یانە ویەردە و هەورامانی یادو پەنجاوپەنج ساڵەو  شەهیدبیەی حەمەگوڵپی 

یادو پەنجاوپەنج ساڵەو  شەهیدبیەی حەمەگوڵپی 

808

یادو پەنجاوپەنج ساڵەو  شەهیدبیەی حەمەگوڵپی 

وەرواتە :   

داستانو قارەمای پردەو زەڵمی کە ڕوٙڵەکا ئی وەڵاتیە بە ونە ویٛشا نەخشنان پەی میٛژوو نیشتگاکەیشا جە 12/8/1963 جەنگیٛ فرە گەورە ڕوەش دا پەی وەرەنگار بیەی سوپاو داگیرکەرو عراقی (حەرس قەومیەکیٛ سەرو دەسەلاتیوە بیٛنیٛ) کە 12پیٛشمەرگیٛ شەهیدیٛ بییٛ  و چنڎەها برینداریٛ، وەرەنگارییٛوە بیٛ ویٛنە جە ماوەو دوویٛ ڕوا زیاتەری  جەنگیەنە  دەشتەو  شارەزورینە، تەخت، ئینجا سوپا تاواش سەنگەرو پیشمەرگەی بڕوٙ  بە هامکاری دەبابەی و تەیارەی و چەکو تفاقی مشەمەریوە ، چیٛگەنە یاڎو ئاڕوٙیە ماریٛمەوە ویرتا کە شەهید حمەگوڵپی چەنی لەتیٛ جە پیٛشمەرگە هام سەنگەرەکاش  بەشیٛویٛ ئازایانە  (ئەفسانەیی) گیانو ویشا کەرد  قوربانە وەلاتەکەیشا .

هەرپاسە یاڎو سپڵەیی و بیٛ وەفایی شوٙڕشی و کوردایەتیچ  مارمێوەیاڎتا هەکە  ونەو ئی گردە خەڵکیە بە مفتە لوا و مجیا  بیٛ ئانەیە  بزانا پەی چیٛشی و ڕاو چیٛشینە  ونی و گیانشا بەخشان ، ئاڎیٛ پەی ئازادی و عەدالەتی  ویٛسەری و ویٛبەردەی ڕاوە ونیشا دا ، نەزاناشا بەرهەموو قوربانیشا بوٙ بە بایسو ویٛ دوٙڵەمەند کەردەی و دزی تاڵانی ویٛورەشی و خیانەت جە ونەو شەهیدا .

ئارۆ کوردەساننە  ئانە وزیا بۆ پەشتەو کەنوٙڵا کەسوکارو شەهیدان ، چون نەزاناشا چەنی وەڵاتی بەراڕاوە کارو باریش ڕیٛک وزاوە ، هەتا سەوای کەمو کوڵیەکاو کورداایەتی بواچمیٛ هەڵای مەتەمامیا ، وەرو ئانەی چیٛگەنە مازمیٛشا دمایی و ملمیٛوە سەرو مەتڵەبەکەیما .

دریٛژە: 

پایزو سالە و 1961  کە شوٙڕش و گەلوکوردی (ئەیلول)  هوٙرگیسیا، هەورامان بی بەیاگیٛ  سەرهوٙردای  پیٛشمەرگەی، ئەوەڵجار  خەڵک نەزانیٛ پیٛشمەرگە یانی چیش پەنەشا واچیٛنیٛ چەتیٛ،چونکە پیٛشمەرگەو شوٙڕش  هەڵای نەتاوابیٛشا بە تەمامی بەیا دلیٛ خەڵکی و مەرام و بەرنامەو شوٙڕشی وەلا کەراوە ،ڕەنگە سالیٛ زیاتەرش پەنە شیەبوٙ تا تاواشا نامیٛ چەتەی سەرو زوانو خەڵکیوە لابەرا و نامیٛ پیروٙزەو پیشمەرگەی وزا سەرو زوان و گەورەو گولانەی  ،دمای ئی  هەنگامیٛ شوٙڕش پیٛوستش بە یاگیٛ و ئیسراحەتی  و دام و دەزگای  بیٛ ،یانی ئەشیا  ناوچەی ڕزگار کریاشا بییٛ کە دور بییٛ جە دەسەلاتو حکومەتی ناوەندی.

هەورامان  بەشو باشوری  چنڎ  مەخفەریٛ یان پوٙلیس خانیٛش جەنە بیٛنیٛ  پەی پاریزنای  سنوری و ئەمن وئاسایشو خەڵکی(  جە تەویٛلیٛ-سوٙسەکانە-بیاریٛ –خورماڵ)…شوٙڕش و پیٛشمەرگە بەرنامەشا بیٛ کە مشوٙ ئی بنکەو پوٙلیسا دەس گیٛڕا سەرەرە،هەم پەی دەسکەوتەی  چەک و تفاق و جەنگی هەم پەی دروسکەردەی  ناوچەی ئازادکریای ومەرزنایرەی دام ودەزگاکا شوٙڕشی .

ئەوەڵجار  تاواشا  بنکەو پوٙلیس و سنوری جە سوٙسەکانە گیٛرا،ئادیچ دماو چن جاریٛ  پەلاماردای  و بە نائومیٛدی گیٛلایوٙ،دماتەر تاواشا جەراو  ڕیکوستەی چن کەسیٛ دلیٛ مەخفەرەکەیەنە ( حمەگوڵپی و ماموٙکەریم هاواری،،،،،) ئتر هوتەرێوەنە پەی سەرو پوٙلیسو مەخفەرو سوسەکانیٛ  دریا دەسۆ ، پوٙلیسخانە کەوت چیٛرو دەسو پیٛشمەرگەی زیاتەر جە 36 پارچە جەکیٛ دەسکەوتیٛ ،چەنی ئازوقێوە مشەمەری  پەی پیٛشمەرگەی،گیریای مەخفەرو سوٙسەکانیٛ جە بنەڕاو پایزو سالە و 1962 بیٛ ، دماو ماویٛ کوڵی  پوٙلیس خانەو  تەویٛڵیٛ گیریا،ئیجا ئامیٛ پوٙلیسخانەو  بیاریٛ،دماتەر پیٛشمەرگەو بەرگری میللی  تاواشا  پوٙلیسخانەو خورمالیٛ گیٛرا،ئیتر پی جوٙرە  فرەو پوٙلیسخانەکا  سنوری تا پیٛنجویٛنە دریای دەسوٙ.

شەهید حمەگوڵپی جەپایزو سالە  و 1962  بیەن بەپیٛشمەرگە. دماو ئانەی مەخفەرو سوسەکانی بە نونگەو هامکاری  حمەگوڵپی و ماموٙ کەریم هاواری  دریا دەسۆ ،  چونکاتەی وەڵتەر چنڎ جارێوە پیٛشمەرگە پەلامارو مەخفەرەکەیشا دابیٛ  ، دردواردە نەبیەبیٛ ، فکرشا کەردەبێوە کە دوٙسێ و هامکارێوە بنیاوە قننیٛ دلیٛ مەخفەرینە ، ئتر ڕاو  حاجی ئەولەیوە حمە گولپی و ماموٙ کەریم پەیوەندی کەرا پارتیوە ، بە نەخشێوە دیاری کریا مەخفەرو سوسەکانیٛ  تەسلیم کەرا  وەختێوە پەلامارەش مڎا .

شارو هەلەبجەی پیٛسە ناوەندو حکومەتی مەنەبیٛ ئننا گردو ناوچەکا چیٛرو دەسەلاتو پیشمەرگەیەنە بیٛ (شارەزورو و هەورامان)،دلیٛ هەلەبجەی  تەنیا جادە  گردینیەکیٛ دەسو حکومەتیوە بیٛنیٛ  ئینا دلیٛ گەڕەکەکا  دەس و پیٛشمەرگەیوٙ بیەن .

بنەڕاو ساڵەو 1963  وەزعەو حکومەتی فرە گولە بیٛ ئەگەر پیسە بەردەوام بییٛ  ئەشیا هەلەبجە و گردو ناوچەکا تەریش چوٙڵکەردیٛ و لویٛوە پەی دلیٛ  ناوەند و پاریٛزگاو سلیٛمانی ، بەلام ئانە کە خەڵك و شوٙڕش چەم راش بیٛنی  پاسە نەبیٛ،

چی سالەنە  مانگەو شوباتو  2/1963 بە کودەتاییٛوە حەرس قەومیەکیٛ ئامیٛ سەرو تەختو حوکمرانی عراقی ،زاناشا کە کورد خەریکا  سەرەش بەرزکەردەنوٙ و هەواو ئازادی ورلوشوٙ،بەرنامە وجەنگیشا متەرە  تاکو  شوٙڕش و پیٛشمەرگەی سەرکوت کەرانیٛ ،پی جوٙرە یەک لیوای تایبەت شا نیارە پەی پەلاماردای کوردسانی بە نامیٛ لیوا 20  کە بە چەک و تفاقی تازەو جەنگی پوٙشتەشا کەرد(کڵاشینکوٙفەی روسیەی تایبەتە..دەبابە،،توٙپە،،فڕوٙکە،،،هتد) فەرماندەکەش بەنامیٛ زەعیم سدیقی ،کەسیٛ نەتەوەپەرست و شوٙڤیٛنی بیٛ .

 جەکەرکوکۆ بەرنامەو پەلاماردای کوردسانیشا دا پەی پاریٛزگا و سلیٛمانی مانگەو  ششی( حوزەیران) ئامیٛ دلیٛ سلیٛمانی کوشتاریٛ دەسە جەمیشا کەرد وەردەمو سەراو سلیٛمانینە ،دماو سلیٛمانی ، مانگە حەوتی کەوتیٛ را پەی ناوچەو دەربەندیخانی ، ڕارە هەرچی دەگا بیٛ دیٛنیٛش وەرو توٙپاوە کە سەدان کەسیٛ بیٛ تاوانیٛ کوشییٛ،وە چنڎ دەگیٛوەشا نزیک و جادەی تەخت کەردیٛ( دەگاو قەرتوٙخان ی نزیک و سەیتەرەکەو سلیٛمانی) دماتەر یاویٛ لا و دەگاو  سیارە(سیٛدارە)  نزیکو دەربەندی خانی ، چیٛ دەگیٛنە نزیکو جادەیوٙ  32 کەسیٛسا گرتیٛ  گولە وارانیٛشا کەردیٛ و  شەهیدیٛ بییٛ، دەربەندیخانیچ گیریا.

ئیتر مانگە وهەشتی(8/1963) ڕوەشا کەردە شارەزورو هەلەبجە و هەورامانی  بەسەرداری ”  زەعیم سدیقی”  (دمایچ بەرکەوت کە نزار خەزرەجی  و تارق هاشمی  تازە ئەفسەریٛ پلەیەکیٛ بینیٛ چی لیواینە).

سوپاو عراقی ئامیٛ سەیسادەق  سەربازگێوە گەورەشا نیارە، ئیتر چیٛگوٙ پلانو جەنگی مجیٛنیٛرە ، وەختەکاریٛ پیٛشمەرگەو شوٙڕش زاناشا پەلامارە دریوٙ جەلاو سوپایۆ ،ئاڎیچی بەرنامەو وەرگیٛرتەو وەرگیریشا متەرە، خاسترین یاگیٛ  لاشاوە   پردەو زەڵمی بیٛ، چونکە هەم پردەبیٛ هەم  دەرەو ئاو تەڕایی و شەخەڵو دارو درەخت بیٛ ،وەڵینەو پلانەکیٛو پیشمەرگەی ، هورستیٛ بە کەندەی چنڎ  خەندەقیٛ قوڵی و پانی کە دەبابەشگنوٙنە و بەرنیٛوە ،ئیجا ئاویش ئاژینە کەریٛنیٛ تاکو بوٙ بە هەڕو لیتە  و دەبابە و ماشیٛنە سەربازیەکیٛ چەقا دلیٛ هەڕیٛنە ،هەرپاسە فرەو دەشتەکیٛ  ئاویشا ئاژینە کەردیٛ بیٛ بە مەسافیٛ فراوان ، تەنیا بەمەبەستو  لەمپەر وستەی وەرو ئامای  جەیشی

ڕوٙ  12/8/1963 جەیش و جاش جە سەیدسادەقوٙ سەحبیٛ زوو جمیٛرە ئامیٛ پردەو زەڵمی، چیٛگەنە توشو  وەرەنگاری پیٛشمەرگەی بییٛوە، دویٛ رویٛ زیاتەر جەنگ بی. ڕوٙی یەکەم  بە نزیکە و دە دەباباوە پەلامارش دا و ڕووبەڕو  وەرپەرچدایوٙ بەقوەتی بی جەلاو پیٛشمەرگەیوٙ، ئاسمانیچوٙ  تەیاریٛ  بوٙمواران کەریٛنیٛ ، چیٛگەنە مشوٙ ئیشارە دەیمیٛ بە  ورەو دڵسوٙزی پیٛشمەرگەی  کە دەشتیٛ  سارانە  سەنگەر دەی وەنە و وەرانوەرو دوژمنێ بەقوەتی مدری ، پیٛشمەرگە بە چەکی فرە سادەو کوٙن،دوژمن بە دەبابەو تەیارەو چەکی تازە ، ئەگەرباوەر و  وەشەیسی خاک  و وەلاتی نەبوٙ کیٛ تاووٙ چیٛگەنە جەنگ کەروٙ، چەکو پیٛشمەرگەی تەنیا  ( پەنج تیر .وەرندڵ.تاپڕ.هوٙڵەندە..بڕنەو تازە پەیدا بیەبیٛ…. ئا وەرۆکە  جەنگیە تەنیا یەک ڕشاشی بریٛنش بیٛ سەرو تەپ و “گردی گوٙ ” یوٙ تەقە کەریٛ ئەو دەبابەی و  عەسکەری) ، سەنگەرو پیٛشمەرگەی ئیدیمو ئەودیموجادە وپردەو زەڵمی  دریا بیٛ وەنە ، جەنگی گەرم و دەسەویەخە دروٙس بی، یوەم روٙ تا ویٛرەگا دماو عەسسری جەنگ بەردوام بی  دوژمن نەتاوش سەنگەر و پیٛشمەرگی بڕوٙ،ئادیچ بەهوٙ و وەرپەرچو سەختو دڵسوٙزەکا نیشتگایوە .

 ڕوٙی دووەم چەنی بۆمواران و تەیارەی پەلامارەشا داوە ، ئیجار دویٛ کەسیٛ قارەمانیٛ شەهیدیٛ بییٛ،یوٙ جەشەهیدەکا   حمەگوڵپی  بیٛ کە بەشیٛویٛ  ئازایانە  شەهید بی، دماو ئانەی تا دما فیشەک جەنگ کەروٙ  و سەنگەرەکەو ویٛش وەرنمەدوٙ،دەبابیٛ میٛ نزیکش گنوٙوە خەریکا شیٛلوٙش،ئادیچ مەردانە ملوٙ سەرو دەبابەی و بەخەنجەرکیش  عەدەد دوٙشکەو دەبابەکەی ماروٙرە وار بە خەنجەریٛ شیش کەرۆوە .ئیتر  دماوە  دەبابیٛتەر بەفیشەک دوٙشکیٛ حمەگوڵپی پیٛکوٙ و شەهید بوٙ .

هورکوای سەرو دەبابەی بەخەنجەرۆ بوٙ بە بایسو پاگیرە و سەرسامی ئا سوپایە ،کە تائیسە جە میٛژونە چیوی چینەشا وەرچەم نەکەوتەن و نەژنیەن ، پوٙکەی سوپا فەرمان و کیٛشیایوٙ مدوٙ .ویٛرگا دیٛریٛ گیٛلو پەی سەیدسادەقی  و شوٙنەو ویٛشارە حمەگوڵپی بەسا دەبابیٛوەرەو کیٛشاش تا دلیٛ بازارو سەیدسادقی ،جاگە فڕەش مدا  و سوکایەتی بە لاشەی بیٛگیانیش کەرا چن رویٛ دلیٛ جادەکەینە مازاشوٙ تاکو خەڵک چەم تەرس بوٙ ، یام بزانا کیٛ پەنەش ناوەشا گیٛراش بەتوٙمەتو لایەنگری شوٙڕشی .

دماو چن ڕویٛ  ماموٙسا مەلا ساڵح شارەزوری و کەسایەتی و پیا ماقولیٛ ملا تەکلیف کەرا ئەو  ئامر لیواکەی و کە گوناحا مەردە پی جوٙرە سەرو جادەیوٙ فڕي دریوٙ، عورفو عادەتو ئاین ڕامەڎو پینەیە ،داواکیٛشا قبولەکەراو  خەڵکەکە لاشەو حمەگوڵپی جە قەبرسان و سەیسادەقی بەئامانەت ئەسپەردەو خاکیش کەرا  بەجلو بەرگو  ویٛشوٙ ، دماو زیاتەر جە یەریٛ مانگا  تەرمو شەهید حمەگوڵپی جە سەیدسادەق ماراوە پەی دەگاو گوڵپی و  چاگە دوبارە ئەسپەردەش کەراوە،هەڵبەت جە کوٙتاو ساڵەو 1963  یٛنە شوٙڕش  هودنەش (مدرای تەقەی بەنیازو گفتوگوٙی) چەنی حکومەتی  بیٛ.

ڕوٙی دماین هەمدیسان جەیش وجاش بە پشتیوانی زیاتەر جە 35 دەبابە و بوٙموارانی ئاسمانی جەلاو باڵە پڕەکاوە  پەلامارەشا ئاردیٛنوٙ پەی پردەو زەلـمی ، جەنگی دەسەو یەخە بیەن ، ئیجار دە پیٛشمەرگیٛ تەر ویشا کەرا قوربانی پەی ئازادی خاکیشا،  سەرەڕاو دەیان بریندارا ، تاویٛڕگا جەنگ بوٙ ، پی جوٙرە پیٛشمەرگە  کیٛشیوٙوە  بەهوٙو کەمی فیشەکو ئازوقەی جەنگیوە و کەمی پشتیوانی مەیدانی و ،،،،،هتد

جەنگ و پردەو زەلـمی 12 پیٛشمەرگیٛ شەهید بییٛ،،چنڎ برینداریٛ، ئی داستانە قارەمانیە کە ڕوٙڵەکا ئی نیشتگایە  کەرد  تائیسا  دەنگدایوەش دلیٛ خەڵک و ناوچەکەینە هەنو  بە داستانیٛ ئازایانەی فرە گرنگ وەسفش کەرا،بەلام بەداخەوە تاکو ئیسا هەلای حکومەت و پارتی پیٛسە حزبی  نەتاوانش پیٛسە پەنەوازی ڕیزو هوٙرسەنگنایش پەی کەرا، ئەشیا ئیسە ئی داستانە کریابیٛ بە چنڎ ڕاز و فلیم ، کە ئازایەتی و نەبەردی  ڕوٙڵەکا  بەروزوٙ پەی گیان بەخت کەردەی راو نیٛشتمانیرە .

جاش و جەیش ملش نیا ڕوەو هە‌لەبجەی، سەرەمڕە  توٙپ وارانو دەگاکا  سەرو ڕیٛش کەریٛ،یاوا هەلەبجە ، دماو هەلەبجەی  ڕوەش نیا ئەو هەورامانی یاوا پیٛچەکا وەرو بیاریٛ، چاگەنە  سەرەش تەقیا ئەو وەرپەرچو پیٛشمەرگەی ..دەبابیوەش پیٛکیاو تلبیوٙ دلیٛ باخەکا، ئیتر ناچار بە کیٛشیایوٙ کریا  و گیٛلاوە دما ، یانی ناوچەو هەورامانی  نەگیریاوە  بەلام  سەرە مڕە  چیٛرو ڕەحمو توٙپ و تەیارەینە بیٛ، چنڎەها خەڵک و  ئاژەڵ بە بوٙموارانو تەیارەی کوشیا چا وەختەنە .

شەهید بیەی حمەگوڵپی پیٛ شیوە چەنی ڕەفیٛقەکاش تەرسو  سامیٛش نیابیٛ دلیٛ دلو داگیرکەری هەرپاسە دلیٛ خەڵکو ناوچەکەیەن دەنگش دابیٛ ئی قارەمانیە هەتا ئیسەیچ دەماودەم  گیٛڵناشوٙ پەی نەوەکا دمای ویٛشا،

وەختیٛ حمەگوڵپی شەهید بی  چوار کوڕیٛ ش پەی گەلو نیشتمانی جیا ئاستیٛ بەنامەکا(  فایق-نامق-تارق-ناجح ) کورەکیٛش گەوریٛ بییٛ و هەردەم  خزمەتو گەل و نیشتمانینە بییٛنیٛ وانایشا تەمامنا ،دریخیشا نەکردەن جە وندای پەی نیشتمانی و هەرپاسە بنەماڵکەیچش..

ساڵەو1977   بڕیٛوەش بە نامیٛ ئەسکەندەر ئەحمەد ی  جە زیندان و  موسڵ ی جە سیٛدارە دریا  سەرو کوردایەتی

سالەو 1981  کوڕیش   پیٛشمەرگە بیٛ  شەهید بیٛ جە ئەنجام و  چەنگ و ناڕەواو  کورسی دەسەلاتو حزبەکا کوردەسانی( جەنگی براکوشی ) .

سالە و 16/3/1988 ی  خیٛزان و حمەگوڵپی بەنامیٛ (حفصە سەلیم حمەمین) چەنی کوڕیٛ حمەگوڵپی  و زاڕوٙڵەکاش  بەنامیٛ  ( تارق محمد ئەحمەد چنی هامسەرەکیٛش و زاڕوٙڵیٛوەش ) بە کیمیاواران و هەڵبجەی شەهیدیٛ بییٛ .

 بنەماڵەکەش  حەوت شەهیدیٛ پلەیەکیٛش دیٛنیٛ پەی کوردسانی،چەنی چنڎەها شەهیدیٛ تەریٛ  برازاو مەتیەزاو،،،هتد

کورەکیٛ تەریٛش( دکتر فایق- دکتر ناجح)  جە شوٙڕش و تازە و گەلو کوردی  دمای تەما م کەردەی وانای لویٛنیٛ ڕیزو پیٛشمەرگەی  و تائیسەیج ئینیٛ خزمەتو  میللەتینە  بیٛ ئانەی گولانە تەرین خاڵە جەناپاکی نەتەوەیی یان گەندەڵی  کەرانە دژو خاک و میللەتی .

خاڵیٛوە یاگیٛ سەرنجێنە ، چاوەختۆن ئی شوڕشە بەنامیٛ کوردایەتیوە دروس بیەن ، جاشایەتی و ویٛ ورەشی دلێ بڕێ تەری جە میللەتو کوردینە سەرەمڕە بیەن ، سەرت سڕ مەنوٙ ئیسە ئا ویٛ ورەشیٛ ئینای وەرۆ ، دەیان پیٛشمەرگیٛشا کوشتیٛنیٛ و ویژدانو ویٛشا ورەتەن ، کەچی سەرکردایەتی کوردی ماچوٙ ئینە ڕیٛکوزییٛ ویٛما بینیٛ ، بە کوڕیٛ ویٛشا ئەژمار مکەرانە .

سەرتە سڕنەمەنوٙ ، ویٛورەتەی و خیانەت وناپاکی  سەردەمو مادەکاوە بیەن دلیٛ کوردینە ، هەتا یاوا سەردەمو ساسانیەکا ، بڕێ جە خیٛڵە کوردەکا کەوتیٛ وەلیٛ سوپاو ئیسلامی پەی ڕا نیشاندای و هیٛرش کەردەی سوپاو ئیسلامی دژو ساسانیەکا ، چاگەیچوٙ ناپاکی هەر دریٛژەش کیٛشان تا یاوان دلیٛ میرنیشینەکاو کوردی ، سوران و بابان و  هەتا یاوان بە شوٙڕشی تازەو کوردی و ئیسەتیچش سەربوٙ .…..

ساییٛ سەرو کوردایەتیوە هەورامان قوربانی فرەش دان ، هەر جە بنەیانەو ئیٛمەو گیٛرەش هاتا سەدان بنەیانیٛ تەر هەنیٛ ، وەلێ داخەم مەشۆ پیٛسە بۆ ئاسنی سەردما کوابوٙ ، هەرچیما کەردەن وای بەردەن ، ئاوات وازمیٛ وەشڵەی دووچەرخەو ویەرینی گیٛڵوٙوە دماوە ، هەتا هەرچیما کەردەن پسەڕمیٛشۆ .

 چی یادەوەرینە سڵام کیانمیٛ پەی گیانو شەهید حمە گوڵپی و گردو شەهیدا پردەو زەڵمی .

                     

                                                                                                            د.ناجح حمەگوڵپی

                                                                                                       11/8/2018  هەڵەبجە

 

تاقمیٛ جە پیٛشمەرگەی 5/4/1963 ویٛنەکە گیریان

 

 hewraman
Load More In ویەردە و هەورامانی

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…