تەپە دوکەڵ

220

تەپە دوکەڵ

ئەوسا خەڵک کۆگا ،هەرزەڵێ٫کەپریٛ و کەلیٛ نزیکۆ سەرە ڕایاوە وەشیٛ کەرێنیٛ بە ئی دەلیلا سەرو ڕایاوە وەشیٛ کێریێنێ چون ڕاکێ هەمیشە ئاوەذانیشا بێ،گۆزەرشا بێ وە ساحێبو کەپرەکیٛ یا کۆگاکێ هەمیشە تاقەتشا بێ، هەر کەس مەیلشا بێ مدرنێنێش هەم خەبەرێ دنیایش چەنە پەرسێنێ و هەم غەیبەتیو دمەتەقیوەشا کەرذێ بێ و موهێمتەر نیمەو کار و باریشا دێنێ ملۆ کەساتەریەرە مەسەڵەن فڵان ژەنی یا فڵان پیا لازەم نەکەریٛ پەی هەر نیازێوەشا بلاوە پەی بازاری دلێ دەگای پەی شقارتەی یا کوچیۋ ئاڵەتۆ زەرذەچۆی و نەکریێ پەیشا و دوریچ بێ، هەر کەس رەذ بێ هەرمانێوەش دێنێ ملەرە،چڕێنێ قاذێر ئانەی پەی دەگێ ملیۆ؟هیزی شەوێ فتێڵەو چراو تۆڕیەکێما سۆتەن! ئا بێ زەحمەت لا عبالیو دوویٛ فتێڵە چراو تۆڕیەما پەی بارە عەینو هەرمانێ دێ ملۆ چۆار نەفەرارە یۆشا هەر ویرێش بێ ئارێش پەی،منیچ واچێنی سەرو چەما.کۆچیو لوێنێ سەرتەر لالۆ حەمە ئاوی دارێ، پەشتەو پەڕچینەکەیەنە چڕێ قاذێر ئانە پەی دگای ملیۆ؟ هیزی شەوێ قوەو چراقوەکێما سکوتێ بییٛ، ئا بێ زەحمەت لا حاجێ قوربانیۆ بەشکۆم چوار قوە ڕیواکێ باری پەیم ، منیچ واچێنێ سەرو چەما، من عاذەتم کەرذە بێ ئەشیا گر ڕوێ جە مڵکەنە لوێنیٛ دەگا سەرێوەم داببێ ئەو سەرو حەوزە لارەی.

جاریوشا دما نیمەڕۆ بێ لوانی پەی دەگای نزیکو کۆگاو یانەو لالۆ حەمەی بیاوە ،مدٚیەو بوەو یاپراخا مەی!! منیچ پام یەواش کەردۆ ملم قنجم کەردۆ!! تا بەشکەم وینام خۆڵکێوەم کەرا !! بە فیکە دەسەم کەرد کرمان کرمانە !! هەر وێشا کەڕ کەرذ !! وەڵێو پەڕچێنەکەیەنە چڕیم سڵام لالۆ حەمە خاسێندێ!؟پەی دەگای ملوو هیچتا لازەم نیا!؟زاناش بووەو یاپڕاخەکام ئەژەنییٛنە پەی ئینەیە نۆسم نەتکۆنە ملشا ، ماچۆ قاذێر ئابۆ کۆچێو یاپراخی بوەرە، منیچ یەک و دوم نەکەرد لوانی دلێ ساناڵەکێنە سەرو دۆشەکڵەویو چۆارمێردەم پێکا،دەوریو یاپراخیٛشا پەی کەردارە سێرم وارد واتم خودٚا سفرەتا زیاذ بکەرۆ گەرەکم بێ کڵاشەکام کەروەنە بواچو خۆدا حافیز ،لالۆ حەمە ماچۆ قاذێر کڵاشەکاذ مەکەرەنە ئا بێ زەحمەت پا تەوەرزینیە چوار شاتێ بڕە پەی ئا کاوڕا !! منیچ چا زەمانەنە دەورو حۋذە ساڵەم بێ ئەجێ ئاسکەنا بازی بەرو!! تازە وێم دەق دابێ سەرەم شتە بێ کواپانتۆڵی تازەم کەردەبینە چەنی گجیوە چەرمەی قژی درێژێم فرێم بێنێ،تا سەرو شانام ئەینێ .بە پلتۆکێ وێم تەکنێنێ، قۆڵە قوڵو نیمەڕۆی ۋەزنانێش تفەکێ فرە گەرەم بێ گۆرج هارەقم کەرد و لباسەکێم فیسیێ چەنی هارەقی وەختیو تەوەرزینێ دێنێ ئەو بنەو لەقەکەی یەک عالەمە توزە وارێ ملو سەرو و ملو ڕویمەرە، گەڵا تفێ فرەم بڕێ پەی کاوڕا وەستارە گەرەکم بێ کڵاشەکام کەروەنە لالۆ حەمە ماچۆ قالە گیان کڵاشەکاذ مەکەرەنە !! یاپڕاخەکیٛ وارذێذ حەراڵێشا کەرە !! ئا سۆقاتیلەیە ۋینی پا لەقە هەنارەی بارەشەرە ، ۋەزە ئا شا هەنجیرەیە وێم مەیاروش حەوت هەشت دەسێ هەنجیری چنە پەی شەوێما.

ئیجا سۆقاتیلە چنگڵێوی گۆلانە بێ وەختیۆ نۆبەرەو هەنگورو و هەنجیری یاوێ، پەی سۆقاتی ئێسفادەش چەنەکەرێنێ ، مەسەڵەن هۆشێو هەنگوری درەبۆڵە چەنی دەسێو کۆچەکاوا بەرێنێش پەی سۆقاتی ، سۆقاتیلە هەر چانەیۆ ئامان و هەر دەسیو هەنجیری یانی دە دانێ هەنجیری. و هەشت دەسێ هەنجیری یانی هەشتا هەنجیری و هەر شاتە هەنجیریو دانێ یا دوێ هەنجیریش پۆنێ ، یانی مشۆم دەورو پەنجا شاتە هەنجیری بە گاڵۆکە گیریۆ تا هەشتا هەنجیری کەنیۆ.

چارەم نەبێ ! ئەشیا یاپراخەکا حەراڵێ کەرو !! هیچکەس مەزانۆ دلی گەرماو نیمەڕۆی ٤٥ دەرەجەیەنە،عارەقت کەردەبۆ و توزەو گەڵا هەنجیری و جارجار شاتە هەنجیر پەڕا تۆزە وەربۆ ماڵۆ ڕوەتەرە ،جەحەنەم مێ وەرو چەمات،خۆلاسە چنگڵێو شاە هەنجیریم چنییٛ نیێم چیرو تافەکەی تا فێنکێ باوە پەی شەوێشا .

منیچ جامێو قەدۆ هەنارەکەیۆ بێ دیانیشەنە تەماشەو سەرو وەزعو وێم کەردم مدٚیەو ڕوەو ئاوەذانیم نیەنە ! سەرو ڕوەم پەڕا تۆزەو و فیسیانا چەنی هارەقی. سەرەم پەڕا کەژەتەڵێ، دڵو وێمەنە واتم: دەی بوەرە یاپراخی !! خودٚا حافیزیم کەرد بە ڕەمای لوانی لباسەکێم بەرئارذێ و دێم وەرو تافیوێ ،  پەی یوەمین جاری ئاڕوە نەلانی سەرو حەوزی ، دمای مانگیوی هەم پەی دەگای لوەنیٛ نزیکۆ یانەو لالۆ حەمەی بیاوە مدٚیەو بوەو دوکەڵو کەبابی مەی !
منیچ نیا تەرسای بێنێ، گەرەکم بێ یەواشڵێو رەذ بۆ لالۆ حەمە نەوینۆم! هەر ئننەم زانا لالۆ حەمە چڕیش قاذێر!! واتم بەڵێ لالۆ حەمە. ماچۆ ئابۆ با چوار پلێ گۆشتت پەی برێژو !! دیانی مدٚیەو کوچیو گوشتش قەدٚو هەنارەکەیوە ئاڵۆچنانەرە! واتم زاتو خودٚای ئینە تەڵەش پەی نیاناوە!! سەرو پێچو شلەکاوەکەیو منێش دیەنا، گورج پلێو چەرب و گۆشتی چەنی پلێو دمەی وسەبێش سەرو سکەڵەکەی بوەش ئا وەڵاتشە گێرتەبێرە.دڵو وێشەنە واتەبێش قاذیر چڵێسا!! بوەو کەبابیش ئەژنی وێش مەگێرۆ! ماروش بڵۆسکێۋ گوشتێش مدٚۆ پەنە هەم وەزیش پەنە تەکنو و هەم هەنارە بەرزەکاش پەنە مڕنۆ.! منیچ دڵو وێمەنە واتم: ئی تەپەدوکەڵە هەسش کەردەن بێ ئۆ نیا!! واتم لالۆ حەمە دەسێت وەشێ با هەر ئیسە بی تۆ ناوەش چوار بڵۆسکی گوشتم بریٛشت وارذم.

لالۆ حەمە ماچۆ کورە قاذێر بۆ بوەرە ئی گۆشتە فەرقش هەن هینو کاوڕیا، واتم بەخوا لالۆ حەمە تۆ واچە پلێوەچ مەتاوو بوەرو!. دڵیچەنە مژن کەرینێ پەی گوشتەکەی!!.

هەر پاسە قسێ کەرەێنمێ پام هۆرگرت دور کەوتاوە زاناش تەرحەکێش شێویەنە !! یەواش یەواش دەنگێش بەرز کەردۆ و خەڵکیچ دوورەو ئەژنەوێ،ماچۆ کورە هیزێ وێرەگا تاتەت دیم دەسی هاڵی لۋاۋە مڵکەرە،تۆ ئی سێخە گۆشتتە چکۆ وارد!!؟ منیچ بە دەنگێ بەرز واتم لالۆ حەمە خۆدا روزی ڕەسانا، سەحبێ فروجێوما بێ سەرەم بڕی کەردم کەباب. کەوتا پێچەکە ئێتر دەنگێش نەژنەوێنێ ،  فرە وەشم بێ، دڵۆ وێمەنە واچێنێ ئانە ماچی حەراڵش کەرە !!دەوریوە یاپراخیٛت دانی چوار سەعاتێ هەرمانێت پەنەکەردا، ئەگەر کەبابێوم دەی نیمە شەویچ نەجاتەم نەبێ دەستۆ !!!!!

حمید بازمونە 

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…