یانە هەواڵیٛ گوزارشوو پانێلەو هەشتوو گەشاوەزی ئەدەبی و ڕۆحی سەردەمیانە جە دەرەتانوو شێعرەی هەورامیانێنە

گوزارشوو پانێلەو هەشتوو گەشاوەزی ئەدەبی و ڕۆحی سەردەمیانە جە دەرەتانوو شێعرەی هەورامیانێنە

30

هەواڵی ئەدەبی جە مەریوانەنە

گوزارشوو پانێلەو هەشتوو؛گەشاوەزی ئەدەبی و ڕۆحی سەردەمیانە جە دەرەتانوو شێعرەی هەورامیانێنە
لوای ڕاوە هەشتەمین پانێلەو “گەشاوەزی ئەدەبی و ڕۆحی سەردەمیانە جە دەرەتانوو شێعرەی هەورامیانێنە” ڕۆ یەکشەمەی ٣١/٤/١٣٩٧کۆچی ڕۆجیاری لوا ڕاوە..
ئی پانلێلێ درێژەو ئا زنجیرە پانلێلا بێ کە وەڵتەر حەوت بەشێش لوێبێ ڕاوە و چا پانلانە بە وردی سەروو ڕەوتوو شێعرەی هەورامیانێ، هەر جە دەقوو هورموزگانیۆ تا دماو مەولەوی شیکاری کریابێ. بەتایبەت چا ڕەوتەنە سەروو یەرێ شێوازا: هورموزگان، مەکتەبوو یارسانی و شێوازوو بێسارانی، باس کریابێ. چنی لەیەکدایۆ تایبەتیەکاو ئا شێوازا و هورسەنگنای هامزەمانە شێعریەکاو شێعرەی فارسی و چی ئاخرایچۆ(سەردەموو مەولەوی پیلاوە) هامزەمانە سۆرانیەکا، سەروو ئا شێوازا پۆلێنبەندی کریابێ.
جە پانلێەو حەوتیەنە سەروو ئا ڕەوتی دماو مەولەوی و هورسەنگنای و کارا بیەی و کاروەنەکەرەکاش، بە وردی باس کریا.
جە پانلێەو هەشتیچەنە سەروو داواکاری ئاوقە کریای، باسەکە تایبەت دریا بە هورسەنگنای و تیشک وستەی سەروو تایبەتیەکاو دەفتەرەشێعروو /زەڕنەو ئاسۆی/، پێسەو یەکەم دەفتەرە شێعری چاپ کریاو ڕەوتوو شێعرەی نەوەی هەورامیانێ.
چی شێکاریەنە، یەرێ بنەمێ بنەڕەتیێ کە بە واتەو شەمیسای و فتووحی، پەی شێوازشناسی وەرچەمێنێ، کریێ پیمانەو هورسەنگناکەی ‘ نگەرشی تایبەت، هورچنی زوانی و ماڕای و ویەرای جە هەنجار و پێوەرە ویەرەینەکا، ئا یەرە بنەمێ بێنێ.

بە جۆرێ کە جە نگەرشی تایبەتەنە باسوو ناواخنی و موحتەوای و نگرش و بینشی شاعرانەی مێ بەین. جە بابەتی دووهەمەنە باسوو هورچنیەی و تایبەتمەندی زوانی شێعری وەرباسا و جە بنەمای یەرەمەنە باسوو ئارەیەنە و گوزەر کەردەی جە پێوەری و ئافەرینشی وەرچەما.
جە باسەکەنە ئیشارە کریا پا تایبەتیا کە زەڕنەو ئاسۆی چا یەرە ڕەهەندانە هەنێش و بە ئاردەیۆ نموونەی و فاکتی جە دەقەکا تیشکە وزیا سەروو خاڵەکا. پەی نموونەی جە بەشی موحتەواییەنە سەرنجەی تازێ و سونەت ماڕە و یەکسان وازە و ستەم دژمەنە و…

جە بەشی زوانیەنە؛ ئاوردەی کەلیمێ و ئێسڵاحی و جوملێ تایبەتێ و خەتی نەبیەی زوانی و هورگێڵنایۆ زوانی پەی ڕەسەنایەتی وێش بەتایبەت جە موزاف وموزاف ئێلەیەنە و لابەردەی حرووفی ئێزافەی و و بومی کەردەیۆ و… جە بەشوو گوزەریای جە هەنجارە پێوەرەکایچەنە؛ سونەت ماڕای و قافیە و وەزن ترازنای و چەنی چنیەی خەتە شێعریەکا ووەرچەم گێرتەی تایبەتمەندی نویسیاری و وینیاری شێعرە و گوزەرکەردەی جە تایبەتیی گوش لاونی و لەزەتی سەنەتیی و… باس کریێ و پەی هەرکام جە بابەتەکایچ نموونێ وزیێ وەرچەم.
جە کۆتاییچەنە باسوو خەسارشناسی ئا دەفتەری کریا و پەی ئی بەشیچە چند جە چند تەورێوە باسەکە وزیا بەین و شێکاریش پەی کریا.
دماو ئانەی نۆرە کەوت دەسوو بەشدارا و ئادێچ هەرکام جە وینگاو وێشاوە سەرنجەش وستە بەین و سوعالێ وێشا ئاراستە کەردێ.سابیر عەزیزی،کورش ئەمینی،فاتێح سەعیدی،مەهدی ئەبری، بێهرووز محەمەدپوور،داریوش رەحمانی. ژیار سڵامەتیان و… باسەکەشا ئیدامە دا.

بە زوویی فایلی سەوتی ئی پانلا گنۆ وەردەسوو هۆگراو شێعرەی هەورامیانێ.
سابیر باسوو سونەت ماڕایش جە زەرنەو ئاسۆیەنە کەرد و چی بارەوە پەرسەو وێش کەردە.چەنی ئانەیچ باسوو وێ بە کەم تەماشە کەردەی و وێوەریش جە فەرهەنگوو ئێمەنە کەرد و باسش جە کەتمان کەردەی کەرد و ئینەش پێسەو خەسارێ گەورەی دا قەلەم و واتش وەختێ ئێمە دەقی ئەدەبی و شێعریما هەن چی ئەشۆ باسش نەکریۆ.
فاتێح سەعیدی باسوو ئاچەواشەگەریاش کەردکە سەروو شێعرەکاو زەڕنەو ئاسۆی کریێبێنێ.ئیشارەیچش پا کەلیمە ڕەسەنا کەرد کەچی دەفتەرنە ئامێنێ و ئینەش بە کاروو شاعێری زانا کە جە فوتیای زوانی وەرگیری کەرۆ.
مەهدی ئەبری؛بە پەشت بەستەی بە یەرێ معیارا کە جە شکلۆفسکی و باختینی و کەدکەنی،ئاردێشۆ:(ئاشنایی زودایی جە شکڵەنە،جە زوانەنە و جە مەفهوومەنە). زەڕنەش ساحیبوو ئا پتانسەیلی زانا کە پێسەو سەبکێ تازەی پۆلێن کریۆ. واتش وەختێ سەبکی هندی کریا بە سەبک وەرووتازەگەری جە زوانیەنە بێ.بەڵام زەڕنەو ئاسۆی جە هەریەرە معیارەکانە تازەگەریش کەردەن و من پێسەو سەبکێ کامڵی تەماشەش کەروو.
بێهرووز مەحمەدپوور، سەروو کاری زوانی جە زەڕنەو ئاسۆیەنە باسش کەرد و واتش کەفرەتەر ئا کارە زوانیا کە کریێنێ من ماننا.واتش کە ئاننە ماننۆم بە دەیان جارێ فڕش مدەو و بە سەدان جارێچ مارووشەوە.
داریوش ڕەحمانی ئیشارەش بە کاریگەری زەمانی کەرد و واتش ڕەنگە زەمان کەرد و ئانەش وست بەین کە ڕەتی ڕۆشنویری نەتاوانش پاجۆرە کە لازما ئی شێعرا لەیەک بدۆوە؟ئینەیچشە بە خەسار زانا و جەختش سەروو پەیلوایەکەو کاک فاتێحی کەرد.
ژیار سڵامەتیان باسێوەش سەروو خەسارشناسی جە ڕەوتوو ئاوانگاردی جە شێعرەی هەورامیانێنە کەرد و جە گۆشە نیگاو وێشەوە خەسارە وکەم و کۆڕیەکاش لەیەک دێوە.

کورش ئەمینی باسوو ئانەیشە کەردکە جە ڕەوتوو شێعرەی هەورامیانێنە و جە بەینوو شێعرەکاو مەولەوی و شێعرەکاو ڕەوفیەنە هاڵیگایێ هەن.ئی هاڵیگایە و ئیجازی زوانی بیێ سەبەب تا موخاتەب دووچاروو سەرگەردانی زەینی بۆ. ئیشارەش پانەیچە کەرد کە ئا خوانێشێ سەروو کتیبەکەی کریێ،نەتاواش هەقوو مەتڵەبی ئەدا کەرا. جە ئیدامەیچەنە باسش سەروو چەنی وەش بیەی سەبکی ئەدەبی کەرد.

کومیتەو شێعرەو ئەنجومەنوو ڕۆجیاری / مەریوان

 hewraman
Load More In هەواڵیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…