یانە ئەدەب و هونەر جە کەیەو….!

جە کەیەو….!

93

جە کەیەو….!

وێرەگا وەختەبێ هەوا تاریکنابێشەرە و ئاسمان تووڕەبێ! ئێننە وارانیچ دڵش سەرد٘ و چیا بیەبێ پێسەو وێش نەیرە وار تا بە لافاوەکەیش دەرد٘ەکا بەرۆ چەنی وێش و دڵەکا شۆرۆ تا پاااااااکێ پاااااااااکێ باوە…..!
بیەبێ ڤەرڤە……!

پەلەیچش نەبێ، وەڵاتش سەرد٘ کەرد٘ەبێ و سەروو وێش هەینا هەینا… ئەیرە وار!
یاگێ ئانەی دڵ پیسیەکێ و دەردەکا بەرۆ چەنێ وێش، گرد٘ی چێروو وێشەنە شارێوە و تەپ کوێ سەرشا! پا جۆرە ئەجێ گەرەکشا بەیسێ بازارە و یەخ کەرا و مەناوە تا وەختوو وێشەنە بەیاوە بەر و وێشا برمانا!
پاسە دیار بێ کەس دڵش نەبێ پەو دەمش کەرۆوە و سڵام و هەواڵ پەرسێو کەرۆ! چوون هەڵمێوە دەموو کەسیەرە بەرزە نەبێوە!
بڕێو وەختێچ ئەرەجیت ئێ بنیاد٘ەمێ “ئادەم ئاهەنیێنێ” و ئی شاریچە شارەکەو وێت نیا!!
یاگێ “ئاگەهی تەرحیمەکا” قەد٘وو دیوارەکاوە کاغەزێ لکیەبێنێرە ( فروش کلیە، قیمت توافقی)!
یا کەمێو چەولاتەرەو کوڕێو جوان عەمر دڵقێوش کێشا بێ ملوو سەر و شانەیشەرە سەرەش کێشابێنە دلێ “سەتڵەو شەغەڵێوی” پەی پەید٘ا کەردەو تیکێو نانی!
یا ڕیش چەرمێو چن دانێ تەزبێحێش یاوەیبێنێرە و تماد٘ار بێ پانیشا نانە بەرۆوە یانە! یا زاڕۆڵەو سەروو چوار ڕاکەی ڕەمێ شۆنەو ماشینەکارە و لاڵێشاوە وەنە بە قەوڵوو وێش” آدامس″ش چەنە پسانا!
داخەم مەشۆ پەی پیرەژەنێوێ پانتۆڵێ پیایانێش کەرد٘ێبێنێ سەروو لیباسەکاشەنە و وەخت بێ ڕەقە بۆوە! دوێ یەرێ دلقێ دوینە و چن دلقێ سەوزیە وشکەش نیا بێ وەروو وێش پەی ورەتەی ! وەختێو لوانی و واتم شمارەکەت دەم با ئەگەر کەسێو خەیرێوەش کەردە زەنگت پەی دەو و بارووت پەی! ماچۆ ڕۆڵە “واردەمەنیم” پەی بارە!!

فرەفرەفرە….سەرەم سڕ مەن! ئاخر شارەکەو من هەڵای ئاننە “بێ بەر و باڵین” نەبیەن تا کەس کەسش نەبۆ! ئەد٘ا، تاتە، واڵێ، برا، مامۆ ، لالۆ….!
شارەکەو منەنە تەنانەت هامسایچ کەس بیەن!
سەرەم سڕ مەن جە کەیەو خەڵکوو شارەکەیم دڵشا پێسەو وارانەکەی سەرد٘ و چیا بیەن و وێش و نامێ وێش واڕاش!
سەرەم سڕ مەن جە کەیەو کەس کەسش نەمەن و کەس بی بە ناکەس!
جەکەیەو ئی بەهانێ وەشە کریا، دنیانە ئێتر….! زەمانە واریان….!
جە کەیەو….!!

شەهلا فەتحی

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

زیانیٛو پاڵای پاژنە بەرزی پەی خانما

زیانیٛو پاڵای پاژنە بەرزی پەی خانما فرەو ژەنا دلێ زەماونڎ و مێمانیا و…حەز مکەرا پاڵا…