یانە پەیلوای دیاری (جەژنەو ھەناری)

دیاری (جەژنەو ھەناری)

58

دیاری (جەژنەو ھەناری)

ئاکۊ_مارانی
٢٥و نۆڤەمبەرو ٢٠١٨

ڕەنگا پەی ئی سەردەمەیە (جەژنەو ڕۊگناری) جەژنېۋە تازۍ بۊ، بەڵام ئەر سەرنجو کولتوورو ناوچەو ھۆرامانی بڎەیمۍ، گلېرۆکەرڎەی بەرو ھەر درەختېۋی پەی وېش جەژنېۋە بیېنە، چونکە جارا گرڎ ھەرمانېۋە و گلېرۆکەرڎەی بەرو درەختا و باخەکا بە ھەرەوەزیی بېیەن و ھەرەوەزیچ پەی وېش جەژنەنە، چونکە خەڵکی وەشی و ناوەشی وېش چنی ھامسای و ھامدەگایی و ھەم-جۊرەکا وېش بە ھەرەوەزیی بەشکەرڎەن و دلۍ ئاڎیچییەنە، ئەر بەرھەم فرە بېیەبۊ، چە بەرھەمەکەی بەشو خەڵکی دریان و ئەر کەسېۋ بەرھەمش کەم بېیەبۊ یان دەرامەتش نەبېیەبۊ، کەسا تەری بەشدان و ھەرگیز خەڵکو دەگێ ناستەن، کە کەسېۋ ئاورا و بېبەش بېیەبۊ.

ئانە کە چېگەنە و ئی ڕۊ و پەی ئی ساڵی گەرەکما پېسەو دیاریېۋی بە شمەی ئازیزش پېشکەشکەروو، نە ھەناریەنۍ و نە ڕۊگنار، نە گەرەکما چە بارەو (جەژنەو ھەناری) بنۋیسوو، بەڵکو چېگەنە گەرەکما چە بارەو چنی درۊسکەرڎەی ڕۊگناری ۋیرلېۋە بە شمەی ئازیزی پېشکەشکەروو.

چە باری ئاساییەنە، ڕۆگنارکەرڎەی یان درۊسکەرڎەی ڕۊگناری بە گرینای ئاۋەو ھەناری و پەنەوازیی ئێریېۋی فرەی و کاتېۋی فرەی پەی گرینای ڕۆگنارەکەی ھەن.

ھەرچنە ئامانج چە گرینای و فرە گرینای ڕۊگناری بېجگە چە ھەسۆکەرڎەی ڕۊگنارەکەی، ئامانج ھۊرگېرتەی بېیەن، کە ئەوسا پېسەو ئیسەی یەخچاڵی ئەلەکتریکی نەبېیەن و نەتاۋیان چېۋەکۍ پەی کاتېۋی فرەی ھۆڕگیریا و نەخرابیا. بەڵام چە ئیسەنە گرڎ کەس یەخچاڵی ئەلەکتریکیش ھەن و ئا گرفتە نەمەنەن، بە پېچەۋانەوە ئیسە گرفتو سۊتەمەنی ھەن.

یۊ چە ئا ڕا تازا کە پەی ڕۆگنارگېرتەی یان درۊسکەرڎەی کریۊ بەکاربریۊ، ھەسۆکەرڎەی ئاۋەو ھەنارانە ۋەرو دەمو پانکەینە (ئامرازو فینککەرڎەی یانەی)، کە ھەم ڕۊگنارەکە نمەسۊچۊ و ھەم ھەرمانېۋە فرېش گەرەکە نیەنە، تاکو کەسېۋ یان چن کەسېۋ بەردەۋام قازانەو ڕۆگنارەکەی تېکەدا و نازا بنەگېرۊ.

دماو ئەۋەشتەی ھەنارەکا و تەکنای دڼگەکاشا و شېڵای دڼە ھەنارەکا و گېرتەی ئاۋەو دڼەکا، ئاۋەو ھەنارەکا کەرمېنە سینی و سینییەکا ۋەرو دەمو پانکەینە (یان چېرو سپلیتییەنە) منیەیمېرە، تاکو وردە وردە ڕۊگنارەکە ھەسبۊۋە و بۊ بە ئا ڕۊگنارە کە وېما گەرەکمانە و بە دڵمانە.

چېۋېۋ کە مشیۊ ئېمە ۋەرو چەماش گېرمۍ، ئانەن، کە ھەرگیز ڕۊگنار دلۍ سینی فافۊنی یان نایلۆنی و پلاستېکییەنە ھەسنەکەرمېۋە و ھۊرنەگېرمۍ، چونکە تشیی ئاۋە ھەنارەکەی چنی ئا مادا تیکەڵیی کیمیایی درۊسکەرۊ و پەی تەندرۊسی زیانبەخشا.

ۋەرو ئانەی خاستەرا کە دلۍ سینی شیشەینی یان سینی ستیل’یەنە ئاۋەو ھەنارەکەی ھەسەکەرمېۋە و ھەر پاسەیچ پەی ھۊرگیرتەی و بەخشای و ۋرەتەیچ، ھەر مشیۊ دلۍ بتڵی شیشەینی کریۊ، تاکو ھیچ زیانېۋ بە تەندرۊسی وېما و کەسانېۋی کە چە ئېمەش مسانا، نەیاۋۊ.

سەرنج: یۊ چە تایبەتمەڼییەکا ئاۋەو ھەناری یان رۊگناری ئانەن، کە ۋەرو تشیش نمەخرابیۊ و وېش چە وېش پارېزگاریکەرۊ. بەڵام بە مەرجېۋ کە تاکو ڕادەو تەمام ھەسۆبېیەی، ئاۋەکېش کەمشکەردەبۊ.

ئومېڎوازەنا دیارییەکەو من بە باخەۋانەکا ھۆرامانی کۊمەککەرۊ و ھەر پاسە تاۋابۊم دیاریېۋی پاییزانە بە بە گرڎ کەسېۋی کە حەزش چە ڕۊگناری و چاشتی و سالاتو ڕۆگناری ھەن، پېشکەشکەروو. دیاری شوانەی شنگیەنە یان ھاڵەکۊکی.

 hewraman
  • چەمە زەخم

    چەمە زەخم چەمەزەخم عادەتیٛوە قەدیمین دلیٛ میلەتو هەورامانی و کوردەوارینە  بیەن و هەن، دیار…
  • کوڕ و تاتە

    کوڕ و تاتە تاتە زەڕم گەرەکا تاتە جلیٛم گەرکیٛنیٛ تاتە کتیٛبم گەرەکا تاتە ماتوڕەم گەرەکەنە …
  • هەورامان کوٙگەن؟

    هەورامان کوٙگەن؟ هەورامان: یاگیٛ بەر شیەی شەکەتی شەکەتا و مانیایی مانیاکان. هەورامان:سەردۆ…
Load More In پەیلوای

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟ بەپاو هەواڵو تیمو تاوتوکارێ”ئەنستیتو پەی…