یانە ئەدەب و هونەر گه‌ردە لوول

گه‌ردە لوول

89

گه‌ردە لوول

فەریبا ئێسماعیلی

وه‌یوی تن که‌وت، تۆزێ فرێش هۆرکه‌رده‌ وه‌ڵات بی ته‌پ و تۆز،ئاسمان لێڵ بیه‌بێ، هه‌ورێ پڕه‌ی دلێ ئاسمانی،ڕۆجیار داش پێوه‌ره‌ و وه‌ڵاتوو ته‌م و تۆزێش ئاس جیا،هه‌رچی دار و دره‌خت و گوڵ بێ ئامابێنه‌ له‌رزه‌،وله‌ زه‌ریفه‌کێ به‌ هه‌زار ڕه‌نگه‌ وای به‌ردێ ،هانه‌چه‌مه‌کێ په‌ڕێ بیێ جه‌ خاک و تۆز، وه‌ختێ ئی تۆزێ ئاما،ئانه‌ زه‌ریفی بێ دلێشه‌نه‌ نقم بی، تا وا چه‌م کار که‌رێ تۆزه‌بی و تۆزه‌ ، ئینه‌ نیشانێوه‌ وه‌شه‌ نه‌بێ.
هه‌رخه‌ڵک بێ جه‌ ئامای گه‌رده‌لوولێ ڕه‌مه‌ی ڕه‌مێ یا وێش شارێوه‌،هه‌ر ئه‌ذا بێ نه‌مێ ده‌سوو زارۆڵه‌که‌یش و ئڕفانێش،هه‌ر تاته‌ بێ به‌ره‌ قه‌یم که‌رێ، وه‌ڵاته‌که‌ما ده‌سوو گه‌رده‌لوولێ چۆڵی ئەرمانێ ، که‌س نه‌زانێ ئی گه‌رده‌لوولێ پی ئاسمانی سافه‌وه‌ چه‌نی ئاما و دنیاش تاریک که‌رد.
ته‌رسێوه‌ گه‌ورێ نیشته‌نه‌ شانێم و پێسه‌و هه‌ره‌سێ گرذوو لاشه‌یش گێرتاره‌ ،  ده‌لاقه‌م لاتره‌ک که‌رد سه‌ره‌م نامناره‌ تا هه‌وه‌یو بوه‌روو و حاڵم به‌یوه‌ یاگێ، بێ خه‌به‌ر چانه‌یه‌ تاڵیو جه‌ زڵفه‌کام پیچیان له‌ولاوو ده‌لاقه‌که‌ی! ده‌نگه‌ده‌نگێو ئاما گۆشێم،دیانێ واری چیروو سووره‌چناروو وه‌رو ده‌لاقه‌که‌یما دوێ نه‌فه‌رێ قسێ که‌رێنێ،یۆشا ڕیش چه‌رمه‌ و ئه‌ویچشا جوانێوی باڵابه‌رزپاڵشا دابێ سووره‌چناره‌که‌یه‌وه‌.
ڕیش چه‌ره‌مکه‌ ماچۆ:
گه‌رده‌لووله‌کێ چنی وێش خاک و تۆزێوه‌ی فرێش ئاردێنه‌ هۆرزه‌ ڕۆڵه‌ لوه‌ نه‌وه‌ش گنێ.
– من زووته‌ر چینه‌یه‌ نه‌وه‌ش که‌وته‌نا ، با لا بازوه‌ره‌ پی گه‌رده‌لوولێ.
ڕیش چه‌رمه‌ له‌یوش که‌رده‌وه‌ لاو جوانه‌که‌ی به‌ هه‌روێ چه‌می ته‌ماشه‌ش که‌رد:
-ڕه‌نگ و ڕۆخسارت وێش هاوار که‌رۆ فره‌ زه‌رذ و بی ده‌ماخه‌نی.
جوانه‌که‌ ملێوش لار که‌رذه‌وه‌:
– به‌ ڕاس؟هه‌ر په‌ی مه‌رذه‌ی خاسه‌نا؟
– خاکیچ حه‌ز به‌ پیس بیه‌ی مه‌که‌رۆ ، چی قسانه‌ بێنی جوانێوی چۆارشانە ئاما فۆکله‌کێش پێسه‌ ڤه‌رڤه‌و وه‌هاری وه‌ره‌تاوی ده‌یبۆ ونه‌ و زریوه‌زریو که‌رێنێ ، چۆخ و ڕانکێوی زه‌ریفش که‌رده‌بێنیه‌ چنی شالێوی سیاوی گوڵ گولێ ،  یێخۆ گجیه‌که‌یش ڕه‌پ مدره‌ی بێ فره‌ وه‌شش گنێ،دڵم ته‌پێوی تننش که‌رذ.

ڕیش چه‌رمه‌:
– پاسه‌ دیارا تۆ جه‌ گه‌رده‌لوولێ ته‌رسیت نیه‌نه‌؟
– زوو گه‌رده‌لوولم ئەژناسان،حه‌ر فره‌ زوو !دلێ کتیبه‌کانه‌ وانته‌نمه‌وه‌ و ڕاو چاو ئی مسیبه‌تیچه‌ مزانو و هه‌راسێویچ نیاچنه‌ش!
-دیارا ڕۆڵه‌و هه‌ورامانیه‌نی،سه‌رم به‌ سه‌رگه‌ردت چوارشانه‌گیان.
چه‌مێویچش وست په‌ی بێ ده‌ماخی:
– چی تۆ کتیبت نه‌وانته‌نه‌وه‌ تا بزانی رۆڵه‌و هه‌ورامانی مشیۆ جه‌ گه‌رده‌لوولی دووری که‌رۆ؟!
– من نه‌زانێنی گه‌رده‌لوول پێسه‌مه‌ پنه‌ که‌رۆ،یانه‌م خاپوور که‌رۆ و ژه‌ن و زارۆڵه‌م چنه‌م مسانۆ !
جوانی چوار شانه‌ به‌ خه‌فه‌ت سه‌رێوش شۆکناوه‌:
– ئی گه‌رده‌لووله‌ به‌ینێوا یاوان هه‌ورامان و داخه‌م مه‌شۆ په‌ی جوانه‌کاما فرێشا وه‌رگه‌و گه‌رده‌لووله‌که‌یشا نه‌گێرت و تۆزه‌و نێگبه‌تی نیشته‌ ملشاره‌.وه‌لێم من جه‌ کتیبه‌کا شاره‌زاییم گێرت و چه‌تره‌و زاناییم هۆردا و ناسم ئی گه‌رده‌لوولێ ئه‌سه‌رم ونه‌ که‌رۆ.من پاڵم دان شاهۆی سه‌ربه‌رزی و ته‌خت و کۆساڵانی و تا ئاڕوه‌ هازیم هه‌نه‌ په‌ی پاکه‌وه‌ که‌رذه‌ی هه‌ورامانی نازاری جه‌ ده‌سوو ئی گه‌رده‌لوولێ و تا یاوای پی ئاواته‌ به‌رزێ ساتێو مه‌نیشوه‌ره‌.
ڕیش چه‌رمه ڕوه‌ش که‌رده‌نه‌ بێ ده‌ماخی و ‌هه‌ناسێوش هۆرکێشت:
– داخه‌م مه‌شۆ په‌ی تۆ و په‌ی دۆسه‌ نه‌وه‌شه‌کات،بۆنه‌و یاوای به‌ ئاواته‌ وردیه‌کاتا شاخ و داخوو هه‌ورامانیتا سپڵه‌وت که‌رده‌ن!
قسه‌کێشا ته‌مامیه‌ی و من ئامانی وێمه‌ره‌، گه‌ره‌کم بێ ده‌لاقه‌که‌ی ده‌و پوه‌ هۆشم نه‌بی ته‌ڵوو زڵفه‌کام گیرش که‌رده‌ن به‌ ساقوو له‌ولاوه‌که‌یوه‌،هاوارم که‌رد،ڕیش چه‌رمه‌ دیاوه‌ سه‌ر:
وله‌ هه‌ناره‌و هه‌ورامانی هاگات وێت و زڵفه‌کات بۆ گه‌رده‌لوول نه‌شێونۆتا !!

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…