نەشمین

71

نەشمین

دلێ ئۆتوبوسی فرە سەرد بێ،دەسێم گرمۆڵەم کەردێبێنێ و بەگەرماو هەناسەیم وێم گەرم کەرێنێ،جارجار زەردە خڤێ گنێ سەرو لچام،یانەو دڵیم ئننەو چراوەدەسیێ ڕۆشن بێوەقسەکا مەسعودجەمالی ئێنێ ویرم.فرەش واتانی پەنە نەو! تۆ جارێ وەختو ئانەیت نیا و وەرگەو دووری وەڵاتی مەگێری.چاگەنە هەروێتنی و کەسی مەژناسی بێتاقەت بی و دنیا وەرو چەماتۆ گنۆ.وەلێ شەوێ ویەردێ پاڵو سۆبەدارینەکەینە من هەر دیێنێ ئاویرەکەی هۆرودڵ و فکرم یاگێ تەرۆ قۆڵێ وەرێ.دەیێقێ سەفەرێ بەدەنگو نەریمان نەریمان و کامەسعوودی ئێنێ وێرا سەرەیم بە نیشانەو بەڵێ کەردەی تەکنێنێ و پینەی تاتەم و ئەڐام نەزانا گۆش مەگێرو پەی قسا و مۆدیر و مەدرەسەکەیم پی قسا دەس وزێنێ سەروڕاسی واتەکاو ئاغەی جەمالی:
پاسەن ڕاس فەرماوی
ئەرێ وەڵڵا مشۆم پاسە بۆ ئەننا…

واوەی چیوێ تەر مەغزیم لاشەخەڵ کەرێ.

دڵو وێمنە پێسە واچێنێ:
من مشۆم بلوو…!

نەشمینێ ئێننە گەرەکنا نیشۆ دیارمۆ تا مەوە ئاوەخت دلێ یانەو وێمانە بەوەشی ژیومێ و منەتەو تاتەو هەسورەیچ مەکێشمێ! ڕەفێقەکێم گاڵتەم پەنە کەرێنێ مەدرەسەنەحافێزوسێ ئەحمەدی کە هەر زاروڵەیوە پێوە زلێ بیێبێنمێ واچێ:
جا ئامایوە فارسی قسێ کەری و هیتێ شرواڵێت کەردێنێنە و عن تەسک بی و دماوە دەنگو قلەیش حەوشە مچکلەکێ مەدرەسەینە دەنگ دێوە…

هەم تاتەو نەشمینێ و هەم براڵەکاش چن سەفەرێ واتانی پەنە دەسو ئی واڵێشا بازوو،تاقانێنە و ئننەو چەماشا وەششا مسیۆ بێ و عادزە بۆ جە دەرسەکاو مەدرەسەیش گنۆ دماوە ئاوەخت کارێت پەنە کەرمێ نە خوا مەرگت بدۆ نە ڕۆزگار.وەلێ من سەرو قسێو وێمۆ بێنێ،ویس ڕوێ جارێ بە نامێوە کە نەشمینە دێم پەنە دڵوەش بێنێ و ئاننە تەر قۆمپەو عەشقیم پەی نەشمینێ تەنگیێوە.دمایین نامێشنە کە پەرێ پەشتو بانەکەیشاوە وستاننیشرە پەی ئاخرو نامەکێوە نویستەبێش:نەریمان گیان وەشم گەرەکنی و تا هەنا یادت دڵمنە بەر مەشۆ.
مانگێ چێوەڵ تاتەم و واڵە زلەکێم کیاستێم هیجبی پەیانەو مامۆیم:
_ڕۆڵە گیان ئیسە تۆ کەی وەختو ژەنێتا؟
_با زل بی و بی بە ساحیب و یانەو وێت وێما کناچێ عالەت پەی ئێزمێوە…

ئاشەوە تاتاتەم و واڵەکێم یانەو مامۆیشۆ ئامێوە دڵم حەوت سەفەرێ بەر ئاماو لواوە یاگێ.
جوابشا هەر ئانە بێ وێم چەمەڕایی کەرێنێ…

هەڵای زوون…
با زل بۆ…
زاڕوڵەن کەی مەنعا وژیوای و ژەنێ زانۆ؟!

کۆڵ نەدێنێ و گر وێرەگانێ وەختێ نەشمینە وەزێرە وار گاو دۆشتەی منیچ لوێنێ هۆر سەرو بانی و بە دەم و دەسێ و چەمێ قسێ وێم کەرێنێ چەنو تەنیا کەسەکێم…
زانێنێ وەزعە هەر پێسە ملۆ وەرۆ…

ڕوێ لوانی پە یانەو برا گەورەکەو نەشمینێ.
ئیللا و بیللا بۆ من ئی کناچێمە گەرەکەنە،هەرچێ شمە واچدێ من گۆشتا دارونە وەلێ دەیدێم،قەومێنمێ با قەومایەتیما نزیکتەر کەرمێ،من خۆ بێگانە نیەنا وێتا مژناسدێم.

عۆسمانیچ زانێ واز نمارو واتانیش پەنە سەبا ئی عانە بۆوە جوابەکەت مدەوە و قسێ کەرمێ.
سەباو ئاڕۆی مدرەسەنە ویرێ کەرێنێ؛ داخۆم کا عۆسمان واچۆ چێش؟ئاڐ حەسێبا،ئەگەر ڕازی بۆ پی کاری ئیتر تەمامشا.بێ ئاگا چینەی تاتەش و مامۆش تا ئادەو نەشمینە مەدرەسەوە مێنێ گر چێوشا بڕیەنۆ…

وێرەگاو ئا ڕۆی؛ نەریمان گیان فرە هۆشو قسەکات کەردمۆ تۆ مشۆم کارێت بۆ و پەی وێت کاسبی کەری ملی پەی تارانی پێسەو ئی گر خۆڵکی قۆڵێ پیایانێ هۆر ماڵیوەو و دەس کەری زەڕ بەرئاردەی و….

چینەی زیاتەر نەتاوێ قسەکاش تەمامنۆ…

ئینێ قسێ ویس ساڵا چێوەڵتەری بێنێ نەریمان پەی ڕەفێقێ نوێنی گێڵنێشاوە مەنزڵەنە.بە دەسەترەکاوەکاش هەرسە سۆڵەکا پسەڕێ،دیێ سەقفو مەنزڵە تەنگە کێرە دماو ئانەی ژنیەبێش نەشمینەشا دێنە کابرایێ سنەیی کە دە ساڵێ جە نەشمینێ زلا!ڕۆزگارش بیەبێ زەهرەمار
گر شەوێ وەرم وینێ نەشمینێوە کە هایش بێوە و زانێ وەرم بیەن تا خودای دەنگ دابێ دەس کەرێ هاوار کەردەی ویس یاگێوە وەرو بێگاری و سەهل ئەنگاری سەرو کاریوە بەرشا کەردەبێ…

چەنوو وێش عەهدش کەردەبێ تا هەن و زیننەن پا نەنیۆنە هەورامان…

کاغەزو نامەکا گر شەوێ فیسنێ چەنو هەرسا.یەکسەر فەرتوتیێبێنێرە،کەس نەتاوێ وەنۆشاوە وێش ویەرۆ ئننە وەنێبێنێشۆ بیێبێنێ مەلەکەو زێهنیش……….

نویستەی:فەرشید ڕۆستەمی

 hewraman
  • هەڵقە دوکەڵێو!

    هەڵقە دوکەڵێو؛ ڕوٙمانێوە کوڵە بە قەڵەمو بەختیار لهونی، وەڵاو گەو هەورامانینە بواندیٛوە، حە…
  • ئه‌ڎای غیرتیە و لالۆی قه‌وم دوس

    ئه‌ڎای غیرتیە و لالۆی قه‌وم دوس داستانێوه‌ جه‌ کاکه‌ موحه‌ممه‌دغه‌ریب مه‌عازی نژادی  …
  • ویرەوەریە جە ڕۆ کۆمساو 1391 ی

    ویرەوەریە جە ڕۆ کۆمساو 1391 ی ڕوێ شۆنەو کۆنگرە تارێخیەکەو مامۆسا ئۆسمان هەورامیرە (1391 .2…
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیکوڵی:  tribulus terrestris

پیکوڵی:  tribulus terrestris پیکوڵی یام پیکوڵە، گیواوێن وەھارێنە سەوز بۆنە، سەرانسەرو دنیا…