یانە ئەدەب و هونەر بڵێسە سەرکێشەکێ ژیوای

بڵێسە سەرکێشەکێ ژیوای

126

بڵێسە سەرکێشەکێ ژیوای

دڵم گیریابێ و خەریکەو هەرماناو دلێ یانەی بێنێ، یاگەوبانەکەم جەم کەرد٘. جلەکێشا یانەکەنە پژگیای بێنێ، جارێو پانتۆڵێ کوڕەکەیم کە پەشتەو هەر بەرێوی هێتێوشا بێنێ و ڕێکوو قولەکاش نیشتێبێنێرە زەمین و خوای خوێنێم پەنە،جەمێم کەرد٘ێ و بە بۆڵە بۆڵ نیەیمەو یاگێ وێشا !
ئی کار و بارە تێکراریە فرەتەر دڵم گێرێ و تووڕێم کەرێ!
یانەکەم گزی دا و وەڵاتم دەسماڵ کێشا و کەوتانی قۆری و پیاڵە شتەی.
ئێتر حاڵم جە دڵگیری بەر شیە بێ و یاوابێ کوت شای!
ئاوەکێم پەڕوو شێرەکەی وەرە دای بێ و تن تن دەسێ دێنێ دلێ پیاڵەکارە و ئاویشا کێشێنێ و بە خەرەزەو پاسە نیێنێشاوە لاو یۆی دەنگێشا بەر ئەینێ. تەنانەت یۆیچشا ماڕام!
ئەجێم فرەتەر تەقە کەرا خاستەرە بوو! وەختێو گنێنێوە ویروو قسێ ڕەفێقەکام، پژگە پژگم فرەتەر بێ و بە بۆڵە بۆڵێو چێروو لچانە دژمانی دێنێ وێم و ئا شەوێ منش چەنە بیێنا !
ئاخر ئاد٘ێ نە جە من زریفتەرێ بێنێ و نە وەش سەلێقەتەرێ بێنێ و نە پێسەو من هەرمانە کەرێنێ! چی مشیۆم شوەکێ ئاد٘یشا پاسە بەیا دەورشارە و تارێفێشا دا و گرد٘ ساڵێو ڕۆ جە ئەد٘ا بیەیشا و ساڵ یاد٘وو زەماونێشا،بەراشا ئاتلیە و وێنێ گێرا یا بەراشا گێڵای یا چێوێ خاسە خاسێشا پەی بسانا! و ئا وەختە منی کۆس کەوتێ مشیۆم کەسیچ نەبۆ ویرشەنە ئارۆ،ڕۆ جە ئەد٘ا بیەیما؟!
چی ویرانە بێنێ زەنگەو بەرەی ئاما. شێروو ئاوەکێم گێرتەو و دیانی وێمەرە، فیسیەی بێنێ ئەجێ قاڵیێم شتێنێ!
ئایفونەکەم هۆرگێرت و واتم: بەڵێ …!
ئەد٘ام بێ. بەرەکەم پەی کەردەو و ئاما سەر.
هەر چەمش کەوت من زاناش ئاد٘ە نیەنا. واتم:سڵام خێر بەی ئەد٘ا گیان.
بە دەنگێوی هەناسە بڕ بیە واتش:سڵام گیان،خاسەنی؟ ڕۆڵە دەی خۆ پلەکانەکێ یۆی موکشا.!
منیچ کە شونەو چێوێویەرە بێنێ درێژە دەو بە بۆڵە بۆڵەکەیم و ئیسە بەهانێوە خاسەم کەوتێبێ دەس و واتم:ئەرێ وەڵڵا خوۮای بڕیێ ئینامێ ئاسمانەو، دوێ پلەکانێ تەرما بیێنێ ئیسە سەرەما دلێ هەورانە بێ!! ئیجا یۆ چەنی نەپرووکیۆ؟ زەنگۆڵێما وشکێ بیێنێوە.
ئەد٘ام دیش مەبڕووشەو واتش:هیچ نیا ڕۆڵە شمە جوانێندێ ولوا سەروو موبڵەکاوە نیشتەرە.
منیچ لێوانێو ئاوێم پەی ئاورد٘ە و سەماوەرەکێم گیسنانە.دیام پۆرە و واتش:چێشتا چێ هۆر ئاماینی؟چی پاسە وێت تەڕ کەرد٘ەن؟!
هەر ئاد٘ە ئانەش وات پڵمەو گرەوەی گێرتا و هەرچی دڵمەنە بێ دام بەر.ئەد٘ام دوێ یەرێ گوڵمێ ئاویش وارد٘ە و واتش:ڕۆڵە گیان بۆ بنیشەرە چێوێ مەتاشە پەی وێت و ژیوایت.
شوکر پەی خوۮای وەسێ نیا دەسینە و چەمینە و ساقەنی.شوێوی ئارام و زارۆڵێوی ساقت هەن! ئی قسێ چێشێنێ؟! ئاتلیە چێشا و گێڵای چ وەختێ؟! پی ئانوو مەدرەسەینە!
کادۆ چێشا ڕۆڵە؟ خۆ تۆ لا وێشەو دانشگا لواینی و ژیرەنی!
دەی هۆرزە ئا دەسووپلیتە شۆرە و نان و چاشتێوی عال وەش کەرە و وێت ڕازنەو تا بەیاوە و پێوەرە بە دڵوەشی نانێو بوەردێ و لویدێ چا باڵکونە بەرزە و وەشەتانە بە مۆبایلەکاتا دوێ وێنێ گێردێ، ئینە وەشی و ئینە ئاتلیە!! شۆنیچشەرە وەختتا بی ملدێ بەر دەورێو مۮەیدێوە.ئیجا بزانە پاسە وەشت پەنە ویەرۆ یا دەی پێوەرە و لا لووتە بی تا ئی ڕوە وەشەتە تەمامیۆ؟
وەختێو وێت هەر جە ئەوەڵوو ڕۆیەو ژیوایت تاڵت کەرد٘ەن و ڕۆکەت خرابنان، ماتڵەنی یۆتەربەی و وەشش کەرۆ پەیت؟
هۆرزە ئی کارا ماچوو کەرەشا ئیجا بزانە گرد ٘ساڵێو ڕەفێقەکێت و شوێ ڕەفێقەکات متاوا پێسەو شمە بێدەنگ و وەنگ وەششا بۆ؟
ڕۆڵە وەسێ نیا شمە مزاندێ چ ڕوێو جە ئەد٘ایتا بیێندێ! دەی خۆ من سجیلەکەم چنی برا گەورەکەیم گیریان و هەر مەزانوو چە ساڵێو چ فەسڵێو و چ ڕوێوەنە جە ئەد٘ایم بێینا !! تا لانی کەم منیچ تاوابیێم ئا ڕۆیە پەی وێم و زارۆڵەکام وەشتەر ڕازنایاوە.هەر پاسە کە ئەد٘ام قسێ کەرێ کەوتا ویروو دەرسەکاو ڕەوان ئەژناسیما کە دماو چن ساڵێ دەرس وانای و مەدرەک گێرتەی و هەرا و بەزمی ئی قساو ئەد٘ایمە کەرێنێ،ئیجا بە زوانێوی سەختەر و ئیسە ئەد٘ام بە زوانێوی ڕەحەتەر واتێشەو پەیم! کە پاسنەن ئینە منەنا متاڤوو کارێو کەروو یا ویرێو کەروە کە وەشم بۆ یام نا!
دەنگێ ئەد٘ایم ئەجێ ئاویەنە کریۆ ملوو ئایریەرە و ئا بڵێسە سەرکێشاشە کوشنۆوە و مرکنۆشارە و کەرۆشا بووڵە تا وەختێو ڤا گنۆ بەرۆشا و هیچشا چەنە نەمەنۆ و ئەگەر یۆی نەد٘یێبا نەزانۆ هەر بیێنێ …!

شەهلا فەتحی

 hewraman
  • هەڵقە دوکەڵێو!

    هەڵقە دوکەڵێو؛ ڕوٙمانێوە کوڵە بە قەڵەمو بەختیار لهونی، وەڵاو گەو هەورامانینە بواندیٛوە، حە…
  • ئه‌ڎای غیرتیە و لالۆی قه‌وم دوس

    ئه‌ڎای غیرتیە و لالۆی قه‌وم دوس داستانێوه‌ جه‌ کاکه‌ موحه‌ممه‌دغه‌ریب مه‌عازی نژادی  …
  • ویرەوەریە جە ڕۆ کۆمساو 1391 ی

    ویرەوەریە جە ڕۆ کۆمساو 1391 ی ڕوێ شۆنەو کۆنگرە تارێخیەکەو مامۆسا ئۆسمان هەورامیرە (1391 .2…
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیکوڵی:  tribulus terrestris

پیکوڵی:  tribulus terrestris پیکوڵی یام پیکوڵە، گیواوێن وەھارێنە سەوز بۆنە، سەرانسەرو دنیا…