یانە گردین “تایتانیک”و ئێرانی

“تایتانیک”و ئێرانی

96

“تایتانیک”و ئێرانی

ساڵەو ۱۹۷٦ی”محمدرضاشاه” دوێ کەشتیێ گێڵاوویاری(توریستی) بە نامێ “ڕافائێل”و”میکل ئانژ”یش جیاتی بدهی و قەرزی کەجە لاو دەوڵەوتو ئازەمانەو ئیتالیاینە بێ ،ئاوردێش پەی ئێرانی و ئی دوە کەشتیە جەکەراخو ئاوڕاو فـارسی “خلیج فـارس″لەنگەرشا وست و کەشتی “ڕافاێل”ی بە تایتانیکـو ئێرانی نامێش بەرکەردە.
وەڵاتو ئیتالیای قەڕزارو ئێرانی بێ و بایەد بە جۆرێ ئی دەسەوامشە بدٚایوە و چ چێوێ خاستەر چینەیە کە پی دوە کەشتیە پڕنایشۆ و پیجۆرە وجاردایش.

“ڕافائل”کەشتیوە بێ بە گردٚو تفاق و ئێمکاناتو ئاڕۆیە ، ساڵونوسینەما وت ئاتری٫یاگێ وەرزشی ، ٦ مەلەگا٫هۆتێل٫تالارێ گەورێ و بە شکۆ٫ڕستۆران و۷٥۰کابین(هەرکابین یەک حمام و دەس بە ئاو) و۱۸ ئاسانسۆڕ و ۳۰ ساڵۆنێو ئەرەنیشتەی و….
ئا زەمان کەم وەڵاتو جهانی داراو پێسە کەشتیوە بێ.

“ڕافائل”جماو وێش جە ئیتالیای بەرەو دەریاو”خلیج فـارس″ی دەس پەنه کەرد و جە ساڵەو۱۳٥٦ی ڕۆجیاری بە ٥۰ خزمەتکاریٛوە جە کەراخو”بندربوشێهر”ی لەنگەرش وست و پاڵش دا ئەو کەراخو ئاوەو بوشێهریوە.
“میکل ئانژ”یچ بەرەو”بندرعباس″ی ڕوانە بی و جە کەراخو ئی شاریە مەرزیارە.
ئی دوە کەشتیە بەشێو جە گەورەتەرین و وەڵکەوتەتەرین و بە تفاق تەرین کەشتی ئازەمانەو جهانی بێنێ،بەڵام گرفتێ بازرگانی و ماڵی بی سەبەبو ئانەیە کە جە وەڵاتو ئێرانینە سەرەبەرباورا.

ئی دوە کەشتیە چن ساڵێ جە سەرو دەریای و میانو ئیتالیا و ئامریکاینە ئامە و لوایشا کەردە و فرە جە خەڵکو ئیتالیا و هەرپاسە ئامریکای یاد و بیرئاوری وەششا چی دوە کەشتیە بێ.
جە واقع دەوڵەتو ئیتالیای پەی هەر موسافرێو ئی کەشتیە نزیکو ۷۰۰ دولارێ سوبسید(یارانە)دێ.
قەیران و گرفتو نەفتی جە ساڵەو۱۹۷٤ی بی بە هۆ زیادبیەو هەزینەکەردو ئی کەشتیانە و پیجۆرە ڕۆبەڕۆ دەوڵەتو ئیتالیای فرەتەر لوێ چیرو هەزینەو و مخارجیش و دماجار بی بە بهانێ و کەوت دەسو ڕۆنامێ و میدیاو ئیتالیای ، مونتەقێد و ناحەزێ ئی دوە کەشتیێ پی باوەڕە بێنێ کە فەقەت دەوڵەمەند و پولدارێ چی تفاق و گێڵاوویاری ئی کەشتیانە بەهرەمەندێنێ و نەبایەد دەوڵەتو ئیتالیای بابەتو ئی کەشتیانە و خزمەتکاریشا هیچ جۆر یاری و کومەکێ بکەرۆ و جە گیرفانەو ماڵیات دەرێو و شارەوەندێ و خەڵکو ئیتالیای مایە بنیۆ.

شۆنەو فشار و ئێنتێقادێ فرە چی بابەتیە،جە وەهاروساڵەو ۱۹۷٥ی دەوڵەتو ئیتالیای ناچار بی کومەک و یاری وێش پەی ئی دوە کەشتیە بویەرۆ ، جە ۲۱وئاپریلو۱۹۷٥ی، کەشتی ڕافائلی بەندەرو “نیۆیۆرکی”ش بەرەو ئیتالیای جیائاست و جە ۳۰و ئاپریلی جە بەندەرو “جێنوا”ی لەنگەرش وست و دماو ۱۱۳ بار گەشت و گێڵای دەریایی پەی نیۆیۆرکی جە جمای مدرا.
دماتەر شرکەتێ ئامریکایی بە نامێ”هوم لاین”ی،پوڵێ عالێش دا و حازر بی ئی دوە کەشتیە بسانو پا مەرجە کە هەر پسەو چاوەڵی میانو ئیتالیا و ئامریکای خزمەت و ئامەولوای بکەران کە ئی قەراردادە پەسەندو دەوڵەتو ئیتالیای نەبێ.
پیجۆرە”محمدرضاشاه”حازر بی ئی دوە کەشتیە بسانۆ و جە ئەنجام جە کەڵەهەرزو ساڵەو ۱۳٥٥ی ڕۆجیاری ئی دوە کەشتیە ورەشیای بە دەوڵەتو ئاوەختەو ئێرانی.
جە وەهارو ساڵەو۱۳٥٦ی، ئی دوە کەشتیە ئامێ پەی”خلیج فـارس″ی و بیێ بە ماڵ و دارایی ئێرانی.
فرە جە خەڵکو بوشێهری بە وەشی و غرورێ تایبە لوای پێشوازو “ڕافاێلی” و تماشاو و بیەو ئی کەشتیە جە کەراخو ئاوەو شارەکەیشان بە شانازی زانێنێ.
بیەو ئی کەشتیە پەی ئێرانی فرەش نەخواینا و هیچ کەسێ فکرش نەکەرێ چە دماڕویە ناحەز و تەڵخ ئینا دیارو ئی دوه کەشتی بەشکۆ و گەورانە.

دماو شۆرشو ئێرانی جە ساڵەو۱۳٥۷ی ئی دوە کەشتیە کەوتێ پەراوێز یانی ئیتر پاجۆرە نیاوێنێ پۆرەشانەرە و تا ئینە کە ڕافاێل جە ساڵەو ۱۳٦۲ێ، کەوت چیرو بوموارانو باڵەپڕێ جەنگی عێراقی و فرە جە بەدٚەنەیش توشو زیان و شپرزی بی و دماجار یواش یواش لوا چیرو ئاوێ.
ئەڵبەتە کەشتی”میکل ئانژ”ی چی ئاژەنە بەدور بێ و تاساڵەو ۱۹۹۱ی عیسایی مەن و دماتەر دەوڵەتو ئیتالیای جە ئێرانی ئەسەش و گێڵناشۆ پەی ئا وەڵاتیە.
ئەڵبەتە مواچیو(؟) کە میکل ئانژ هەر جە ئێرانەنە مەنە و دماو ئانەی جە ئێستانداردی جهانی پەی گێڵاوویاری ترازیا و کۆنە بی دریا بە شرکەتێ پاکێستانی٫بێنگلادشی پەی پریش پریش و ئەوراق کەردەی.

ئازەمانە فرەو جە خەلک و بازرگانێ ئیتالیایی نرخ و بهاو فرۆشو ئی دوە کەشتیانشانە خەیلێ کەم و سەرشکەن زانێنێ و پی بۆنەو تا ماوێ فرە واچێنێ: بەرەندە و سەرکەوتەو ئی مامەڵەیە دەوڵەت و شاو ئێرانی بیەن.
ئێسەتێ لاشەو کەشتی ڕافاێلی ئینا چیرو ئاوەو “خلیج فـارس″یـنە و بیەن ماوا و یاگێ گیاندارانێ ئاوی و بڕیارا بۆ بە دیدگایە چێرئاوی پەی دۆستداراو ئی کەشتیە نامی و گەورەیە.

 hewraman
Load More In گردین

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیکوڵی:  tribulus terrestris

پیکوڵی:  tribulus terrestris پیکوڵی یام پیکوڵە، گیواوێن وەھارێنە سەوز بۆنە، سەرانسەرو دنیا…