میراس

44

میراس

یەک هەفتەن سۆحیە هەتا وێرەگا دەورشەنە مەنیشارە. چایی موەران. قسێ مەکەران. غەیبەتوو ئێد و ئەوی مەکەران. میراس بەش مەکەران. ئێدێ چێشش وات. ئەوی چێشش وات. گردیچشا چایی وەرێنێ ها. لەم دڕیاینێ ئینە نیەن یۆشان ڕەحمیە چێویە بکەرۆنە. گردشان مەلاڵیاوه ئینە خوان ڕەحمش چەنە بکەرۆ. خوا ئەچینەی زیاتەر زەلیلەش نەوزۆ. تازە کار جە دوکتراو دوکتوری ویەردەن و تەنیا ماتڵوو ڕەحموو خواینمێ.

تازە مەدرەسەوە ئامابێناوە و ئا ڕۆیچە زەنگو ئاخری وەرزشمان بیەبێ. مانیاو و مەکەت لوانی پاڵاوەژەکە میەو ئەنواعوو پاڵایا نریایێنێرە. چەمێوەم وست پەی پاڵایەکاشان و هەر چی فکریێنێانە پاڵایە جوانێشان کەمتەر چەنە بێنێ. فرێشا پیرانێ بێنێ و شپرزێ. وەشم ناما. پێسەو تیری بشانا پەی دلێ چەمیم وەروو چەمام سیاو بی. زانێنا بلونە سەر هەر یو یاگێوە دەس کەرۆنە ملم. جە دنیاو خواینە قینیم جە باخەڵ و باوش و ماچوو پیرەژەنان. پاسە مەگێرانێتەنە باخەڵەشا خەریکەن فلێقیەینە دلێ مشت و چنگاشا. دەمیشان پەڕ مەکەران جە گڵوێز و ئادیچ ئەگەر ڕەحموو خوایوە وێژەنە وەنینەو چوار ساڵا چێوەڵتەر نەبۆنە دەمشانە و دیانی مەسنۆعیشان نەبانێ!

ئاخ. هەمیشەی تەنیا چێویە کە فرە قیزیش چە نە مەکەرو دیان مەسنۆعین بێجگەم هنوو مامایم دیانێ هەر کەسێو تەری بوینو تا چن ڕوێ نمەتاو دەم دەو چێویوە تەمامو لێڵخوایام مەگنانێ جووڵە جووڵ. بە قورەتی خوایە هیچ وەخت جە دیاناو مامایم قیزی نەکەرێنا. هەمیشەی حەز کەرێنا کەسێوە یام وێم شۆخی کەروونه چەنیش هەتا خوۆنە و دیانه تڵاینەکەش پێویۆ. وەختیە دەمش کەردایوە ئێننە زەریف بێ دلێ دەمیشەنە زەرد کەرێوە و دلێ دەمیشەنە درۆشیێوە. مامام تەنیا دارایی دنیایش دەسێو تەزبێحێ تەلیلەکەردەی و ئا دیانە مەسنۆعیاشە بێنێ و تەنیا دڵش ئەپا دوە چێوەیشە وەش بێ. دیانە کاش پەی چێو واردەی و تەزبێحەکایچش پەی تەلیلەی. فرەو پیرەژەنا قیزیم مەشێونا. پاسە دەم مارانێوە و مەکوانێش لاو دەم و ڕوویەتەرە. پێسەو مورە کوینە سەرو کاغەزیرە یاگەکێش تا چن سەعاتێ هەر لانمەشۆ و پاکە نمەبۆوە. ئاخر ئەمن ماچوو سەڵتەنەی و ڕابێ و عەینایم پەی چێشین. ئەمن ماچوو گونای و نگارێم گەرەکەن و باوەشەو بەخەڵەو ئادیشان.

بە تووڕەیوە بەنوو پاڵایەکام کەرێناوە و تا بەشکوم بێ دزیوە بلوونێوە سەر و کەس نەزانۆ ئاماناوە. تا دەسم بەرد پەی پاڵاکام. ئەدام زاناش ئاماناوە و ئاما سەرو سەرەیم.

-خێر بەیوە. چەموو ئەدالێ.

-سڵام ئەدا گیان وەشەبی یاخوا

-سەقەدەت بوونە. پاڵایەکات مەوەژە سەریە دە لاو یانەو مامۆیت. واچە: ئەدایم وات زوو بەی پەی یانەیمان. مامات حاڵش خاس نیەن. بەنوو پاڵایم تن کەردوە دووچەرخەکەم ئارد جبەر و پایدەرم دانە و دەمێو پیادە ڕەوەنە و دەمیە لوینێ سەرو خیابانی. ئەدایم هەمیشەی واتەبێش هیچ وەخت نەلینە سەرو خیابانی پەی دوچەرخە سواری. دنیا خرابەنە. یۆ ماڵۆنەت پۆری و هەڕەو کۆگەی دەیمێ سەرەمارە. ئاڕوە پەلەم بێ مشیایە لوایەنا. مشیایە زوو وێم یاونایە یانەو مامۆیم و پێغامەکەم یاونایە لاش.ـ

هەر جۆر بی وێم یاونا یانەو مامۆیم و تەقەو بەرەیم دانە. کەمیە ماتڵ بیانی و کەس دەنگش چۆوە ناما. تەقێوە تەرم دانە. کەمیە تەر ماتڵ بیانی میەو هەر کەس نیەن بێ سەردەموە. دەسم کەرد کیسەمەرە و کرێڵکێم بەر ئاوردێ و بە تن چن جارێ ماڵام بەرەکەیشاره. ئانەش پەنە نەشی بەرە کریاوە و مامۆم وینجەنەو پانتۆڵەکاش هورکێشێ! و بە تووڕەیوە ئاما دەموه.

چێشەن کورە ئەپی نیمەڕۆنە. نمازی یۆ ئیسراحەتێو کەرۆنە؟!

_مامۆ سڵام. ئەدایم وات واچە زوو بەی پەی یانەیمان.

-پەی چێشی؟ خێرەن؟

-پاسە بزانو مامام حاڵش خاس نەبۆنە.

-خوا ڕاسە و درۆسە نارۆ! ئیسە کەی وەختوو ئینەینە.

-باشەن لوەوە ئیسە وێم میاونو.

مەگنووە ڕا پایدەر مدەونه بە سورعەتو هەزاریوە ویێم میاونوە یانە. حەز مەکەروو زوو بیاو یانە. باسو ئارۆ مەدرەسەیم کەرونە پەی ئەدایم. واچوو ئارو دەروازەبانی عالم کەرد. چوار دانێ شووتێم گێرتێوە و چەنی پناڵتیوە. واچوونە قەرارەن هورم چنا پەی تیمو مەدرەسەی. قەرارەن بلم چەنی ئەو مەدرەسەکا تەری مسابێقە بدەیمێ.
تا یاوانی سەرو کوچەکەیمان. وەرو بەرەکیمانه چن پیایێ و چن دانێ ژەنی دیارێ بێنێ. دوروە لالۆم دیار بێ. یاوانیوە یانە. ئوتاقەکۆ مامای ژڵێوەش ئێ چەنی ژەن و پیای. گرد سەرو سەریشوە بێنێ. ئەدام مشتەش نیایبێ دلێ مشتێش و ڕەگوو لاو چەموو مامایم تەکانی وەرێ.دەمش کەردەبێ ڕووبە ئاسمان و وافێوەش چەنە بێ. باوەشو ئەدایمەنە تەکانێوەش واردەو مدراوە و ئەدام قرمەو گرەوایش هور ئێست و دەسش ئارد چەمێشەرە و ماچێوە میاچەمایش کەردە. مامۆم وەختیە یاوا وەڵێوە هەر پەی تەزبێحەکاو دیانە مەسنۆعیەکاو مامایم پەرسێ. هۆشتا چەنە با.ئامان کەس نزیکشاوە نەگنۆوە. ئانە میراسەن میراس.

سەعدوڵڵا_خوونخام (شەهریار)

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

زیانیٛو پاڵای پاژنە بەرزی پەی خانما

زیانیٛو پاڵای پاژنە بەرزی پەی خانما فرەو ژەنا دلێ زەماونڎ و مێمانیا و…حەز مکەرا پاڵا…