یانە هەواڵیٛ ڕاوڕەسمو بەخاکسپارای کوفی عەنانی

ڕاوڕەسمو بەخاکسپارای کوفی عەنانی

97

ڕاوڕەسمو بەخاکسپارای کوفی عەنانی، سەردەفتەرو وەڵینو سازمانو نەتەوە یوٙگیٛرتەکا لواڕاوە

پەنجشەمەی حەفتەی چیوەڵی ۱۳و سپتامبرو ۲۰۱۸ی بە بەشداری سەران و گەورە ڕابەرێ جهانی، ڕاوڕەسمێ پەی سەردەفتەرو وەڵینو سازمانو نەتەوە یوٙگیٛرتەکا جە وەڵاتو غینیای “Guinea” لواڕاوە.
جەنازەو کوفی عەنانی چنڎ ڕۆی چیوەڵتەر جە یانەشەنە جە وەڵاتو سوییسی ڕوانەو”ئاکرا”ی پایتەختو غینیای بی و چی وەڵاتەنە ئەسپەردەو خاکی کریا.
ئی ڕاوڕەسمە جە گلێرگاو کونفرانسو میان نەتەوەیی ئاکرای دماو یەرێ ڕوا سوگ و ماتەم پەی ئی کەسایەتیە ئەنجام دریا.
“ئانتونیۆگوتێرێش”سەردەفتەرو ئیسەو سازمانو نەتەوێ جهانی چی ڕاوڕەسمەنە واتش:کوفی عەنان ڕابەرێ بێ وێنە بێ و سازمانو نەتەوە یوٙگیٛرتەکا جهانی، کوفی عەنان بێ و کوفی عەنان،سازمانو نەتەوە یوٙگیٛرتەکا جهانی.
بەڕاسی ئاڎ(کوفی عەنان) پیایوە شایستە و گەورە مەنش بێ و نەتەرس و دلێر و ڕاسواچ.
چی ڕاوڕەسمەنە کەس ویانەو(خانوادە) کوفی عەنانی،سەرانو جمهورو غینیای،ساحێل عاج،زیمبابوە،لیبیریا،نامیبیا،
سەروەزیرو نیجر،ڕەییسو پارلمانو کینیا و توگوی،وەزیرو کاروباروبەرو ئەلجەزایر،کونگو،نیجێریە،بورکینافاسو،مەلەکێ وەڵینوهولەندی،یاگەگیرو وەزیرو کاروبارو بەرو ئامریکای جەزەمینەو هێمنی و وەرگیری جە تفەنگ و سڵاحی، سەروەزیرو وەڵینو کینیای،براو ئەمیرو وەڵاتو قەتەری، یاگەگیرو ڕەییسو کومیسیونو کۆبیەی ئافریقای،کەسویانەو نیلسون ماندیلای و چنها کەسایەتی پایەبەرزێ جهانی بەشدارێ بێنێ.
ڕەییس جمهورو غینیای ئی ڕاوڕەسمەشە گەورەتەرین یادەوەری پەی ئی کەسایەتیە گەورەیە زانا و کوفی عەنانش یۆ جە ئێنسانانێ دلسۆز و کارئامە جە ڕاوبەردەو کاروبارو جهانی داقەڵەم و بێ وێنە وەسف کەرد.
جەنازەو کوفی عەنانی ڕۆ دوەشەمەی وەڵینی جە یانەشەنە جە وەڵاتو سوییسی ڕوانەو غینیای کریا.
تاووتو ئی کەسایەتیە بە پەرچەمی سور و سەوز و زەردەو غەنای پۆشیابێرە و بە چەمدٚاری و پاسبانی تەمامو ئەفسەرا نیزامی و بەوانای سروودی ئایینی و ئاهەنگێ شایستەو خەڵکی و مەردمو بومی ئی وەڵاتیە و بە گەورەگێرتەی چی کەسایەتیە و سەرسڵامەتی بە کەس و یانەیش لواڕاوە و بەرگوزار بی.

بەشێ جە ژیوانامەو کوفی عەنانی:
کوفی عەنان چن ساڵێ چیوەڵی پاداشو ئاشتی نوبێلو جهانیش پێشکەش کریا؛یوەمین سەردەفتەرو سازمانو نەتەوە یوٙگیٛرتەکا جهانی بێ کە جە پانیشتو ساراو ئافریقای یاوا پی پلە و پایەی.
عەنان جەڕۆدیارو شەممە ۱۸ئوتو ۲۰۱۸ی (۲۷وگەلاوێژو۱۳۹۷ی ڕۆجیاری)جە سنعەو ۸۰ ساڵەیی دماو ماوێ توش ئامەی بە ناوەشی کۆتاخایەنی کوچی دماییش کەرد.
عەنان هەفتەمین سەردەفتەرو سازمانو نەتەوە یوٙگیرتەکا جهانی جە میانو ساڵێو ۱۹۹۷ی تا ۲۰۰٦ی بێ.(۱۳۷٦-۱۳۸٥ی ڕۆجیاری) “کوفی عطا عنان” جە ۸ وئاوریلو ۱۹۳۸ی عیسایی چەنی واڵێ دوقلوێش جە شارو “کوماسی” غینیاو ئافریقای بە دنیا ئامان.
جە کالجو”ماک ئالیستێر”ی بازرگانیش وانا و دماتەر درێژەش دا مسیاری وڕشتەو پەیوەندی میان نەتەوەییش جە ژنێوو سوییس و مودیریەتێش جە زانشتگاو”MIT”ئامریکای مسانا.
شۆنیەرە،جە ساڵەو ۱۹٦۲ێ لوادلێ سازمانو نەتەوە یوٙگیٛرتەکا جهانی و جە بەشو سازمانو تەندروستی جهانی شاخەو ژنێوی مەرزیارە و دەس بەکار بی.
جە مارسو ۱۹۲۲ێ تادسامبرو ۱۹۹٦ی یاگەگیرو بەشو ئاشتی”پطروس غالی” سەردەفتەرو میسری ئا عانەو سازمانو نەتەوە یوٙگیٛرتەکا جهانیش بە گەردەن گێرت.
دماتەر جە ۱۳و دسامبرو ساڵەو ۱۹۹٦ی؛ ئەنجومەنو هێمنی(شوراو ئەمنیەت)،
عەنانش بە عونوانو سەردەفتەرو سازمانو نەتەوە یوٙگیٛرتەکا جهانی هۆرچنی و شۆنیەرە جە کۆبیەی سازمانو نەتەوە یوٙگیٛرتەکا جهانی پەسەند کریا و پسەچێوێ یوەمین کەس بێ کە جە دلێ کارمەند و کاربەدەسێ سازمانو نەتەوە یوٙگیٛرتەکا جهانی یاوا پی پلە و مقامەیە،دماجار هەم دیسان پەی دوەمین کەڕەتی جە ساڵەو۲۰۰۱ی هۆرچنیاوە پەی ئی پایەی و تا ۲۰۰٦ یۆ جە خزمەت کار و هەرمانبەرو کاروبارو سازمان نەتەو  یوٙگیٛرتەکا جهانی و تایبە هەرمانی ئاشتی وازانەی جە شارو نیویورکیەنە بێ.
هەرچن مودیریەتو کوفی عەنانی جە سازمانو نەتەوە  یوٙگیٛرتەکا جهانی بێ عەیب و هاڵی جە ئێنتقاد و پەرسی نەوێ(تایبە جە بابەتو جەنگ و کوشتار و پاکسازی نیژادی دلێنو وەڵاتو ڕوئانداو ئافریقای)،بەڵام نامێ و کەسایەتی گەورەو کوفی عەنانی پەی خەیلێ جە دیپلومات و سیاسەتمەداران،یاگێ ئێحترام و گەورەییا.

تاووتو جەنازەو کوفی عەنانی ڕازیاوە بە پەرچەمەو وەڵاتو غینیای
“Nane Lagergren Master”
نانی لاگیرگرین مەستر،هامسەرەو دوەمو کوفی عەنانی وەکێڵێو سوییدیە بێ.
 hewraman
Load More In هەواڵیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیکوڵی:  tribulus terrestris

پیکوڵی:  tribulus terrestris پیکوڵی یام پیکوڵە، گیواوێن وەھارێنە سەوز بۆنە، سەرانسەرو دنیا…