یانە هەواڵیٛ پەردەلادای سەرو کتێبو “حەسرەتو دڵی”

پەردەلادای سەرو کتێبو “حەسرەتو دڵی”

154

پەردەلادای سەرو کتێبو “حەسرەتو دڵی” یوەمین کتێب نویستەو ئەدەبی عوسمان ڕەحیمی شاعێرو هەورامانی

نیمەڕۆدماو پەنج‌شەمەی ڕۆدیارو ۳۱وچیڵکڕو ۹۷ی ڕۆجیاری بە بەشداری کۆمەڵێوی فرە جە شاعیران، نویسەران و خەڵکی ئەدەب دۆستو پاوەی و دەگاو هەجیجی،جە ئایینێوە شایستە،سەرو کتێبو“حەسرەتو دڵی”،یوەمین کتێبو ئەدەبیو شاعیر عوسمان ڕەحیمی، بە چەندین شیعر وئەوەوانای ڕەخنەگرانە، پەردە لادریا.
سەرەتاو بەرنامەکەی دمای چند ئایەتێو جە قورئانی پیرۆزی جەلاو فازڵ ئەسعەدیەو، بڕگەو پرۆگرامەکێ ئایینەکەی جە لاو پێشکەشکار تەیموور عوسمانیەو ئاشکرای کریای. ئیجادۆکتر مەحموودی سەرپرسوبازنەو فەرهەنگ و ڕانمونی پاوەی جە چند واتێوەنە، دمای وەشحاڵیش پەی گێرتەو ئی ئایینیە، پیرۆزباییش وات بە شاعیر عوسمان ڕەحیمی و بە ئیشارەدای بە دلێنەو شعرەکاو کتێبەکەی،هەوڵو عوسمان ڕەحیمیش بەرز نرخنا و سپاس وهەوڵ و پەشتیوانیی فەرهەنگی خەڵکو هەجیجیش کەرد.ئاراز فەرجی زاوڕۆی ژیکەڵانە و ئازا، بە دێکلەمەی وەشە شیعرێ جە شیعرەکاو عوسمان ڕەحیمی ئایینەکەش ڕازناوە. ناسر سادقی پەیامو وەش ئامایی خەڵکو هەجیجیش واناوە و جە بەشداری عالو خەڵکی و شاعیرا و نویسەراو پاوە، ڕوانسەر، سنە، هەورامان‌تەخت و مەریوان،سوڵاوایش دەس وەش بیەیش کەرد.
حەسەن عمرانی، شاعیرو هەورامانی بە پێشکەش‌کەردەی چن شیعرێوی، جۆش و خرۆشش دا بە ئایینەکەی.جە درێژەو بەرنامەکەیەنە،وەشەویس حەمەڕەشید ئەمینی نویسەر،بە ئەوەوانایێوی کورت سەرو “حەسرەتو دڵی” جووڵەو ڕۆحی و ئەندێشە و ویربەرزی دلێ شیعرەکاش بە خاڵە پۆزەتیڤەکاو کتێبەکەی زانا و ئارەزوو سەرکەوتەی زیاتەریش پەی عوسمان ڕەحیمی واست. حەرپاسە وەڵینە و پێشەکیی کتێبەکەیش بە عالی و تەمام پۆخت دا قەڵەم کە جە لاو کاک کەیهان عەزیزیەو نویسیان بە خاڵەی زێڕینەو “حەسرەتو دڵی”ش زانا. کاک فەیرۆز فەرەجی جە پارچە نویستێو وەشەنە، بە وردی پەردەچیا سەرو ژیوای پەڕنەهامەتی شاعیری و بە ئیشارەدای بە بڕگەشیعریەکاو کتێبەکەی،هەست و سۆز و دڵسۆزی شاعیریش هەم بەنیسبەتو دەگا خنجیلەکێش و هەم بەنیسبەتو سەرزمینو ئەهورایی هەورامانی و هەمیچ بەنیسبەت وەڵاتو گەورەیشەو بەرز و ئێژا ئەژناسا.
سیاچەمانەی ئەهوورایی و سیحرینو هەورامانی جەلاو هونەرمەند سدێق حەسەنی،جە بڕگەشیرین و وەشەکا بێ و شۆرێوی یەکجار وەشش بە خەڵکەکەی بەخشا.

جە درێژەو بەرنامەکەیەنە،کاک هۆمەر نۆریاوی نویسەر و میدیاکاری دیارو کوٚردستانی، دمای چەندین گلە و داوازی جە خەڵکی و بەپرسا پاوەی وسەرزەمینو ئەهورایی هەورامانی بە نیسبەت هەوڵ و هەرمانە فەرهەنگییەکا، بە ئێحترام و حورمەتەو دیا پەی نویستە ئەدەبیەکەو عوسمان ڕەحیمی و سەرەڕاو سادەواچی و زوان‌شیرینی،پەردەچیای شاعیریش جە بارەوفەرهەنگی، زوانی، کەلەپووری و کۆمەڵگاییش، بە خاڵە دیار و پۆزەتیڤەکاو کتێبەکەی دا قەڵەم و واتش:عوسمان ڕەحیمی پی ئی هەرمانێشە دەرکش پینەیە هەن کە جیا چینەیە کە خەم و تەنیاییەکێ وێش و دەردە و ئازار و وەشیەکاو هەجیجی وینۆ،جە عەینو حاڵیچەنە جە ئازارە ئینسانی و هەورامانی خافڵ نیەن و ئینا هەوڵەنە پەی وەڵکەوتەو کۆمەڵگاکەیش و بە سوری و ژیرانە چەنی شیعرێ و زوانی و فەرهەنگی مامەڵە کەرۆ.کاک هۆمەر سپاسو مانیای کەیهان عەزیزیش کەرد کە کارو ڕێکوستەی و هەڵەچنی کتێبەکەیش کەردەن.هۆمەر نۆریاوی بە ڕەخنە و گومان وستەی سەرو وینگای سەقەتی کە بە نیسبەتو ئەوەگێڵای پێشینەو کۆسەو هەجیجی بە فڵانە کەس و فیسارەکەسی، کەچی فرە کۆنتەر چانەیەنە و خواوەنو ویەردێ کۆنتەریا. یۆتەر جە بەشە ڕەنگین و تماشایی ئایینەکەی، دیکلەمەی پڕشۆر و جوانکیلەو کناچڵە وەشڵەکا بێ، کە شکۆمەند و شایستە دوێ جە شیعرە جە شێعرەکاو “حەسرەتو دڵی”یشا کەردێ دیاری بە بەشدارا.ئیجا محمەد مورادی چالاکی فەرهەنگی کوٚردی جە سنە بە پیرۆزبایی واتەیش بە شاعیری بۆنەو چاپ و پەخشو کتیبەکەیشەو جە چن زەمینێو، کتێبەکەش دا وەرو ئەوەوانایی و دلێنەی پەڕپیتو کتیبەکەیش بە نیسبەتو کتیب‌شیعریەکاو هامسنعاو شاعیری جە سەرزەمینو ئەهورایی هەورامانی،جیاواز و عال داش قەڵەم. شۆنیشەرە کاک دلێر ئەداک جە نویستێوە کۆڵەنە،گەورەیی وحورمەتش نیا پەی شاعیری و هەرمانەکێش و هەوڵو شاعیریش،بە گەورەیی وعالی وەسفش کەرد. گۆرانیێوەجەمورتەزای بەشێوتەرو بەرنامەی بێ.

جە درێژەو بەرنامەکەیەنەکەیهان عەزیزی نویسەر و ڕەخنەگرو دیارو هەورامانی، پێسە ویراستارو کتیبەکەی، دمای گەورەزانانی و سپاس و پەنەزانایش پەی بەشدارا و بەتایبەت ئانیشا کە باسشا سەرو کتیبەکەی پێشکەش کەرد، بە ئیشارەدای بە پرۆسەو نویستەی شعرەکاو کتێبەکەی و کۆششیش پەی هەڵەچنی و ڕاسکەردەی زوانی شیعرەکا، چندین هەڵێ تکنیکیێ کتیبەکەیش کە جە پرۆسەو چاپو کتێبەکەیەنە ئامەینێ وەرەو،دەس نیشان کەردێ. پەی نمونەی واتش بەداخەوە (صفحە آرایی) کتێبەکەی هەتا ڕادێو تێک شییەن،پی بۆنەو فرەو یاگانە کەلیمەکێ لکەینێ، یۆ جە گرفتەکا “واو”ی عەتفا کە فرەو جارا لکان کەلیمێ وەڵێ وێشەرە. هەرپاسە بە پەلە و بە پاو ئاژەو ئایینەکەی،ئیشارەش بە چن باسە ڕانویسیا کەرد. دماجار واتش یارمەتی ئەدەبی من بە شێوەی جۆراوجۆر چی ساڵانە بە ئازیزانی،کارێوی دۆستانە و فەرهەنگی بییەن.دمای باسەکەو کەیهان عەزیزی، یاسر ڕەشیدی شاعیرو دەگاو هەجیجی بە چند شیعرێو ئایینەکەش ڕازنا و ئینجا ئۆستادو شێعرێ عوسمان ڕەحیمی، نویسەرو “حەسرتو دڵی” بە چند کورتە باسێوی شیعرین،ئێحساسو وەشحاڵی و وەش ئامایی وێش بە نیسبەتوئایینەکە و مێمانەکا وست ڕوە و ئومێدواریش واست کە شیعرەکێش پەی کۆمەڵگاکەیش عالێ و دەردوەرێ و ڕانموونی‌ کەرێ با.

جە بەشی کۆتایی ئایینەکەی چێرو چەپڵەڕێزانی گەرم و شادو بەشدارانە، جەلاو کاک مۆمن یەزدانبەخش و مۆمن نووری جە خەرمانەو “حەسەرتو دڵی”و عوسمان ڕەحیمی پەردە لابریا و پی جۆرە هەرمانە و هەوڵی پەڕبە ئەندیشەو کاک عوسمان ڕەحیمی، قەدرش گیریا و بی بە بەشێو جە تۆماری فەرهەنگی ئەدەبی پاوە و سەرزەمینو ئەهورایی هەورامانی.

موازۆ ئیشارە کریۆ پینەیە کە ئی ئایینە سەرو ئەرک و هەوڵ و مانیایی خەڵکو ئەدەب دۆستو هەجیجی بێ،کە یاگێ شانازی و ئەوپەڕو گەورەیی و پەنەزانایەنە.

پەیامو کاک ئوسمان هەجیجی پەی بەشدارا کوٙنیشتو پەردەلادای سەرو کتیٛبو حسرەتو دڵی :

بەنامێ خوای مێهرەبانی

سڵام خزمەتو گردو ئوستادەکام

ئازیزا ئوسادە گەورە شەریفەکام
چەنی عەرزو ئەدەبو حورمەتیم
جەخزمەت وشمەی ئازیزام
ئەمن هەرچن وردیتەر چانەیەنا بتاوو
گۆشێو جەزەحمەتەکاتا تاریف کەرونە
بەڵام ئوستادە وەشەویسەکام وەزیفەش مزانو پێسەو مسیارێوی
جەئۆستادە پایەبەرزەکام پەی زەحمەتیشا یادٚوم کەردێبا هەرچن زەحمەتو قەڵەمی بەگفتار جبران مەکریو ئوستادەکام مزانو جەوەختو
وێتامایەتانیامزانو بەبێ ئەوپەڕو زەحمەتۆ برایه تی جەکانگاودڵیەنە
بێ وچانو بێ درێخ پەی مسیارو وێتا
کێشتا ئەمن هیچ وەخت دەینو زەحمەتاو جەنابیتا مەتاوو ئەداکەرو
بەڵام ئێفتێ خارکەرو مایەوشانازی و
سەربەرزیا پەیم بە هیممەت و ڕەهنمایی و هەمیاری
ئۆستادە پایە بەرزەکام وبرایە دڵسۆزە
عالەکام کەهەمیشە یاگۆ ئۆمێدٚیو دڵوەشیم بیێنێ هەزاران سۆجدەوشوکری بەروو جەخوای مێهرەبانی داواکەرو جەبرایی کەمێ نەبا سەربەرزێ دنیاو دیوانو خوای با
بەگەورەیی وێشا عەفوەم کەرانێ
یاخوا هەربەردەوامێ با جەڕاو ئەدەبییاتو وەڵاتەکەیما بەقەڵەمە
ڕەنگینەکەیشا ڕازناوە بانێ ڕەهنما
پەی هەزاران مسیاری پێسەو ئەمن
ئوستادەوەشەویسەکام ئینجاریچە
تەڵەبو عەفوێتا چەنەکەرو هەتاقیامەت مەمنونو تەشەکور کەرو
جەلتف ومێهرومۆحێببەتیتا نیشانەتادا
برایەتی
هەرچن شەرمەندەو گردویارانا
بەڵام سەر بەرزو وەفا دارانا

بەخوایتامسپارو۹۷٫٤٫۱(۱وکۆپڕو۱۳۹۷ی ڕۆجیاری)

برای وردی گردیتا ئوسمان ڕەحیمی هەجیجی

ئوسمان ڕەحیمی هەجیجی

وەڵاوگەو هەورامان نێتی دەسوەشی و موبارەک بایی جە کاک ئوسمان ڕەحیمی کەروٙ بەبوٙنە چاپدریای ” حەسرەتو دڵی ” شوە 

 hewraman
Load More In هەواڵیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟ بەپاو هەواڵو تیمو تاوتوکارێ”ئەنستیتو پەی…