەکەیوە دەی.
خۆ من خەڵەتنایم! کڵاوەم نیا سەرەت. ئاشکرای عاڵەم دزیم کەرد چەنەت. شۆنەو ئینیشا گردیرە هەر ئێننە تاوی واچی؟ مێرسی؟!
ــ من یاگەکای تەر کە کارم کەردەن یەک فلس پووڵشا نەدێنا!
ــ یەک فلسشا نەدێنی؟؟ دەیـــی… فرەیچ عەجیب نیا خۆ! تا ئیسە فێڵەم کەردی چەنە. فێڵێوە بێ مانا. من گردوو حەقە زەحمەتەکەیت کە هەشتا ڕووبڵێن مدەوت پەنە. گردش ئینا دلێو ئا پاکەتینە کە ئینا وەروو چەماتەو. وەلێ حەیفوو بەشەری نیا کە ئاننە ئەحمەق و بێ عورزە بۆ؟ چی هیچتا نەوات؟ نە ئێعتێرازێ و نە هیـــچ! چی هیچ دەنگێو ناما چۆتاوە؟! چی دنیانە مەگەر کریۆ ئنسانێو بێ دەمار بۆ؟ قسە نەزان بۆ؟ یانی کریۆ ئێننە بێ عورزە و بێ دەم و پل بۆ؟!
خوێوە تاڵم وینا چڕووچەمشنە. ڕوخسارشنە ئی جوابمە ئیٛستەو: ئەرێ… کریۆ… فرەیچ ڕاحەتا!
بۆنەو ئانەیوە ئی دەرسە تاڵەمە دا پەنە عادز بیا. داواو عەفوێم چەنە کەردە. هەشتا ڕووبڵەکەم دا پەنە، بە شەرمەو گێرتش، واوەی واتش مێرسی و زیارە! دیانی شۆنیشره و دڵوو وێمنە فکرێم کەردێوە: چی دنیانە قوەت بیەی و زۆر واتەی چن ئاسان و ڕەحەتا…

 hewraman
  • خێزنای شیٛعریٛ و ئایرەکاش

    خێزنای شیٛعریٛ و ئایرەکاش عادل محەمەد پور زەنجیرە باسێوە تێئۆریکیێ شێعرێ سەردەمیانێ * بەشو…
  • فەتە دیپلوٙمش گیٛرتەن

    مامۆژەن«عەینا»ومامۆ«عەبە» وەشیێ وەختا با ئاندٚەتەر. جەوەشیێنە پاشا ئەرە زەمین مەگنۆ. «فەتە…
  • هەڵقە دوکەڵێو!

    هەڵقە دوکەڵێو؛ ڕوٙمانێوە کوڵە بە قەڵەمو بەختیار لهونی، وەڵاو گەو هەورامانینە بواندیٛوە، حە…
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟ بەپاو هەواڵو تیمو تاوتوکارێ”ئەنستیتو پەی…