یانە پەیلوای بەیادٚو شادٚڕەوان”مۆحەمەد مۆستەفازادە”ی

بەیادٚو شادٚڕەوان”مۆحەمەد مۆستەفازادە”ی

128

بەیادٚو شادٚڕەوان”مۆحەمەد مۆستەفازادە”ی

جە کاروانوو بێ نازو ئێساڵیمانە گەرکمان یادٚە دوبارە کەرمێ جەکەسێ کە ئاڵا بەدەسو سەرقافڵەو کاروانوو زوانو فەرهەنگو ئەدبو هۆرامی بێ. بە داخەوە زمسانوو سەخلەتو ساڵوو91ڕۆجیاری بێ بەزەیی! کۆگاوو شادٚیو خزمەتکاریەکاو ئاواتو ئێمەش تێک دا.شایانوو واتەین ئەگەرهەرنەتەوێ چەنی ویەردەو وێش و کێ بیەی وێش پەیوەندیش نەبۆ سەرئەنجام شپرز و پەرەمزەدەن و ئارویچ یوجە تایبەتمەندیکاو ژیواو بەشەری زوانا کە نمایندەو هورسونیشتەوی بەنرخین جە زەمینەو فەرهەنگ و ئەدەب و زانیاریوە شارەزاینێ.
چێگەنە کاکە “مۆحەمەد مۆستەفازادە”یۆ چا نویسەرا بێ کە نمادو نێشانو باوڕی بێ و تاواش زوانی هەورامی کە گەورەتەرین گەنجینەوو میراسو وەلاتوو ئێرانیا، جە ئەو پەڕوو دڵسۆزیوە واوەی وزۆش سەروو نوکوو قەلەمی. جا ئیسە پێوەرە بەیدی دەلاقەو فێکرو خیاڵی واز کەرمێ تا بزانمێ ئاواتو ئامانجو ئی ئەدیبەگەورەیما روبە کام لوتکەوو بەرزایی هەوڵش دان؟ بەڵێ وەختێ کە شۆڵەو دەسەڵاتوو لەشکەرقافڵەسالارو ئەردەڵانی روبە کزی و ماتەمی لوا و کاروانو نامدارو شێعرو ئەدەبیچ تەواسیاوە و شپرز بی، وەختێ دەنگو ناسکو بە سۆزو ئەدیبە پایەبەرزەکا پسنەو مەولەوی٫بێسارانی٫سەیدی و….جە دنیا خواحافیزیشا کەرد، زوانو شێعرو ئەدەبو هەورامانیچ کۆسش کەوت و جە کەل بی پێوار.
بە داخەوە تا چی سەردەمەنە کەسێ پاجۆرە یاگێ دەس وەشانەی بۆ نامانە مێدانو نویستەی شیعرو ئەدەبی،چێگەنە دیارا و یاگێ سپاس و گەورەزاناینە کە کاک”مۆحەمەدی مۆستەفازادە” بە ئەو پەڕو هەست و باوڕیوە ئاوەزی بەرزش جوڵیاوە و کەمەرو هێمەتیش بەسە نەمانە قەڵمو زانیاریو رۆشنویری و ژیوایە دوبارەش داوە بە زوانو فەرهەنگو وەڵاتەکەیش دیارا و یاگێ سەرێنجێنە ئی روشنویرە زەمانێ زاناش درەختو زوانو فەرهەنگو ئەدەبو ئێمە جە رێخە تا قۆلەپۆپە بێ بەزەی وبێ رەحم پاچیانەرە و یا حەر پێسنەو ساق زەراتە وشکەکەو هەوارو ماتەمی کە پاییزش ئامان ملەرە و یام پێسنەو بیابانێوە بێ بەڕو ئاو یا وەڵاتەوی بێ دارستان پەڕ جە پوش و پەڵایەوی بێ گیان چێرو دەوارو ناهۆمێدینە سیاویش پۆشان،بە ئەوپەڕو هازو توانایوە تاواش ئی باخە پڕمەینەتە کە گەڵا خەزانش کەردەبێ و هانە چەمەو علمو زاناییش خەریک بێ وشکەسالی جەڕگ و رۆحش تەکنابێرە،جە ناهۆمێدی ڕزگار بکەرۆ و بنەمایە تازەش پەنە بەخشاوە وبەڕاسی دڵو رۆحوو ئاوەزی ژیرانەو مامۆسا مۆحەمەدی وەقرەش نەگرت پسنەو هەسارە گەشەکەو سەرکەلو شاهۆ وداڵانی شۆڵەش دا وەڵاتی و ئالایەو زانیاری باوڕی دوبارەش بە شەونەوتەی چەمەکاش چەنی هەسارەکاو ئاسمانی چێرو شۆڵەو مانگە شەوێنە و تا بەر ئامای تیشکو رۆجیاری جە پاڵو پەنجەرەو زاناینە بە پەنجەی تەڵاینەکاش کە مەعناو مانیایی نەزانێنێ بە هەڵمەتێ تێژەو و پێسنەو هەڵمەتە تێژەکێ شەپۆلو چاوەڵوو رۆخانەو سیروانی وێش ئەرمانا و چراوە کزەکێ تاریخە ڕەسەندارەکەیش هۆردا باخچەو ئاواتەکاش نەوەکاری کەرد و بە ونو و جەرگو لاشەی مانیایش ئاویش دارا و زەین و ویرو ئاوەزوو ئێمەش پەی هەمیشەی ژوژناوە.
کاک مۆحەمەد بە چن ها دەلیل و هۆکارێ ژیرانێ هۆشیارانە ئامارە مێدانو جەنگو زوانوو فەرهەنگی و بە ئەوپەڕو شانازیوە سەنگەرەکەش چۆڵ نەکەرد و فەرماواش: “بوانمێ بەهەورامی بنویسمێ بە هەورامی کە ئاڵا و قەڵەمی نەبڕیەنە باڵاو هیچ میلەتەیرە”.
سەرئەنجام تاواش بە هازێ پەڕ بە تینەو وبەدەس رەنجو وێش یەرێ کتێبێ بنویسۆ و بەعنوانو دەس ئاوێژە وهەدیەی ئەوەنەبریا پیشکەشا بکەرۆ بە زوان و ئەدەبو هەورامانی و حەتا حەتانە دەم بە دەم سینە بە سینە جە دلو ئێمەنە و یانەو زانایمانە ماندگارێنێ کە ژیوایشا وستەن دلو رۆحو گیانو هەست و باوڕو ئێمە.پەس گردێما مزانمێ ئەگەر فیکرو ئاوەزو بەرزو ئی کەڵە پیایە نەبییە ئەگەر نەمانیای دەسو پەنجەو ئادی نەبییە، ئەگەر شەونەوتەی چەمە هەرسینەکاو و بێ نازی و بێ مێهری کۆرپەی شیرینو ئادی نەبیە،کێ بە ئێمە یادٚ دێ کە زوانی ئەدایی جە پاڵو ژیوایمانە شانازیش پەنە کەرمێ؟ کێ بە ئێمە نیشانە دێ چەنی و بە چەجۆرە بە زوانی ئەدایی بنویسمێ و کێ بە ئێمە یادٚ دێ کە زوانو هەورامی جە دنیای مۆدێڕنو ئارۆینە وەراوەری کەرۆ چەنی فرە جە زواناو جهانی؟ بەڵام بە داخەوە عەمر و ژیوایش دماییش ئاما و ڕۆحی پاکش پەی هەمیشەی پەروازش کەرد پەی ئاسمانی و پەی مەرگیش ئاسمانیچ تازیەبار بی و تەمەلولی گرت هەوریچ حەسرەت گرتو شراقناش ملوو سینەوو زەمینیرەو وەرەتاویچ بەشداریشا کەرد جەداخداریشانە ئێمەیچ بە یەکجار پەی کۆچی دمایی ئوستادی پایەبەرزیما داخدارو ماتەم پۆشێ بیەیمێ.وەلێ ئەی بلیمەتوو هەورامانەکەیم تۆ نەمەردەنی و هەمیشەی جە دلو ئێمەنە زیننەنی و رۆحی پاکت هاگادار بۆ بە یەک دەنگ و بە یەک ڕەنگ پەیمانو ئاشتی و برایی بڕیار مدەیمێ تا دما هەناسە ویرو باوڕت و ئاوەزی بەرزیت هەرگێز ویرما نەشۆوە و تا ئەرەیاونای ئامانجەکات درێژەششا پەنە مدەیمێ وئاواتە جیا مەنەکات بەگا مارمێ.
جەزا کامران(ادوایی)

 hewraman
  • چەمە زەخم

    چەمە زەخم چەمەزەخم عادەتیٛوە قەدیمین دلیٛ میلەتو هەورامانی و کوردەوارینە  بیەن و هەن، دیار…
  • کوڕ و تاتە

    کوڕ و تاتە تاتە زەڕم گەرەکا تاتە جلیٛم گەرکیٛنیٛ تاتە کتیٛبم گەرەکا تاتە ماتوڕەم گەرەکەنە …
  • دیاری (جەژنەو ھەناری)

    دیاری (جەژنەو ھەناری) ئاکۊ_مارانی ٢٥و نۆڤەمبەرو ٢٠١٨ ڕەنگا پەی ئی سەردەمەیە (جەژنەو ڕۊگنار…
Load More In پەیلوای

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟ بەپاو هەواڵو تیمو تاوتوکارێ”ئەنستیتو پەی…