سەرعی

37

سەرعی

ملمیٛ خزمەتو شاعیٛریوی تەرو گوم نامو هەورامانی، چند هیٛڵێو سەرو ژیواش وزمیٛ وەرەچەماو ئەدەب دۆساو هەورامانی .

مەڵڵا لوتفوڵا شیٛخەلئیسلامی سنەیی، کەسایەتیێ نامی سەردەمو ویٛش بیەن، ویارەو شیٛعریٛو ئەدەبیاتینە دەسێ باڵاش بیەن، وەلیٛ داخەکیٛم تا ئاروٙ شیٛعرەکیٛشجەم و چاپ و وەڵا نەکریێنیٛوە، هەر بە دەسنویس مەنیٛنیٛوە.

ماموٙسا بابامەردوٙخ کتیٛبو “تاریخ مشاهیر کرد ” ینە بەرگی دووەمەنە لاپەڕەو 57 ی باسو مەڵڵا لوتفوڵا شیٛخەلئیسلامی کەروٙ ماچوٙ ساڵەکاو “1252 تا 1315  کوٙچی “ژیوان (1836 هەتا 1897 زاینی ) و چنڎ پارچە شیٛعریٛش بە زوانی فارسی بە نامیٛشەو وەڵاکەردیٛنیٛوە، وەلێ نامیٛ سەرعی نماروٙ.

حەکیمو مەلا ساڵحی کتیٛبو شیٛعرە چاپ نەکریایەکا مەولەوینە لاپەڕە 31  باسێوە زەریفو سەرعی مکەروٙ، هەرپاسە ئانارە بە وتارێوە کاک خالد مەنسوری کەرۆ کە گوٙڤارو سروەی ژمارە 121 نە  وەڵاو کریانەو، کاک حەکیم پەیجوٙری و وشکنای زانستیانە سەرو ئی شاعیرەیە کەروٙ زەریف ڕوٙشنش کەروٙوە، ئانارە بە دەسنویسێ لاو ویٛش کەرۆ هەکە یاگێنە نویسیان ( من کلام ملا لطف اللە متخلص بصرعی ) ،ئینەیچ پەنەما ماچوٙ کە مەڵڵا لوتفوڵا شیٛخەلئیسلامی “سەرعی ” ن .

کاک حمەڕەشید ئەمینی ئانارە کەرۆ لاو ویٛشۆ پارچە شیٛعرێ دەس نویسە هەنە بە نامیٛ مەڵڵا لوتفوڵای و پاینو شیٛعرەکیٛوە نازنامو  سەرعی نویسیان، وەرو ئانەی نویسەر یاوان پا قەناعەتیە هەکە سەرعی مەڵڵا لوتفوڵان .

ماموٙسا سەرعی هامچەرخو ماموٙسا مەولەوی بیەن، چەنی ئانەیچ شیٛعرەکاشەنە فرە پەیڕەو مەولەویش کەردەن، فرەو شیٛعرەکاشەنە ئی ڕەنگدایەو بە ئاشکرا بەرگنۆ، تاخایەتیٛ فرەو جارا شیٛعری سەرعی بە نامیٛ مەولەویوە، هەرپاسە هنیٛ مەولەوی بە نامیٛ سەرعیوە چاپیٛ کریێنیٛ، پەی نمونەی، دیوانو مەولەوی چاپو گوٙرانینە پارچە شیٛعرەو ” قوربان چەم چەمش وەتوٙ نەکەفتەن” بەنامیٛ مەولەویوە چاپ کریێنە، وەختارێنە تەنیا یەریٛ دیٛڕیٛ کوٙتایش هنیٛ مەولەوینیٛ و جە پارچە شیٛعرەو “ئازیز تەن وەنیٛش ” ینە ئامینە .

ئەر سەرنجە دەیمی پارچە شیٛعرەکا ” های چیٛشەن یاران ” و “ڕاحەتی دڵەی پڕ زوخاوەکەم ”  ڕەنگدایەو مەولەویشا پۆوە دیارا، تەنانەت چند دیٛڕێوە  پارچە شیٛعرەو “های چیٛشەن یاران ” هنیٛ مەولەوینی، کە جە دیوانەکەو ماموٙسا مەڵا عەبدولکەریمی مدەڕیٛسینە ئامێنیٛ  پارچە شیٛعرەو “ئازیزم ئایر” ینە، ئتر دیار نیا ئایا مامۆسا سەرعی کەلکش جەشیٛعرەکاو مەولەوی هوٙرگرتەن یام نویسەرا و دمایی تیٛکەڵیٛشا کەردیٛنیٛ، بەهەرحاڵ هەرچی بوٙنە ئی هەرمانیٛ مسپاریوٙ بە پەیجوٙرکاراو وشکنەرا .

دماجار نویسەر زیاد جە پانزە لاپەڕا شیٛعریٛ مامۆسا سەرعیش وەڵا کەردینیوە، کەشکوٙڵو شاعیرا هەورامانینە، پارچە هوٙنیێوەش وەڵا کەرمێوە پەی وانیارە وەشەسیاکاما .

خەدەنگ چەنی قەوس پەڕچین پەیکان    مەگیٛران وە دەس نەهەر گوٙشەی بان

گا تیر ئەندازی موژەی سیاشان    گا نیگای دیڎەی وە ناز دیاشان

گا لەنجەولارەی باڵای بەرزشان     گا لەرەی لیموٙی بەیان تەرزشان

گا شنوٙی شنیای کاڵای ئاڵاشان        گا لەرزەی نەمام بەرز باڵاشان

گا غەزال ئاسا جوق جوق و ڕەم ڕەم     گا وەناز مەڎیان وەنیم نیگای چەم

گا جیلوەی ڕەفتار ژەرەژ خەرامان      گا نەگوٙشەی بان گاهێ نە دامان

گا گا وە کاغەز گاهێ وە پەیغام        گاهێ وە سەرنج گاهێ وە ئەیهام

گا وەعدەی بوسەی لەبانی شیرین      گا گیر تاتای زوڵف عەنبەرین

گا لافو گەزاف جە یار نوٙ بەردەن      گا سەوقات خاس دوٙس وەیاڎ کەردەن

گا دەس وە مەسحەف سەد سەوگەند وەردەن     پەیمان یەکێوەن تا وەڕوٙی مەردەن

 

شاعر: سەرعی

 

نویستەی: حمەڕەشید ئەمینی….کەشکۆڵی شاعیرانی هەورامان

هوٙرگیٛڵنای: د.ناجح گوڵپی     8/10/2017

 hewraman
Load More In ویەردە و هەورامانی

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟ بەپاو هەواڵو تیمو تاوتوکارێ”ئەنستیتو پەی…