“س”

50

“س”

سەعدۆڵا خوونخام

تەقەو هەنارا کەوتەبێرە. پەڵەهەورێ سیاوێ ئاسمانوو باخا و دلێ دەگایشان پۆژنابێرە.ڕەنگەو باخ و باخاتی بیەبێ بە هەڵاوەی زەرد و ماچی نەقاشی کیشیابێ. سەرکەلەکاوە ئاسمان تووڕەتەر نیشانە دێ. بڕیە جارێ گرمیە کەرێ. چنگڵەمان گرت دەسوە و لوایمێ پەی باخی.
واتم: ئاسمانیچ تووڕەن
واتش:مەلمێ سەرلەقەکاوە دەس مەکەرمێ پەنە.
خشە خشوو گەڵاکاو چیروو پایاما و جریکەو مریچڵا و هەڵاداوو قاڵاو و قشقەڕەی و گرمەو هەوری کە دووروە دێ گۆشێوە سەمفوونی پاییزیش تەکمێڵ کەردەبێ.
یاوایمێ دلێ باخی و پڕانی سەر لەقوو هەناریوەی بەرزی. چنگڵەکەم کەرد لەقوو هەنارەکەیرە. جە سەروە بە گاڵووکە دانە دانەی گێرێنێشارە و بەنەرمی نینێشارە دلێ چنگڵەکەی تا نەکۆیا.
واتش:ئی هەنارە من نیان
پام نیا سەروو دوە لەقێوە و بە ئەنازەو نیم میتریە وێم کێشا سەر. ئەجۆ ئاسمانوە بێنا. دیێنێ پەی واری چین چین وشکە کەڵەکوو تەڵانا سیمایە وەشش دابێ بە باغەکەی.
واتش:واتم ئی هەنارە سی ساڵێ چێوەڵ من نیان
واتم:خاس. دەست وەش بۆ
_نەمام بێ. ئێنە لاموە زەریف و جوانخاس بێ. ماتڵم نەکەرد تا زمسان بێ و هەر جە هامنێنە نیام.
هەرەکەما گۆشێیش چی قسانە دوورێ بێنێ. وێش خجڵنابێ گیاوو لابنوو هەنارەکانە و لەوەڕیای لەوەڕیێ. هەکە چرکە نام تەپەو هەناریو، نام خشەو بنۆ تەڵووکیە ئامایە گۆشاش قوتێ کەریوە و کەمیە تەماشاو ئیلاو ئەولایش کەرێ و دەس کەرێوە گیاو هورکێشای بنۆ هەنارەکا.
واتش:تاوەکێش ئاردەرە واری ئا دویەر دانەیچمانە کەنایێنێ ئیتر ئی تەڵانێ تەمامنێمنێ.
واتم:بەشەکەم. سەعیەو وێمان مەکەرمێ.
یاگە پام وەش کەرد. نیم میتر ئامانی ئیلاوە. مشقاڕیو بێ وەش و ڕیک و پێک وێش یاوابێوە ڕووبە وەری. جە ڕۆجیاری سێر ئامایش نێ. دەسم بەرد وستەمەنە دلێ چنگڵەکەی. دویەر دانێش پژگنای سەروو ئەوتەر هەنارەکانە. پام نیا سەروو لەقێو تەری، دەسش کەرد هەلەق مەلەق کەردەی و نەتاوێ وێش چیریمنە بگێرۆ و کرچە کرچ کەوتەنە ئەو گیانش.
واتش:هۆشت بۆ، ئالەقە نەمەڕیۆ.
واتم :نا هۆشم هەن جە وێموە

_زەردە خوێوەش کەرد و بەم لەم خەندەوە
واتش:خەموو تۆم نیەن. خەموو هەنارەکیمەن
سی ساڵێن ئی هەنارمە نیان و شیرەیش موەرمێ، ئێنەو کوڕیوە زەحمەتم کێشان چەنیش.
دەنگم نەکەرد. هەناریو ساوەی وەش نموون سەر لەپشەوە دیار بێ. هەرچیە کەرینا دەسم نەیاوێ لاش تا بێ گاڵووکە گێرووشەرە. گاڵووکەم کێشا پەیش. هەر یەواش یەواش بەینوو گەڵاکانە دەسم ماشنا تا یاوا لاش. گێرتمەنە بێخەش، پێسەو گۆچانەت نیابۆنە ملوو بزڵەی و کێشیش شۆنەو وێتەرە . هەر چی لارش کەریناوە کێشێناش ڕووبە واری. نزیک نەگنێوە تا دەسم یاو لاش و گێرووشەرە.
واچێ:هۆشت بۆ حەیفەن گنۆرە. حەتمەن ئەوەڵین بەروو ئی هەنارینە بیەن. سی ساڵێ زیاد عەمرش هەن.
ئیجارە دەسم ماشنا گیریانە ملش و تەپێوەش کەرد. ماڵاش لابنوو تەونیرە و بی بەهەزار لتێوە و تەوەنەکێش پەڕ کەرد جە شیرەی سوور.
هیچش نەوات. بێ دەنگ بی و وێش خڵافنا بە دوێ سەوەتە هەناراوە. وردیەکا جیاوە کەرێ و گەورەکاشان وزێ ئەولاوە.
شریخەو هەوری داش ملوو سەریمارە و باخێ تاریکی دەمەو مەغریبیشا گێرتبینە باوشی.
واتش:واران نزیکەن تا ئی تاوێ نەداینمێنە با زوو وێمان بیاونموە یانە. بەرقیەش شاناو هەور شریخناش ملوو باخیرە. چەنی وێش وارانێو خوڕەمش کەرد ملمارە.
پام نیا سەروو لەقێوە تازە نمەو تەڕیش کەوتەبێنە، کتووپڕ پام خزا کەوتانیرە بەینوو دوە لەپانیوی و پام بەینشەنە گیرش کەرد.
کتووپڕ چەمم کەوت بە یاگە ترەشتێوە. پێسە واچی هنوو زوویەن هەر فرە زوو. ئەو یادگاری شێ و نەشێ. تووڵە هەنارا نیمەیش پۆژنابێشارە، چی لاو چەو لاشەرە وەچێش کەردێبێنێ. پێسەو زامێوی پیری کە ساڕێژ نەبیەبۆ. لوابێنا ویرشەرە و تەماشاو یادگاریەکەی کەرێنا.
داخم چێش بۆ؟ هنوو کەی بۆ؟ کێ نویستەبۆ نام کێ تاشابۆ؟
حاڵەتوو نمادیش بێ و پێسە واچی پەی یادگاری نویسیابێ. تۆ واچی سی ساڵێ چێوەڵتەر تاشیابۆ و پێسەو “”س″”بەر ئامان

 hewraman
  • پیر سکڵه‌

    پیر سکڵه‌   داریوش ڕه‌حمانی په‌ی نه‌به‌ز هۆرامی ئه‌جۆت پاسه‌نه.پاسه‌نییه‌ن.ئه‌ڵبه‌ته‌ پاسه…
  • بانگوو ژەنێ دلیٛ شەوەو نەریتینە

    بانگوو ژەنێ دلێ شەوەو نەریتینە لاکەردەیۆیێ جە شیعرێ ـ مەهوەش درووستکاریٛ. شیعرەکێ: ئاسمانو…
  • تەمەن 

    تەمەن  زمسان بار و بنەش هۆر پێچابێ ، شەوێ واتم سۆحا هایم بیوە، گجیە سوورەکەیم کەروو وەرم، …
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیر سکڵه‌

پیر سکڵه‌   داریوش ڕه‌حمانی په‌ی نه‌به‌ز هۆرامی ئه‌جۆت پاسه‌نه.پاسه‌نییه‌ن.ئه‌ڵبه‌ته‌ پاسه…