یانە ئەدەب و هونەر هەری مەینەتی

هەری مەینەتی

192

هەری مەینەتی:
ڕۆمانە گۆلانەو “هەرە مەینەتیەکەو” مامۆ بارامی:
دلێڕاسەو ئەوەڵ مانگو زمسانی بێ، زقم و سەردا پاسە وێش کوابێرە، کە خەبەرو ئامای زمسانێوی سەختی ئارێ کە ئینا ڕاوە، هەڵای وەروەی کۆنێ زەمینەنە بێ، وەروەی تازێ وارێوە ملشەرە. جە قاوەخانەو دەگێنە، جە وەرو بەرەو یانەکانە، باس باسو، ئامای زمسانو سەختو ئا ساڵیە بێ. پەی خەڵکو دەگێ مەسەلێ هێزما و گەرم کەردەو یانەکاشا، بیێ بێ قسێ خاس و عامی.
یانەو مامۆ بارامی ئۆپەڕو دەگێوە بێ، یانێوی تاقانە و دوە تەبەقە بێ، بە پێچەوانەو گردو یانەکا دلێ دەگاکێ، کە لکێ بێنێ یەکتریەرە، ئاذ، تاقە یانە بێ و سەذ گەزێو جە یانەکاتەری دوورتەر بێ. یانێوی قەذیمی و فرە کۆنە بێ، جار جار جە لا ریشچەرما دلێ دەگاکێوە پاسە باس کریێ کە یانەو مامۆ بارامی یۆ چا یانە قەذیمیانە کە چانەیەنە ئەوەڵین یانەو دەگاکێ بیەبۆ کە وەختو وێش وەش کریان. دەربازێوی کۆنەی زلش بێ کە لاشیپانەکێش پویێ بێنێ و گۆپێ ئاسنینێش بە بزماری زلێ دریێ بێنێ وەنە.
مامۆ بارام سەرو دوە ساڵێو بێ، بە بۆنەو نەوەشێێوی کتوپڕیۆ جە دنیای لوا بێ، یەرێ کناچێ و دوێ کۆڕێش ئاستێبێنێ جیا، تەنیا مانگێو وەڵێ مەرگیشەنە بێ کە کناچە گۆرەکێش، نازێ، دێبێش شوو، چوار زارۆڵەکەی تەرێش، گۆرەکەشا سابیر کۆرێوی ١٥ ساڵە بێ و دماو سابیری کمال بێ و ئۆ دوە کناچەکێچ نەرمینە و بەهارە، بەهارە کە ئاخرینەکێ بێ، ٦ ساڵێش بێ. 
مایجانەی ژەنیش بێژگەم ئەرکو یانەی و تەڕو وشک کەردەو زارۆڵا، ئیسە ئیتر مشێ کارو مڵکەکەیچش کەردێ و بە ڕەنج و زەحمەتو شەوانە رۆیش، مڵکەکەش ئاردێوە کۆ، بەڵام هەرچی کەرێ نەتاوێ، رۆنەقو جارانو مڵکەکەی بارۆوە ئا وەختە، کە مامۆ بارامی شوش، زیندە بێ.
دماو مامۆ بارامی، ڕۆ دماو ڕۆی، مانگە دماو مانگێ، وەزعەو مەعیشەتو یانەیشا روەو خرابە لوێ، تەنیا سەروەت و سامانێو کە مامۆ بارامی دماو وێش ئاستەبێش جیا، تاقە گاوێوە بێ، کە نامێش گاوە زەردە بێ، چەنی هەرێوی پیری، کە پەنەش واچێنێ : کۆپان لار، نامێ کۆپان لاری پەی هەرەکەی چا وەختۆ ئامێ بێ، کە؛ روێووشا، مامۆ بارام دوێ سەوێ تەماتێش چنیێ بێنێ و پەلەش بێ، کۆپانەو هەرەکەیش بە لاری نیێ بێ، مایجانەی ژەنیش وەختێو کۆپانەش دیە کە بە لاری نریێ بێ سەرو هەرەکەیۆ، خوا و بە بارامیش وات ” ئەرێ بارام ریشەت بەر نێ، تەماشەو ئا کۆپانەو هەرە فەقیرەیتە کەردێنە، کە چن لارەنە!؟” مام بارامیچ بە خووۆ جوابش داوە، “دەی مایجان ئانە جە ئیسۆ، هەرەکەما نامێ نیا کۆپان لار!!”. پا جۆرە، ئا روە، هەرەکە نامێ نریا کۆپان لار.
گاوە زەردە ؛ کەرەو ماسو زارۆڵەکا دێ، کۆپان لاریچ، زمسانێنە هێزمێش پەنە ئارێنێو و هامنیچەنە بارە سۆرۆ و بارە گزرەو، بارە تەماتەش پەنە بەرێنێ. دماو مام بارامی، کۆپان لار بێ ساحێب کۆت، ئیتر کەس نەبێ نە ئاڵفێوش دۆ و نە ئاوێوەش پەی بارۆ، جە راسیەنە بە مەرگو مام بارامی، رۆزگارو سیاوو کۆپان لاری دەسش پەنە کەرد.
مایجانە؛ تا ساڵێو دماو مامۆ بارامی بە ڕەنج و مەینەت، کۆپان لارش ژیونا، بەڵام ئیتر چاو زیاتەر تواناییش نەمەنە بێ، ئاڵف و گزرێو کە جە هامنەنە بە ئەرکو سەرو شاناش کۆش کەرێوە، تەنیا بەشەو گاوەکێ کەرێ. بەینو کۆپان لاری و گاوە زەردێنە، مشیێ دانێوشا هۆرش چنیێ، دیار بێ گاوەکێ پەی ئاذیشا، یانی ژیوای، یانی ماس و کەرەو سەحبانەو زارۆڵەکا، جە راسیەنە، مایجانە جە وەزعێوە خرابەنە گیرش واردە بێ، چێش تاوێ کەرۆ.
پاییزو ئێساڵی وەختێو کۆچێ ئامێوە دەگا، پاییزێوی فرە کۆڵ بێ، زمسان فرە زوو دەسش پەنە کەرد، هەڵای مانگێو جە پاییزی مەنە بێ کە ئاڵفو دلێ کاذانو یانەکەیشا نیمە بیەبێ، چاوەختەنە کە هەڵای ئەوەڵو زمسانی بێ، بەشەو دوێ یەرێ جاراتەر، ئاڵف نەمەنە بێ کاذانەکەنە.
پەی ئاذێ هۆرچنیەو ئی ڕێ فرە سەخت و دژوار بێ، هەمیشە دلێ عەزابو وژدانو وێشەنە ناراحەتە بێ، هیچ رێوەتەرەش پەی نەمەنێ بێ، بێژگەم ئانەیە کە هۆرزۆ و گنۆنە دلێ دەگێ، و یانە بە یانە بە خەڵکی واچۆ کە بە هەر شێوێو بیەن بەشکەم کۆپان لارش چەنە هۆرگێرا، بەڵام کەس رازی پانەیە نەبێ، چونکە خەڵک زانێ کە هەرەکە پیر بیەن و توانایی بار بەردەێش نەمەنەن.
دماو ئانەیە کە جە گرد چێوی نائۆمێذە بیە، شەوێوە دڵو وێشەنە قەرارش دا کە ڕۆی دماینش وەڵێ ئانەیەنە زارۆڵەکێ وەرمەنە هۆرزا، کۆپان لاری بەرۆ و جە دگێ دوورش وزۆوە، ئا شەوە شەوێوە سەختە بێ پەیش، سەحبێ وەختێو وەرمەنە هۆرسە، پێسە عاذەتی هەمیشەیش، چراو دەسیەکێش گیسنانە و جە پلەکانە تاریکەکاشانە ئامارە وار، وەڵێ ئانەیەنە کە بلۆ روەو گۆڕو کۆپان لاری، روەش نیا ئۆ گۆرو گاوەزەردێ چونکە، ئاورە بێ و چەمەڕایی کریێ کە تا ئاخرو زمسانی بزۆ و گۆرەکڵێوش بۆ.
وەختێو بەرەو گۆرۆ گاوە زەردێش کەردۆ، چەنی جیڕەو بەرەکەی گاوەکێ ئاما پێوایشۆ، دەسێوش ئارد سەرەشەرە و چن جارێ قۆربانو سەذاقەش بییە، دۆعێ خێریش پەی کەردە کە بەشکەم هەرچی زووتەر گۆرەکەکەش بۆ و بەرەکەتێو بارۆ پەی یانەکەی.
مایجانە، چا وەختەنە کە گاوەکێ لاونێوە و دەسێ ئارێ سەرەشەرە، کۆپان لار جە ترەکەو بەرەو گۆڕەکەیشەنە تەماشەش کەرێ، دلو وێشەنە ئارەزو کەرێ کە ئاذیچ پێسە گاوە زەردێ، گۆشتەکەش و شۆتەکەش وریێ، با ئەگەر تەنیا پەی جارێویچ بیێ، دەسێوشا ئاردێ سەرەشەرە، یا ئێنذەو گاوەکێ ئاڵفشا وسێ وەرو دەمیش تا لەمەش بە تەمامی سێرە بۆ، ئاخر ماوێوی تۆلانی بێ کە پەڕو لەمەو وێش ئاڵفش نەواردەبێ، پیروو بێ هاز بیەبێ، جە ڕەنج و مەینەتێوی کە جە دۆرانو جوانیشەنە کێشتەبێش پەرێشان و پەشیمان بێ، جە بیەی وێش چی دنیانە بێزار بێ.
مایجانە دماو لاوناو گاوەکێ روەش نیا ئۆ گۆڕەکەو کۆپان لاری، بەرەو گۆڕەکەیش کەردۆ، پێسە هەمیشەی کۆپان لار بە لەمەی ئاوراوە ئاما پێوایشۆ، ئی جارە مایجانە وێش حازر کەردە بێ کە پەی ئاخر جاری ئانذە ئاڵفش دۆ پەنە تا لەمەش بە تەمامی سێرە بۆ، پا جۆرە گەرەکش بێ تۆزێو جە عەزابو وژدانو وێش کەم کەرۆوە، چونکە قەرار ئانە بێ کە هەر ئا سەحبانە بەرۆش یاگێو کە ئیتر ڕا گمە کەرۆ و نەتاوۆ گێڵۆوە.
چا وەختەنە کە بەرەو هەردوە گۆڕەکەێش کەردەبێوە، روەش نیا روەو بەرەو کاذانەکەی تا چا ئاڵفە کەمەیە، کە مەنە بێوە بەشەو هەردوەلای بارۆ.
کاذانەکە؛ کۆتەبێ بنەو دەربازەکەیۆ و چا زەمانۆ کە وەش کریابێ تا ئیسە، رۆشناییش بە وێشۆ نەدیە بێ، هەم شەوێنە و هەم ڕۆنە، مەشێێ بە چراودەسیۆ تاوێت دلەکێش وینی، جە راسیەنە ئا یاگێ کاذان نەبێ، بەڵکو همارێوی کۆنە بێ، کە پەڕ بێ جە کەلو پەلی قەذیمی و کۆنەی، کە تەنانەت جە وەختو ژیوای مامو بارامیچەنە، هیچکام چا کەلو پەلیە بە کار نامێ بێنێ، ئیتر نەعیلاجی جە نەبیەی کاذانیەنە، ئاڵف و گزرە و سمەری، جە گۆشێوشەنە کەرێنێرە.
وەختێو بەرەو کاذانەکەێش کەردۆ، مەجبوورە بیە کە گۆڵو چراودەسیەکێ هۆر دۆ تا رۆشنایێوی زیاتەر دۆنە دلێ کاذانەکەی، هەر چن ئاڵفەکە جە پەشتەو بەرو کاذانەکەیەنە کریابێرە، بەڵام هەر مەشیێ فرە وریایش بە کار ئاردێ، چونکە دلێ ئاڵفەکەی هەمیشە مڵێش چەنە بێنێ و گیاندارێ تەریچ پێسە مار و پەسپەسەکۆڵێ و چێوا تەری فرێ بێنێ.
مایجانە هەر جارێو پا نیێنە دلێ کاذانەکەی، خۆفێوە و هەسێوی ناوەشش پەی ئێ، پا عۆمرە یاوێ بێ، هیچ وەختێو حەز نەکەرێ زیاتەر جە چن دەیێقا جە کاذانەکەنە مەنۆوە، بەڵام ئا جارە هەر وێشۆ کۆتە سەرنج دای دلەکێش و تەماشەو دار و دیوارو کاذانەکەی، چراودەسیەکێش کەردە لا بەرەکەیەرە، وەختێو خەریکەو ئاڵفەکەی بێ، جە سووچێوەنە کۆپانەو هەرەکەیش دیە!، ویرێش کەردێ، پا زمسانە سەختەنە مەکریۆ کۆپان لاری بە بێ کۆپان بەرەڵا کەرۆ، دەسش جە ئاڵفەکەی هۆر گێرت، بە وردی تەماشێو گردو کەلوپەلە کۆنەکەیش کەرد، هەرچن حەز نەکەرێ بەڵام مەشیێ لوێ وەرۆ و کۆپانەکێش ئاوردێ، جە دیوارو کاذانەکەیۆ، چێوێ فرێ ئاڵۆچێێ بێنێرە کە مەنزەرێوی وەششا نەبێ. ساجێوی سیاوی زل کریابێ دارەرە، چۆخۆڕانەکێوی، کۆنە چەنی فەرەنجێێوی، کە چن دانێ وڵێش چەنە بێنێ، جە پاڵو ساجەکەیەنە کریێبێنێ دارەرە، شۆقو چراودەسیەکێ چەرمایی فەرەنجیەکەێش زیاتەر کەردەبێ کە وەختێو تەماشەش کەرێنێ، ئەجێ ساحێبەکەش چاگە نیشتەنەرە، جە پاڵو کۆپانەکێنە قازانێوەی گۆرێ مسیینە، نونێێ بێوە، سەرو قازانەکێوە، “کۆچێوە” کە دۆرەکەش تۆقەی ئاسنینەش پۆ بێ و هەڵقێوە چەرمێ ئاسنینەش کریێ بێ پۆرە، چێوێو کە فەرەتەر جە گردو چێوەکاتەری سەرەنجو مایجانێش کێشا پەی لا وێش، کاسێوی گۆرەی چوین بێ، چەنی چەمچێوی زلی چوینی دلێشەنە، کە وەختو وێش، عەینو ئانیشاشە جە مەردەشۆر خانەو مزگیەنە دیێ بێنێ، کە مەردێش پەنە شۆرێنێ!!، ئیتر ئانذە چێوێتەرێ کۆنێ و ئەرەرزیێش چەنە بێنێ، کە وەختێو تەماشەشا کەرێ حاڵش تێک شێ.
پەی ساتێوی وازش جە ئاڵفەکەی ئاوەرد و لوا روەو کۆپانەکێ، وەختێو کۆپانەش بەرزە کەردۆ، جە دیوارو پەشتەو کۆپانەکێنە، چێوێوش دی کە تا ئیسە نەذیەبێش، عەکسو چوار دانێ هەرا شۆنەو یۆیەرە!!!، جە دیوارەکۆ، نەقاشی کریێ بێنێ، دیار بێ نەقاشیەکە فرە بە ساذەیی و بە خەڵوز (زۆخواڵ) جە دیوارەکەنە نەقش دریا بێ، ویرێش کەردێ کە ئینە متاوۆ یۆ جە زارۆڵەکا کێشا بۆ، بەڵام ئانەیە زانێ کە تا ئیسە هیچکام جە زارۆڵەکا، تەنانەت پەی یەک جاریچ بیەبۆ سەرەش نەکەردەن پا کاذانەرە، چونکە گردێ خۆفێوە تایبەتەشا چا کاذانیە بێ.
بە دڵنیایۆ، یاوا پانەیە کە ئی نەقاشیە مشیۆ جە دۆرانو زارۆڵەیی بارامی شویشەنە یا گاهەز چاووەڵتەر کیشیێ با، بەڵام ئایا ئا نەقاشیە تەنیا نەقاشێوی ساذە بێ؟، یا ماناو چێوێویش چەنە بێ، وێچش نەزانێ، هیچ وەختێویچ بارامی شویش، چا بارۆ باسێوش چەنی نەکەردێ بێ، چێوێو کۆت وەرو خیاڵیش، و ئاذیچ ئانە بێ، کە گاهەز ئی نەقاشیە ژمارەو ئا “هەرا” بیە بۆ کە چی خانەوادە قەذیمی وکۆنەنە خزمەتشا کەردەن!، یا گاهەزیچ ژمارەو ئا حەیوانە بەسزوانا بۆ کە دماو خزمەتێوی تۆلانی بەرەڵا کریێ با!!، نەک تەنیا مایجانە بەڵکو گاهەز هیچ کەس نەزانۆ کە رەمزو ئا نەقاشیا چێشا، و چێش بیەن!؟.
کۆپانەکێش هۆر گرتە و چا وەختەنە کە گەرەکش بێ جە بەرەو کاذانەکەیەنە بارۆش بەر، دیش؛ هەم گاوە زەردە و هەم کۆپان لار، جە گۆڕەکێ وێشانە ئامێنێ بەر، ئینێ دلێ داڵانەکەیەنە، سەرەشا نیان لا سەرەو یەکتریۆ، پێسە دوێ واڵەو برایا کە ماوێوی درێژ بۆ چەنی یۆی ژیوێێ با، راز و نیاز چەنی یەکتری کەرا.
ئا روە پەی کۆپان لاری روێوی سیاو بێ، بەڵام وێش ئاگاش جە دنیای نەبێ، هەرگیز بە ئەقڵشەنە نەلێ، کە دماو ئا گرد ڕەنجو مەینەتیە، دماو ئا گرد وەفاداری و خزمەتیە، روێو بێ وەرۆ کە جە واڵەکێش گاوەزەردێ و جە خانەوادەێش و تەنانەت جە دەگاکێێچ، دوورش وزاوە.
مایجانە، وەختێو کۆپانەکێش داڵانەکەنە نیارە، لوا ئاڵفەکەش ئارد و کەردش دوێ کۆتێ و بەشەو هەردویش کەردەرە وەرو دەمیشا. پا جۆرە ئا روە کۆپان لار پەڕو لەمێش دماو ماوێوی درێژی ئاڵفش وارد، ئیسە ئیتر وەختو ئانەیە بێ کە مایجانە کۆپانەکێ بنیۆ سەرو مازیشۆ و وزۆش ڕا.
چا وەختەنە کە نەما کۆپانەکێ، ویرێوش پەی ئاما!!، کە مشیێ هەر جە ئەوەڵۆ زانێش!، ئاذیچ ئانە بێ، چەنی کریۆ حەیوانێو، پی بارە قۆرسۆ، پی کۆپانە زلێوە بەرڵا کریۆ؟!. جە راسیەنە مایجانە جە خەمو خەجاڵەتەنە، وێچش نەزانێ کە خەریکەو چیشیەنە و چە ئاقیبەتێو چەمەڕایی کۆپان لاری کەرۆ.
پا جۆرە کۆپانەکێش داڵانەکەنە نیارە و هۆسارەکەش کەرد ملش و بەرەو دەربازەکەیش کەردۆ، فرە بە ئارامی، جە دەربازەکەنە لوێ بەر، هۆسارەکەش پێچنا دەسشەرە و کۆتە وەڵێ کۆپان لاری، کۆپان لار؛ پێسە عاذەتو گرد روێویش، روەش نیا روەو دەرەوهانەی کە گرد روێو ئاویش چەنە وەرێ، بەڵام مایجانە، بە کێشتەو هۆسارەکەێش ڕاکێش وەنە فاڕا. 
هەڵای سەحبێ زوو بێ، دلێ دەگێ فرە چۆڵ بێ، هەوێوی فرە چیا هۆرش کەردە بێ، ئاسمان هۆرێوی تاریکی گرتەبێرە، هۆرەکێ؛ ئانذە نزمێ بێێ بێنێرە، کە پاسە دیار بێ جە سەرو کەشەکاوە کریۆ بە دەس گیریشا.
کۆپان لار ئەجێ دڵش خەبەرش دابێ، کە کۆگەش بەرا، دڵش نەبێ پۆ بلۆ ڕانە، جار جار مایجانە مەجبوورە کریێ کە هۆسارەکەی تن کێشۆ و گنۆ قسێ چەنیش تا بەڵکو هەرچی زوتەر جە دەگێ ترازنۆش و ڕەذش کەرۆ، چونکە بە راسی حەز نەکەرێ کە پا سەحبە زوەنە، کەس چەنی هەرەکەی وینۆش، ئاذیچ بە بێ کۆپان، پا سەرداو سڵێوەنە.
چا وەختەنە کە ئیتر یاوێ بێ ئۆپەڕو دەگاکێ، تەنیا دوێ یانێ مەنێ بێنێ کە بازۆشا جیا و گنۆ پۆدیمو ملەگاکەیەرە، دەنگێو کۆت گۆشش، لاش کەردۆ مذیۆ مەتی لاڵێنە، مەتی لاڵێ؛ ژەنێوە بە عۆمرە بێ، کە ماوێوی درێژ مامانی گردو دەگاکێش کەردەبێ، بەڵام ئیسە پیرە بیێبێ و وێش تەنیا یانە گۆلانێوەنە گۆزەران کەرێ، دیار بێ مەتی لاڵێ جە دوورۆ مایجانە و هەرەکەش دیێ بێنێ. 
چا وەختەنە کە مایجانە و هەرەکە یاوێ وەرو بەرەو مەتی لاڵێ، مەتی لاڵێ؛ لێوو دەلاقەکەێش کەردۆ و چڕیش ئۆ مایجانێ و واتش “سەواخێر مایجان، ئەرێ رۆڵە ئانە پی سەحبە زووەنە کۆگە ملی؟ ئاهەریە، بە بێ کۆپان کۆگە بەری؟!.”
مایجانە پەشۆکیا و نەزانێ چێش جوابو مەتی لاڵێ دۆوە، سەرەش بەرز کەردۆ و واتش “دیارذ خێر مەتی لاڵێ، وەڵا مەتی لاڵێ گیان، تۆ یاگێ ئەذێمەنی، راسەکێش ئی هەرو ئێمە ئیتر کەڵکێوش پۆ نەمەنەن، بخوا وێت مزانی منیچ تەنیانا، ئی هەرە؛ وەی مەکریۆ پەیم، گەرەکما بەروش پەی {وێشەکەو دەرەو بناوچی} چاگە؛ هەم گەرمتەر چێگەیەنە و هەم پا دلێ نەیجانە لەوەڕ هەن کە بوەرۆ!، تا ئی زمسانە بلۆ، دمایی بزانو چێش بۆ.”
مەتی لاڵێ؛ جە جوابەکەۆ مایجانێنە، بە تەمامی وەزعەش تێکە شیە، هەر چن هەوا فرە سەرد بێ بەڵام بە هەردو دەسێش ئۆ لاکەو دەلاقەکەێش کەردۆ و سەرەش بە تەمای جە دەلاقەکەنە ئارد بەر و واتش “ئەرێ رۆڵە مایجان ئانە مزانی چێش ماچی؟!، مزانی خەریکەو چێشیەنی؟، کۆرە پەی خاترەو خوای ئا کاریە نەکەری، ئا دلێ دەرەیە پەڕا وەرگێ!، بخوا هەر ئاست جیا، وەرگا هۆر دڕیەن، کۆرە رۆڵە بخوا ئاهو ئا هەریە، وێت و زارۆڵەکات گێرۆ!!.
مایجانە بە ئەژنیەی قسەکا مەتی لاڵێ زوانش گۆ نەگێرێ کە جوابش دۆوە، هۆسارو هەرەکەی، چا سەرداو سەحبیەنە، دلێ دەساشەنە یەخش کەردەبێ، نەزانێ چێش کەرۆ، وەختێو ویرو دۆعایەکا مەتی لاڵێ کەرێوە، زارۆڵەکێش ئێنێ وەرو چەماش. ڕێوەتەرەش پەی نەمەنێ بێ، بێژگەم ئانەیە کە هەرەکەی گێڵنۆوە پەی یانەی، ئانذە پەشۆکیێ بێ کە بە بێ خوا حافێزی وەرو بەرەو یانەو مەتی لاڵێش ئاست جیا و کۆپان لارش ئاردۆ پەی یانەی. ڕانە وەختو ئەوەگێڵایش، چن کەسێش دیێ، کە پەرساشا چەنە ئانە ئا هەرە چکۆ بیەن، ؟ کۆگەش بەری؟، ئاذێچە جە جوابەکەشآنە، ئانەیە واچێ کە دەربازەو یانەکەیشآ کریابیەنۆ و هەرەکە ڕەمان، ئیسە ئانا بەرایش بەرۆوە پەی یانەی!، دیار بێ مایجانە وێچش زانێ کە کەس پا قسێشە باور مەکەرۆ!.
پا جۆرە دیسان کۆپان لار ئاماوە پەی یانەکەیش و کریاناوە دلێ گۆڕەکەو وێش.
مایجانە وەختێو کۆپان لارش کەردەنە دلێ گۆڕەکەی بە پەلە جە پلەکانەکانە ئاما سەر، دانە بە دانە، لێفەکەو زارۆڵەکاش لا دا و تەماشێوو گردیش کەردە، هەردوە دەسەش بەرزێ کەردێ و لاڵیاوە ئۆ خوای کە زارۆڵەکاش پارێزنۆ.
یانەکە؛ فرە سەرد بیەبێ، سۆبەکەش گیسنانە و کتریەکێش نیا سەرشۆ، سەرەش نیا سەرو زنگۆڵاشۆ، جە لا گەرماو سۆبەکەیەنە وەرمش کۆت پۆرە، سەرو سەعاتێو وتە، جە خیاڵو کۆپان لاریەنە ئاما بەر، وەختێو هایش بیۆ زاناش کە مەدرەسەو زارۆڵەکاش درەنگ کۆتەن، سابیر و برا گۆلانەکەش مەشیێ گرد روێو لوێنێ پەی وانگێوی کە جە دەگێوە تەرەنە بێ.
پا جۆرە کۆپان لار ئی جارەیچە شانسش ئارد و مەتی لاڵێ بیە بە پردەو نەجاتیش، بەڵام مایجانە خاس وەرو چەماشۆ بێ کە هەر ئا روە تاڵە ئینا ڕاوە، کە کۆپان لاری جە خانەوادەیش دوور وزۆوە.
چن روێو پا جۆرە ویەرد، یەک دوە روێو بێ، کە کەشو هەوا کۆچێو وەشش کەردەبێ، وەرەتاوش وسەبێوە، مایجانە بە فرسەتش زانا کە گڵێمەکێ دۆ کۆڵێشەرە و بلۆ مڵکەرە تا بەڵکو تۆزێو گەڵا وشکە و پوش، جە بنەو تفەکانە ماشۆوە و بارۆشۆ و تێکەڵۆ ئاڵفەکەێش کەرۆ، تا بتاوۆ چن روێوتەر لەمەو گاوە زەردێ و کۆپان لاریش پەنە سێرە کەرۆ.
جە راسیەنە هۆڵو تەقالاو مایجانێ، پەی ئەوەمەنەی کۆپان لاری، هۆڵێوی ئینسانی و تەقالێوە بێ وێنێ بێ، کە سەرەڕاو ئا گردو ڕەنجو زەحمەتا کە وێش وەرشەنە بێنێ، پا دڵو گیانۆ، پەی ئەوەمەنەی ئاذیچێ هۆڵ دێ. بەڵام چێش کریۆ چەنی رۆزگاری ناباوی کە مایجانەش بە چوار زارۆڵیوە ئەسیرەو وێش کەردێ بێ، کە سەرەڕاو وەزعەو مەعیشەتو زارۆڵەکاش، مەشیێ هۆشیچش لا هەرێویۆ بیێ، کە جە راسیەنە ئیسە ئیتر هیچ قازانجێوش نە پەی وێش و نە پەی زارۆڵەکاش نەبێ، چێش کەری؛ جار جار عاتفە و رەحمو ئینسانی ئانذە قووڵ بۆرە، کە جیا کەردەو گیاندارا جە یەکتری، چە ئێنسان بۆ و چە حەیوان، کارێوی پوچ و بێ مانان. گرد گیاندارێو حەقو ژیوایش هەن، و هیچ گیاندارێوتەر مەتاوۆ ئا حەقشە چەنە بسانۆ.
ڕۆ جە دماو ڕۆی، زمسان فرەتەر وێش ئەرمانێ، وەروێوەی قۆرسە دەسش پەنە کەردە بێ کە جە جاری وەڵینی فرە فرەتەرە بێ، ئیتر تەنیا ئۆمێذو مایجانێ کە گلێرۆ کەردەی گەڵا وشکەیو پووشوو پەڵاو دلێ مڵکەکەی بێ، نەمەن. بە هەر چەرمە سەریۆ بێ، دوە حەفتێش پا ئاڵفە کەمەیە ویارنارە، تا ئانذە زۆرش پەی ئاما کە مەجبوورە بیە، روە وزۆ ئۆ یانەو هێوەرەکەێش تا بەڵکو خەرارێو گزرەش چەنە قەرز کەرۆ تا بتاوۆ گاوەزەردەش پەنە وەی کەرۆ تا بیاونۆش وەهارێ.
ئیتر هیچ رێوەش پەی نەمەنۆ، ساقە بیۆ سەرو ئانەیە کە بە تەمامی قەرارو وێش دۆ. سابیری کۆرش چریش و نیاشەرە لا وێش و گردو مۆسیبەتەکاش پەنە وات. سابیر سەرەڕاو نەو جوانیش و کەمی عۆمریش، بەڵام بە گرد چێوی زانێ و کۆڕێوی عاقڵ و فامیذە بێ، بە گۆشو ئەذێش کەردش و کۆپان لاری نەذامەت بەختش، بەرد پەی دلێ وێشيکەو دەرەو بناوچی و چا بە تاق و تەنیا ئاستش جیا.
وەختێو گێڵاوە پەی یانەی و یاوا دلێ داڵانەکەێشا، پڵمەو گرەوەی گرتەبێ، لوا سەر، وێشدا ملو مۆجەو یاگەکێرە، پڕ بە دڵ دەسش کەرد گرەوای. ئەذاش هەرچن وێش نارەحەتە بێ بەڵام لوا دەسێوش ئارد سەرەشەرە و واتش “رۆڵە سابیر گیان، نارەحەت مەبە، بخوا من ئەژنیەنم ئا دەرە ئەمن و ئەمانا و لەوەڕیچش فرەن، با چاگە بۆ تا وەهارێ، دمایی ملمێ مارمێشۆ”!. سابیر ئانذە گیریابێرە کە نەتاوێ قسێ کەرۆ تەنیا ئانەشە وات. “ئاخر ئەذا وەختێو ئاستم جیا، هەر ئای ئێ شۆنیمەرە، تا عاقیبەت وێم شاراوە چەنەش، ئیجا تاوام گێڵوۆۆ. 
پا جۆرە، کۆپان لاری ڕەنج بە وا بەرذە، پەی هەمیشەی جە ژیوای دلێ یانەو وێشەنە مەحروم کریا.
یۆوەمین شەوەکێ کە کۆپان لار بەر کریا، پەی مایجانێ شەوێوە سەختە و ویر نەبریێ بێ. هەرچی دەنگو گژەواو دلێ دەلاقەکەی ئەژنەوێ، وەرم جە چەماشەنە ڕەمێ.
هیچ نەکریێ، بە هەر شێوێو بیێ مەشیێ ئا وییرە گۆلەو کۆپان لاریشە جە ویر بەردێ، و گردو هۆش و ئاوەزیش، وسێ کار پەی ئانەیە کە ژیوای وێشو زارۆڵەکاش و گاوە زەردێ، تا ئاخرو زمسانی بەرۆ سەر.
چن حەفتێو پا جۆرە ویەرد، زمسان هەڵای ئەوەڵش بێ، وەزعەو مایجانێ، بە بۆنەو نەبیەی هێزماوەو، پەی گەرم کەردەو یانەکەی، و هەر پاسە تەمامیای ئاڵفو گاوە زەردێ، و رسق و واردەمەنی پەی زارۆڵەکا، ڕۆ بە ڕۆ خرابتەرە بێ، ئیسە ئیتر، مەسەلێ کۆپان لاری بە تەمامی ویر شیێ بێوە.
وێرەگانێو سابیر، وەختێو ئاماوە یانە فرە پەرێشان و ناراحەت بێ، هەر دوورۆ بە ئەذێش واتش؛ “ئەذا؛ مزانی کە کۆپان لار ئامانۆ دلێ دگێ؟، لا زیارەتەکانە بیەن، حەمەی رەفێقم واتش کە زارۆڵا بە تەوەنی تار نیان و بەرشا کەردەن، من و حەمە پێوەرە لوایمێ و سەرو زیارەتەکاما دا، بەڵام چاگە نەبێ!، زارۆڵێ زانابێشا کە بەرەڵان و ساحێبش نیا پۆکی بە تەوەنی و تێڵێ کۆتێنێ گیانش.”
ئەذاش شکەش بەردێبێ کە ئەگەر کۆپان لار چێوێوش وەنە نە قۆمیۆ، بێ گۆمان هەر مێوە پەی یاگێوی کە چەنەش ژیوان، دەسێوش وس سەرو شانەو کۆڕەکەیشو واتش؛ “رۆڵە سابیر گیان، تۆ وێت نارەحەت مەکەرە، خۆ مزانی ئێمە ئانذە وەزعەما خرابەنە کە ئیتر مەتاومێ خەفەتو چێوێوتەری بوەرمێ، هیچ نیا هیچش پەنە نمێ”.
پا جۆرە مایجانە سابیری کۆڕش جە ویرو کۆپان لاریەنە لا بەرد، بە راسی وێچش ئانذە گرفتاریێش فرێ بێنێ کە حەز نەکەرێ چا بارۆ، وێش مەشغوڵ کەرۆ. بە لوای هەر شەوو روێوی چا زمسانە سەختەنە، پەی وێش و زارۆڵەکاش پیسە بێ ژیوێوی دوبارەی، هەر روێو کە لوێ، هەنگامێوە زیاتەر بە وەهاری نزیکێ گنێنێ، ئامای وەهاری، پەی ئاذیشا گۆرەتەرین مۆژدەو ژیوای بێ، چونکە هەم گاوە زەردە “زێێ” و گۆرەکەش بێ و کەرە و ماس پەی زارۆڵەکا فەراهەم کریێ، و دووەمو ئانەیچە، گیواو سۆز بێ و ئیتر خەمو ئاڵفی جە مل گنێ.
ئیسە ئیتر بە پاو فەسڵی مەشیێ زمسان مازیش مەڕیا بیێ، چونکە تەنیا دوە حەفتێوش مەنە بێ کە نۆرۆز بێ وەرۆ، بەڵام پاسە دیار بێ کە زمسان دڵش نیا پۆ بازۆ جیا، هێشتا هەر وەروە زەمینەنە بێ. 
مایجانە روێو چن جارێ سەرو گۆڕو گاوە زەردێ دێ، هەر جارێو ئێرە وار و لوێ دلێ گۆڕەکەی، دەسێو ئارێ سەرەشەرە و دۆعێوە خێریش پەی کەرێ.
شەوێوە کە گردو زارۆڵەکا وتێبێنێ، ئامارە وار، دوە یەرە سەعاتێو بێ کە سەرو گۆڕەکەیش نەذا بێ، وەختێو بەرەو گۆڕەکەێش کەردۆ، ناڵەو گاوەکێش ئەژنەوی!، بە پەلە لوا دلێ و چراو دەسیەکێش بەردە چەنی وێش، لوا نزیکەش کۆتۆ، گاوەکێ بە ئاشکرا داواو نەجاتیش وەنە کەرێ، چەرمایی چەماش گۆرە بیەبێ!، جە ئێش و ئازارەنە دۆرو وێشەنە خولیێوە، لوا نزیکتەرەش بیۆ، مذیۆ دەسێ گۆرەکەکەی چەنی نیمەو سەرەیش بەر ئامێنێ، پاسە دیار بێ کە گۆرەکەکە، دلێ لەمێشەنە مەردە بۆ، دڵش گیریارە و ماتەمینی گرتەرە، نەزانێ چێش کەرۆ!، پەنا ئۆ کێ بەرۆ!، جە بێ دەسەڵاتیشەنە ئایەتەلکۆرسیێ وانێ و فوو کەرێ سەرەو گاوەکێرە!، بە پەلە، ئاماوە سەرو سابیری کۆڕش هایش کەردۆ، سابیر بە وەرم ئاڵۆسی ئامارە وار پەی دلێ گۆڕەکەی، نە سابیر و نە ئەذاش هیچ کارێو نەتاوێنێ کەرا، وەزعەو گاوەکێ سات بە سات خرابتەرە بێ، مایجانە روەش کەردەنە ئۆ سابیری و واتش؛ “رۆڵە سابیر گیان تۆ چێگە بنیشە، با من بلو مەتی لاڵێ چڕو ئێگە، بەشکەم چارێو بێزۆوە” سابیر واقش بەردە بێ، نەزانێ چێش بە ئەذێش واچۆ، چا وەختەنە کە ئەذاش گەرەکش بێ جە گۆڕەکەنە بێ بەر، گاوەکێ بۆڕێوی زلش کەرد و گۆرەکەکە، جە لەمەشەنە کۆتەرە وار، چێش بێ چا دەیێقەیە وەشتەر پەی ئاذیشا، شاذی و زۆق جە چەما هەردوییەنە دیار بێ، گۆرەکەکە ئەوەڵ جار هیچ ژڵێوێوش نەبێ، گاوەکێ زوو زوو لێسێشۆ و بە لوتەش دێش وەنە، دماو چن دەیێقا، هۆرزناشۆ سەرو پەیا. مایجانە بە دیەی ئا مەزەرەیە، هەناسێوی پەڕ جە ئارامش و درێژش هۆرکێشت، بە تەماشەو گۆرەکەکەی هەڵسەو شاذی دلێ چەماشەنە هەڵقێش وستە.
سابیر بە پەلە ئاماو سەر، برا گۆلانەکەش کە تازە وەرمش کۆتەبێ پۆرە، هایش کەردۆ، بە قاڵە قاڵ و قسە کەردەی سابیری چەنی براکەێش، کناچەکێچ هەر دوە، وەرمەنە هۆرسێ، گرد ئامێرە وار پەی دیذارو گۆرەکە تازە بە دنیا ئاماکەی.
پێسە جوجەڵا دۆرو ئەذێشانە گلێرێ بیێ بێنێ و تەماشەو گۆرەکەکەی کەرێنێ، هەس و ئێحساسی زارۆڵانەشآ پاسە بەر گنێ، کە ئەجێ یەک نەفەر بە خانەوادەیشا زیاذ بیەن. ئا شەوە شۆقو چراو دەسیەکێ چەنی شۆقو دڵو ئاذیشا، گۆڕەکەش فرەتەر رۆشن کەردەبێ، هیچ هەدیێو دنیانە چانەیە وەشتەر نەبێ پەیشا، (ژیوای جە ئۆجو ساذەگی و فەقیریچەنە، متاوۆ ساتێ وەشێش چەنە هۆرگنا کە بە هیچ قیمەتێو و هیچ سەروەت و سامانێوی بە دەس نمێا و مەسنیا.)
پا جۆرە مایجانە و زارۆڵەکێش، ئا شەوە سەرو سەعاتێو چەنی گۆرەکەکەی بێنێ، دمایی لوێوە سەر بەڵام وەرم جە چەماشانە نەمەنە بێ، چێرو لێفەکەیچەنە، هەر باس باسو گۆرکڵەکەی بێ. سابیر کە وەڵتەر “فرۆ” گاوەکێش تام کەردەبێ، جە ئەذێش پەرساش؛ “ئەرێ ئەذا گیان کەی فرۆکەما پەی وەش کەری؟!” ئەذاش بە وەشحاڵیۆ جوابش داوە و واتش؛ “رۆڵە گیان با ئێشەو گۆرەکەکە خاس سێر بۆ چەنەش، ئیجا سەوای وەرمنە هۆرسا فرۆکەتا پەی وەش کەرو”.
وەرم جە چەما گردیەنە پڕا بێ. مایجانە ئاما بەر کە قۆتەرێو بارۆ و بنیۆش دلێ سۆبەکەی. چاوەختەنە سەرێوش کێشا ئۆ وەرهەیوانەکەی و تەماشێوو بەریش کەرد. شەوێوە سەردە بێ، هەڵای وەروە، زەمینەنە بێ بەڵام سایێقەش کەردە بێ و مانگە شەوە دنیاش رۆشن کەردە بێ. چا وەختەنە کە گەرەکش بێ داڵانەکەنە قۆتەرەکەی بارۆ سەر، تەقەو دەربازەکەی ئاما!، تۆزێو تەرسا و نەیاراش دەربازەکەی کەرۆوە!، دڵو وێشەنە واتش مشیۆ کێ بۆ پی نیمە شەوە! کە سەرەش وەنە شێویا بۆ.
ئاما سەر، جە وەرهەیوانەکەنە دیارە وار، تاپۆ چێوێویش دی، خاس سەرەنجش دا مذیۆ هەرەکەشانە، کۆپان لارا و خەریکا بە سەرە ماڵای ماڵۆ دەربازەکەیەرە.
مایجانە بە دیەی دووبارەو کۆپان لاری شاذی و شۆقێو کە جە گۆرەکەکەیش گرتە بێ، فەرامۆش کەرد، بە هیچ شێوێو حەز نەکەرێ کە جارێوتەر ئا وەزعێ ویەردەیە، پەیش گێڵۆوە دماوە.
هۆڵش دا کە وێش گێرۆ و بەرەکەی نەکەرۆوە، بەڵام تەقەو دەربازەکەی دوبارە کریاوە، ئیجارە سابیر وەختێو ئەذاش دیەش کە تۆزێو پەشۆکیێنە، ئاما بەر جە وەرهەیوانەکەنە تەماشەو واریش کەرد، بە دەنگی بەرز چڕیش ئۆ ئەذێش و واتش؛ “ئەذا گیان بیە!! کۆپان لاری ئامانۆ”!؟. گردو زارۆڵەکا وەختێو ئینەشا ئەژنەوی، چێرو لێفیەنە بەر ئامێ و چەنی سابیری بە بێ ئانەیە جە ئەذێشا پەرسو و جۆوێو کەرا ئامێرە وار.
بەرەو دەربازەکەێشا کەردۆ، کۆپان لاری ئەرامەنذە وێش کەرد دەربازەکەرە، بە حاڵ تاوێنی بژناسیشۆ، لەمەش باریکە بیێبێوە و دانە بە دانەو پەراسوەکاش ئەژمارێێنێ، سەرو مازیش یاگێ زەخمە کۆنەکا بەر کۆتێ بێنێ، سەرو سمتێش یاگێ گۆچەوەنا و نەقیزا، دیارە بێ، بە حاڵ تاوێ چەمێش هۆر بڕنۆ، برژانگێ چەرمێش تەپێ بێنێ ملو چەماشەرە، هەڵسەو چەماش سەرو قەپۆسێشەرە جوێوەشا وەشە کەردێبێ، قاچش بریندار بیەبێ و ونی تازێش چەنە لوێ، ئینە ئانەیە نیشآنە دێ کە وەختێو زارۆڵا تار نیان، یاگێوەنە کۆتەنەرە، هەم قاچش و هەم چیرو لەمێش بریندار بیەن.
زارۆڵەکا دۆر دابێ، مایجانە گیرش واردە بێ و نەزانێ چێش کەرۆ و چێش واچۆ.
کۆپان لار پا وەزعێوە نەتاوێ وێش گێرۆ سەرو پەیاوە، دۆرو وێشەنە خۆلیاوە و وتەرە. سەرەش نیا سەرو یۆ جە پلەکانەکاوە، بە حەسرەتێوۆ تەماشەو دانە بە دانەو زارۆڵەکاش کەرد، چەمێوش هۆر وس پەی لا مایجانێ بەڵام فرە زوو سەرەش هۆرگێڵناوە وەنەش، دیار بێ دڵش پەڕ بێ جە کارەساتو ٢٥ ساڵەو ژیوایش چەنی خانەوادەکەیش، هەناسێوی قوڵش هۆرکێشت و ڕازێوەش پەی زارۆڵەکا، پی جۆرە، دەس پەنە کەردە.
یۆ بێ یۆ نەبێ، بێژگەم خوای هیچ کەس نەبێ:
ساڵانێوی درێژ چێوەڵتەر، دەگێوە گۆلانێ بێ بە نامێ گۆڵ ئاوای، ئی دەگا خنجیلانێ دلێ دەشتێوێ پەڕ جە سۆزەڵانیەنە بێ، کە هەرتا چەم کار کەرێ هەر دەشتە بێ بە بێ هیچ دار و درەختێو.
خەڵکو گۆڵ ئاوای چەنی یەکتری فرە مێهرەبانێ بێنێ، فرە مێمان دۆسێ بێنێ، کار و کاسبیشا حەیوان داری و کەشاوەرزی بێ، هەر و ماهەرێ هەم جنسو من چا دەگێنە فرێ بێنێ. یانەو ئێمە دلێڕاسەو گۆڵ ئاوایەنە بی، یانێوی هەڕین بێ کە چوار پەنج هۆذێش چەنە بێنێ. من تاتەم نەذیەنم، ئەذام واچێ بە جوانی چۆذارا بەردەن، نەزانێنێ چۆذار یانی چێش! روێو پەرسام ئۆ ئەذێم، ئەرێ ئەذا گیان چۆذارێ چێشێنێ و کێنێ و چکۆوە مەیا؟!. ئەذام جە جوابەکەشەنە واتش؛ “رۆڵە گیان چۆذارێ خەڵکو ئی لاو ئۆ لایەنێ، کە جار جاریچ ڕاشآ گنۆ ئی دەگاو ئێمەیچە، کۆڕەکاما بەرا و کناچەکاما مازاوە!!.”
ئیتر من چا روۆ کە ئەذێم باسو چۆذاراش کەردە بێ، چەنەشآ تەرسێنێ. عاقیبەت ئا روە سیاوە ئاما وەرۆ. چوار پەنج نەفەرێ، هەر یۆ بە گۆچانێوۆ ئامێبێنێ پەی گۆڵ ئاوای، جل و بەرگەکەشآ چەنی خەڵکو گۆڵ ئاوای فەرق کەرێ.
ئامێ روەو یانەو ئێمە، من حەیبەتیێنە وێم دابێ پاڵو ئەذێم، خوا خوام بێ نەوینام، ئاخر من فرە زارۆڵە بێنێ، ساڵێوو چن مانگێ زیاتەرم نەبێ، هەڵای شۆتە شیرین و چەربەکەو ئەذێم، جار جار وەرێنێ، چا وەختەنە فرە کەم حەزم جە گیواو واردەی بێ. 
وەختێو ئامێ تەماشەو منشا کەرد، یۆ جە چۆذارەکا چەنی کێخوا مەحموذی ساحێبێما کۆت قسە کەردەی، دڵم کۆتەرە،! ئەذام لامەنە بێ، دەسو پاش لەرزێ.
کۆپان لار وەختو ئەوەگێڵناو ڕازەکێ چن جارێ دڵش پەڕ بی، هەناسێوش هۆرکێشا و دەسش کەردۆ بە ئەوەگێڵنای ڕازەکێ.
بەڵێ؛ کۆرپە ئازیزەکام، پا جۆرە من چۆذارا جە ئەذێم جیا کەرداوە، هەر ئا روە، وساشآ دلێ جەمێوی فرە جە هەرا.
دوێ شەوانە روێ ڕانە بێنمێ تا یاونانێشا دلێ ئی دەگاو شمە، تەنیا ئانذە رەحمشا پەنە کەردا کە ڕاکێنە سوارێم نەبیێ چونکە زانێنێ کە فرە زارۆڵەنا. پا جۆرە ژیوای تازەم چێگە، لا مامۆ بارامی تاتەیتاوە دەس پەنە کەرد، مامۆ بارام بە رەحمەت بۆ فرە عال بێ چەنیم، ویرما تا یەرێ مانگێچ کۆپانەش پەی نەوراستا، هەمیشە واچێ زارۆڵەن!، جارێو زووشا!.
وەختێو ئەوەڵ جار کۆپانەشا کەردا، تا چن روێ مازیم فرە وریێ!، فرە گۆل بێ، نەزانێنێ چێش کەرو، چا وەختۆ کە کۆپانەشآ کەردا، ئیتر خزمەتو من بە یانەو شمە دەسش پەنە کەرد، چی ماوە دوور و درێژەنە، فرە جارێ توشوو کارەساتا بیەنا، جارێوشا مڵکەنە، شەوێوە وەرگا دانێ وەنە، وەخت بێ بوەرام، ڕانێوم کەڵبەڵاشا کەرد، فرە چێوێ تەرێم وەنە قۆمیێ، چا دۆرانەنە، کە ئیسە ویرێم نیەنێ. مامۆ بارم فرە ئاگاش چەنەم بێ، تا ئیسە ویرمەنە نیا کە ئەگەر پەی یەک جاریچ بیەبۆ، بارێوی قۆرسش نیابو وەنەم، بەڵام جار جار هامسا مڵکەکێما بەرێنێم، رەحمم پەنە نەکەرێنێ، جارێوشا یۆ جە کۆڕەکا مامۆ خەفاری یارۆ بەذجنسەکەشآ مەزانو نامێش چێش بێ، بەرداش بارە هەنارێوی فرە قۆرسش نیانێ وەنە، وەختێو یاوایمێ دەرەو ویکۆڵە لاری، زاتم نەبێ دەو دلێ ئاوەکێ، پەشتیۆ لەقێوەش دانێ وەنە، کۆتانە دلێ جوەکێ، وەرێسەکێ گیریانە ملم، وەخت بێ خنیکیەو، زیاتەر جە سەعاتێوی چا دەرەنە بێنێ، تا مامۆ بارام ئاما نەجاتش دانێ. 
بەڵێ؛ ئازیزەکام، بە سەرئامێ فرێنێ کە پەیتا گێڵنوۆ، بەڵام چێوێو کە هەتا ئیسەیچ هەر وەرمش پۆ وینو، ئانەنە کە من تا ئیسە جنسی مۆخالفو ویم نەذیەنم، تا ئیسە مەزانو ماهەرە چەنینەنە سەرو شێوەش چەنینا.
ساڵێوشا قەرەچیێ ئامێبێنی پەی ئی دەگاو ئێمە، جە مڵکەکەو مامۆ خەفاریەنە بارشا وسە بێ، وەڵێ ئانەیەنە ئاذێ بارەکەیشآ وزا، من بوێوە وەشەم ئەژنەویە کە تا ئیسە تەجرەبەو ئا بوێمە نەکەردەبێ، وەڵتەر جە زارۆڵام ئەژنەویەبێ کە قەرارا قەرەچێێ بەیا و چن روێو چێگە مەناوە، بوەکێ هەرتا ئێ زیاتەر مەسم کەرێ، تا نیمەروانێو کە دۆرم چۆڵ بێ، وێم نەگرت و تەنافەکێم پڕچنا، لوانێ روەو مڵکەکەو مامۆ خەفاری، شۆنەو بوە وەشەکێرە، هەر ئانذە دنیام دی، شش نەفەرێم وەنە پێذێ بیێ، ئێنذەشا دانێ وەنە کە کۆڵەوارشا کەردا، بە بێ ئانەیە هیچم کەردەبۆ، تەنانەت جە دووریچۆ رەنگەو ماهەرەکێم نەذیە، فرە گلیێم هەنێ چی خەڵکیە، وەختێو ویرشآ کەروۆ خەریکا دڵم تەقۆوە.
کۆپان لار؛ جە ئاخرو رازەکێشەنە، گەرماو دلێ داڵانەکەی، کە دوە مانگێو بێ گەرمای چامنەشە نەذیەبێ، چەنی گلێرۆ بیەی زارۆڵەکا پاڵشەنە، کەم کەم وەرمش کۆت پۆرە، وەرمێوی فرە قۆرس، وەرمێو پەی هەمیشەی!!!!!.
مایجانە زاناش کە کۆپان لار وەرمەکەش فرە قوڵا، نەما دەسو زارۆڵەکا و بەردێشۆ سەر، سابیرش چەنی وێش ئاردەراوە وار، بەردش دلێ کاذانەکەی، خەڵوزێوش دا دەسشۆ و واتش “ئادەی کۆڕەکەم جە پاڵو ئا نەقاشیانە، تۆیچ کۆپان لاری هەر پێسە وێش سەرو ئا دیواریۆ، نەقاشی کەرە.

١٠/٨/٢٠١٨ 
یۆتۆبۆری، نویسەر حەمەرەزا بەهمەنی

ڕەزا بەهمەنی
 hewraman
  • هەڵقە دوکەڵێو!

    هەڵقە دوکەڵێو؛ ڕوٙمانێوە کوڵە بە قەڵەمو بەختیار لهونی، وەڵاو گەو هەورامانینە بواندیٛوە، حە…
  • ئه‌ڎای غیرتیە و لالۆی قه‌وم دوس

    ئه‌ڎای غیرتیە و لالۆی قه‌وم دوس داستانێوه‌ جه‌ کاکه‌ موحه‌ممه‌دغه‌ریب مه‌عازی نژادی  …
  • ویرەوەریە جە ڕۆ کۆمساو 1391 ی

    ویرەوەریە جە ڕۆ کۆمساو 1391 ی ڕوێ شۆنەو کۆنگرە تارێخیەکەو مامۆسا ئۆسمان هەورامیرە (1391 .2…
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیکوڵی:  tribulus terrestris

پیکوڵی:  tribulus terrestris پیکوڵی یام پیکوڵە، گیواوێن وەھارێنە سەوز بۆنە، سەرانسەرو دنیا…