وەیوڵە باڵیٛ

108

وەیوڵە باڵیٛ

ڕاوڕەسمێوە قەڎیمیانەو ھەورامانی و گیٛرە کوردەواری بیٛ، ھەرساڵیٛ وارانو پەڵەی سەرپایز دما کەوتێ  یام وشکەساڵی بیێ، ئی مەراسیمیە ساز کەریٛنیٛ، چیٛش کەریٛنیٛ؟ زاڕۆڵەو گەنجو پیرو جوان نیٛرو ما، گلیٛریٛ بیٛنیٛوە، داھوٙڵیٛ بە دوویٛ داریٛ وەشکەریٛنیٛ و چەپو راس بەسیٛنیٛش و ئینجا جلیٛش کەریٛنیٛنە ،  جلیٛ ژەنانیٛ بیێنیٛ یام پیایانیٛ فەرق نەکەریٛ ،  یانی بیٛ بە ” وەیوڵیٛ”.

 زەریف ڕازنیٛنیٛشۆ پیٛسەو وەیویٛ ،دیٛنیٛش دەسو کەسێوە بەرزەش کەریٛوە،دماو ئانەی (20-30) کەسیٛ زیاتەر یام کەمتەر جەمیٛ بیٛڼیٛ گنیٛنیٛ شوٙنەو وەیوڵە باڵەکیٛ، ئەوەڵجار دلیٛ دەگایرە گیٛڵنیٛنیٛش، گرد جارێنە پیٛسەو کۆرسی واچیٛنیٛ( وەیوڵە باڵیٛ سەرو پیرا ،یاخوڎا واروٙ پەی فەقیرا) ،لویٛنیٛ وەرو بەرەو ھەرکەسی  ژەنەو یانەکەی زییٛرەو جاموڵکێ ئاوی پژگنیٛ وەیوڵەکیٛڕە ، بەحساب تەڕە بوٙ و وارانش بێ شوٙنیرە، دماو ئانەی دلیٛ دەگای تەمامییٛ ،ڕوە کەریٛنیٛ سەروو  نزرگەو (پیرێ ) ھەورامانی ،دیارا فرەو دەگاکاو ھەورامانی نزرگەو نشینگەو قەبرەو پیرەکاش چەنەن، ئێمە جە گوڵپ بە پێ وەیوڵەکێ بەریٛنمێ پەی سەرگەتێ نزیکەو نیم سەعاتی زیاتەری بەپای لویٛنمیٛ تا یاوێنمێ سەرو قەبرەو (باواناوزی) باواناوس، جە گوڵپۆ ھەتا سەرگەتە  دروشمەکاما واچیٛنمێ ( وەیوڵە باڵیٛ سەرو پیرا،یاخوا واروٙ پەی فەقیرا)، دماو ئانەی یاویٛمیٛ سەرو قەبەرە باوا ناوزی ،چاگەیچ کەمێ مدریٛنمیٛ ،ئاوی ئاریٛنمیٛ کەریٛنمیٛش وەیوڵەکیٛرە، تەڕە بیٛ، دماو پانزە تا ویس دەیەقا سەرو باواناوزیوە مەنیٛنمیٛوەو دروشمەکاما واچیٛنمیٛوە،  ئیجا شوٙنەو ویٛمارە گیٛڵیٛڼمێوە پەی گوڵپی.

ئەگەر سەرنجە دەیمێ ئی ڕاوڕەسمە جە دیٛر زەمانۆ پیٛسەو فەرھەنگێ مەنەنۆ دلیٛمانە،بە دروشمەکیٛرە مزانمێ، وەختێ ئی ڕاوڕەسمە لوان راوە ، پیرەکیٛ ھەورامانی دەسەلاتو حوکمشا بیەن، زەمانو ئاینو زەردەشتی بیەن ، ( نەوەدونوٙپیرەو ھەورامانی)، دماجاریچ ھەتا ئامای ئاینو یارسانی ھەر بەردەنشا راوە، چوون باواناوز  یارسانەن، ھەتا ئامای ئاین وئیسلامیچ ئی راورەسمە ھەر برەوش بیەن ،وەلێم ئیسەتیٛ باوڕ نمەکەرو خەڵک ئی ڕاوڕەسمیە کەروٙ جە لادەگاکانە،ئەگەرکریوٙیچ فرە کەما، جەحاڵەتێنە  ئی زەمانە فرەتەر ژیوگا توشوو وشکەساڵی بیەن بە نونگەو پیسبیەی ژیوگایوە.

ھەر ئازەمانە چنڎ عادەتێ یام ڕاو رەسمێ تەریٛ بیٛنیٛ پەی وەختو وشکەساڵی ، ئەگەربە وەیوڵە باڵیٛ واران نەواریٛ لویٛنیٛ تەوەنیٛ نینیٛ ئاوی ،  ئاوەو چەمەو  دەگاو کەیمنەی جە لاو تایفەو یۆ جەپیرەکا ھەورامانی ، ئی تایفە ئیسا نەوە و وەچیٛشا  ھەنیٛ گەچینەنە، ،بە پاو قسا دەماو دەم ئامێنیٛ و لاو خەڵكیوە واچیێنیٛ ،دماو ئانەی تەوەنیشا وستیٛە ئاوی ئیتر واران واران ، هەڵبەت ئی چەمە ئانە بیەن کە پیر محمەڎی غەیبی سەرشۆ وتەن و غەیب بیەنۆ .

ھەرپاسە پەی نەجات بیەی جە بیٛ وارانی عادەتێ تەربیٛ کەریٛنیٛش ئاڎیچ ئانە بیٛ ھەر کەس سەید بیێ ،ناکاوێنە  هورش گیٛریٛنیٛ و وزیٛیٛش دلیٛ ھەسارێ یام حەوزو ئاویٛ تا تەڕبیێ ، بەحساب دماو ئانەی واران واریٛ، ئینە چی دمایوٙ پەیدا بیەبێ ،ئەکید پەی تەرک کەردەی راورەسمە قەدیمیەکا تەری بیٛ.

چی دمایوٙ نماو وارانیچ،کە جە ئاینو ئیسلامینە پەیڕەو کریوٙ کەریٛنیٛ، بەنونگەو قەرەباڵخی شارەکا چن جارێ ویرەوەریمەنە نماو وارانی کریێنەو لاڵیاوە پەی ئانەی واران واروٙ و وشکەسالی کوٙتاش بێ.

ویٛنەکەم جەئینترنێتۆ ھور گرتەن.

            

د.ناجح گوڵپی     8/6/2017

 

 hewraman
Load More In ویەردە و هەورامانی

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…