یانە گردین بومڕەنگ,Boomerang

بومڕەنگ,Boomerang

122

بومڕەنگ,Boomerang

بومڕەنگ،چۆیە لار و چەمیاوەن
(ئیسەتێ جۆرێ پلاستیکیچش وەش مکەرا)کە ئانزانێ هەر جە ویەردەی دورەنە پەی نەچیری و کوشتەی حەیوانی و حەتا ئانزانی و…کەلکشا چەنەگیٛرتەن.
ئانزانێ وەڵینیٛ،بومڕەنگشا پسەو کاردەستێوی پەنەوازی،جە دلێ سرووشت و تەبیعەتیەنە،ئێستەنەو و یام شۆنەو ئانەی کە بە کارکەردو خاسو ئی چۆچەمیایە ئاشنای بیێ کە خاستەر جە چۆی تەری پەڕتافیۆ و ملۆ هەوایرە،کەوتێ ئەندیشەو سازنای ئی کاردەستە کۆن و کارئامەی.
قەدٚیمیتەرین بومڕەنگێ کە تا ئیسەتێ ئێزیانۆ مگێڵۆوە پەی ۲۰هەزار ساڵێ چیوەڵی. هەرچنڎ ئاگایی و زانیاری جەبارەو بومڕەنگی کەم و ناچیزا،بەڵام خەڵکی بومی و بنەڕەتی وەڵاتو ئوسترالیای خاوەن و ساحیبو ئی کاردەستەیە مزانا.
بومڕەنگ،یۆ چا کاردەست و وەسیلەی جەنگی و کومەکی بیەن کە ئانزان تاوانش وەشش بکەرو.
واچەو بومڕەنگی پەی یوەم جاری جە لاو خەڵکو”ویلزی پانیشتی”واچیان و بە یادگار مەنەن، ئیجا جە لاو خەڵکی بومی ئوسترالیای، سەرنیشتو وەرهۆرزو ئافریقای و پانیشتو هیندستانی و هەرپاسە خەڵکو سورپۆسو”هوپی”جە ئاریزونا و ئامریکای بەکار لوان و چی کاردەستیە کەلکشا گیٛرتەن.
بومڕەنگ دوێ جۆرێن:
۱-بومڕەنگێ کە هوٙرمگیٛڵوٙوە.
۲-بومڕەنگێ کە هوٙرنمەگیٛڵوٙوە.
ئا بومڕەنگیٛ کە هوٙرنمەگێڵاوە،کەم چەمیای و هەم سوکێنێ وفرەتەر پەی هەرمانەو ڕاوکەردەی و نەچیری بەکارلواینێ،پیجۆرە کە شۆنەو پەڕتافنای ڕوەو حەیوانی یا پەلەوەریوی، دلێڕاسەنە کەردیٛنیٛش دوێ کوتیٛ.
ئا بومڕەنگێ کە فرە مگنا وەرو چەمی و فرەو خەڵکو جهانی مژناساشا و دیەنێشا ئانێنێ کە هۆرگێڵاوە پەی ئا یاگێ کە پەڕتافیاینێ.
ئی جۆر بومڕەنگێ جە چۆیە سفت و سەختی وەشێ با و ساختارێ چەمیای و لارشا هەن،پیجۆرە کە لایوەشا تەخت و پان و ئەو لای تەرشا، “کۆم”(کوژ)و لار و زاویەی(گۆشە خەت) ۹۰ تا ۱۲۰ دەرەجەیشا هەن.
بومڕەنگ پێسەنە باڵێو هەواپیمای، و زاویەو میانو ئی دوە باڵیە،۱۰۷دەرەجێن کە ئەڵبەتە ئەنازەو ئی زاویەی متاووٙ کەم و زیاڎ بۆ و فاڕیو.فرەو بومڕنگیٛ ئەوەگێڵێ سی تا شەس سانتی میترێنێ.
باڵیٛ بومڕەنگی سافێ نیەنێ، بەڵکو پسەو باڵێ هەواپیمای،یەک لاش ساف و لایوە تەرش ناسافەن” ڕووشەن”  و وەختو شانایش،فشارو هوای میانو دوە باڵەکا دوچارو فاڕیایی و جیاوازی بۆ و وەختارێ بومڕەنگ پەڕتافیوٙ، بۆنەو ئانەی جە لایوەشەنە فشارو هەوای فرەن، ڕوەو لای تەری مکیشیوٙ.
ئاکەسە کە بومڕەنگی پرتافنۆ مشیوم بازوێش خەیلێ کەم چەپوانەو یۆی چەمیاوە،یانی بەپاو ئاتەختایە کە جە گلێرگاو بومڕەنگی دەس پەنە مکەرۆ،مشیۆ دوریش نزیکو۲ێ دەرەجێ بۆ.
پەی شانای بومڕەنگی،مەچەکێ دەسی مشیۆم بە لاو پایینی چەمیاوە.
پەڕێ ماتورو هلی کوپتر و هواپیمای وەختارێ خۆلیاوە کە خودو هەواپیما یا هلی کوپتری بێ جموجۆل یانی مدرای با، بەڵام زەمانێ بومڕەنگ پەڕتافیۆ، سەرەڕاو چەرخیای پەڕا، جە ئاسمانەنە دەس کەرۆ بە جموجۆلی.
هەرکام جە کەراخێو بومڕەنگی کە جە لاو سەرینو محوەرو چەرخیای با، جە لاو پەڕتافناو بومڕەنگی مچەرخیۆ و کرژی جمای خولیایش چەنی کرژی جمای جموجولیش باوە یۆ، بەڵام کەراخێ تەرش چەپوانەو ئا لایە مچەرخیۆ. یانی سەرەڕاوئانەی هەردوە باڵێ یەک کرژی جمایشا هەن، بەڵام کرژی جمای یوٙیشا چەوی فرەتەرەن و ئی فەرقو تێژڕەویە بۆ نونگەو وەش بیەی دوێ هازێ جیاوازیٛ جە یوٙی و بەرئامەش بۆ سازنای هازیٛ کە مدٚۆ ئەو ڕاسەرو محوەرو چەرخیای بومڕەنگی.
ئەرەنیشتێ و بومیێ ئوسترالیای پیجۆرە بومڕەنگی ڕوەو یاگێ دورێ مشانا؛کە تا ۱۰ میترێ جە خەتێوە ڕاسەنە ملۆ و بازنێو بە خەت گلێرگای ۱٥ میترێ جە ئاسمانەنە دروس مکەرۆ و دیسان ڕوەو ئا پەرتافکەریە هۆرمگێڵۆوە، ئەڵبەتە بە جۆرێ تەریچ پڕتافناش، پیجۆرە کە هەر جە وەرۆ خشیۆ ئەو زەمینی و دماجار بەکیٛشیای و وەشکەردەی بازنێ جە هەوانە، ڕوەو ئاپەڕتافکەریە مگێڵۆوە.
بڕێ جە بومڕەنگا وەڵێو ئانەی بگێڵاوە متاوا تا ۱۳۰ میترێ جە ئاسمانەنە خولیاوە.
ئیسەتێ جە بومڕەنگی دەس ساز پەی بازی و وەرزشی کەڵک مگێریوٙ و دوستدارێ و گەمەکەرێو بومڕەنگی جە جهانەنە فرێنێ.

وەڵاوگەو هەورامانی

پەڕتافنای بومڕەنگی و وەشکەردەی بازنەی جە ئاسمانەنە و دیسان هۆرگێڵایش ڕوەو زەمینی و پەڕتافکەری.
Boomerang
 hewraman
Load More In گردین

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟ بەپاو هەواڵو تیمو تاوتوکارێ”ئەنستیتو پەی…