یانە پەیلوای ئاسۆو چەمەڕوانی

ئاسۆو چەمەڕوانی

90

“ئاسۆو چەمەڕوانی”

کە قسێ مێ سەروو، تازەگەری و پێشڕەوی و وەڵێکەوتەی ئیتر ئانە مێ ڕووە، کە شێعرە چکۆوە تازێنە ؟ یەکڕاست وەڵاموو ئی پەرسێ ئینەن کە مشۆم تازەییەکەش نەوچیا بۆ و وەردەنگی چڵاکنۆرە چێوە چەمکێ مێ وەرۆ پەنەش وچیۆ (ئاسۆو چەمەڕوانیی وەردەنگی) یەکەم مشکیلەو بەینوو تازەی و کۆنەی چێوە سەرە ورمڐۆ کە وەردەنگ ئاسۆو چەمەڕوانیش کۆنەن و دلێ شێعرەکێنە پەیام، لەززەت، واتەی تازە، نەوچیای هەن، و ئێڐ گنۆ وەرانوەرشۆ بە مانا ڕەوانشناسییەکێش تووشوو شۆکی بۆ، بەڵام وەردەنگی نوێخواز و ئاوانگارد زوو حاڵی بۆ و زانۆ چکۆوە و چەنی ئامان.

ئاسۆو چەمەڕوانی دلێ شیعرێ ئاوانگاردێنە ڕووە و ئازادیی ویرۆکەردەی و وینای تازەی و کەشفکەردەی کریۆوە، چێگەوە مەرج نییا شاعیر ئانەی ماچۆش ئا چەمەڕوانییە بۆ کە منی وەردەنگ وێمم پەی حازرکەردەن، منی وەردەنگ نیانمرە کە شاعیر واچۆش، دلێ ئەدەبی میللی و شەعبینە ڕاسا چێوەکێ جوانێ و لەززەتبەخشێنێ بەڵام دایمە ئینێ سنووروو ئاسۆو چەمەڕوانیی وەردەنگینە، بەڵام شیعرەی تازێنە ئینە مەڕیۆو وەردەنگ فرە کەم ئانەی کە چەمەڕوانش کەرۆ ڕووە مڐۆ و وینۆش، هەمیشە شیعرەی ئاوانگاردە بە عەکسوو چەمەڕوانیی وەردەنگیۆ مێ، یانێ چێوەن شاعێر عەکسوو شەپۆلێوە مەلێ کەرۆ، کە لاو وەردەنگی تەمەڵیوە ئینە نامێ نریۆ بێمانایی، نەبیەی چەشەی شیعری، زیاڐەڕەوی….. تاد

شیعرە مشۆم سنووروو ئاسۆو چەمەڕوانیما تێپەڕ کەرۆ، ئیتر باروومەکاو عەقڵی و یادەوەری و وەڵێوینایما ماڕۆ و وزۆشا ئەولاوە، چێگەوە هەرمانەو شیعرێنە بۆنەو مەرزنایرەی کەوێڵێ تازەی شیعرینە پەیوەندییێ تازە و نەوعی بەینوو چێوەکانە و کەلیمەکانە وەشکەرۆ
پەی نموونەی وەڵێ ئانەینە “شێرکۆبێکەس” واچۆ :(من تینووێتیم بە گڕ ئەشکێ ) ئاسۆو چەمەڕوانیی ئێمەنە تەژنایی به ئاوی مەڕیێ، چێگەوە، ئی ڕستە شیعرییە چێوێ چەمەڕوان نەکریا بێ، یان ئا وەخت “ئیسماعیل خورماڵی” واچێ : ( یان هەناری دارهەتاوی ناو بەفرەکەی مەغریب نەبووم) ئاسۆو چەمەڕوانیی وەردەنگی ئاسایینە هیچ وەخت، هەنار، دارهەتاو، بەفر، مەغریب… پەیوەندیی تەکنشینینە چەنی یۆی نمەیا و بێتامیچ گناوە، بەڵام وەختێ بە چەمێ ئیسەییانەوە و سەردەمیانەو شێعرێوە وینیش زانی، تاقەچێوێ ئا کەلیما پێوەرە جوان کەرۆ، کەمتەرین خاڵەی هامبەشەنە، “ئیبراهیم حاجی” دێڕێوەنە لکێوە زوانییەی پارادۆکسەنە ماچۆ :(جە هیدفۆنوو پەنجەرەیۆ) ئاشکران دالوو پەنجەرەی فرەترین مەدلوولش ویناین، یان چۆوە ویناین، ئاسۆو چەمەڕوانیی ئاسایینە، بەڵام ئێڐ مێ هێدفۆنش چەنی هامتا کەرۆ، کە بنەڕەتنە دالێوەن پەی مەدلوولوو ژنەوای، نەک وینای کەچی، بە ئەوەوانای تازەی و ئاوانگاردی ڕستێوە تەمام شیعری گنۆوە، وەختێ چا سەردەمنە و تا ئیسەیچ لاو بڕێ خەڵکی و بڕێ یاگایچۆ “ڕەوف محموود پوور” نامێ دەفتەرێش نیا:(هورپڕای گەچ و تەختەی) ئاسۆو چەمەڕوانیی وەردەنگینە قبووڵنەکریا بێ، هەتا بە مرووروو زەمەنی لوا وەرۆ و فرەیچ تازە و هەم شیعریچ کەوتۆ، یان تازەتەرین ناموونیشانوو کتێبی شیعرینە (شپرز ـ یانی ـ من ـ دنیاـ ئەفغانستان) و شاعیری گەنج و ئاوانگارد “فرشید ڕۆستەمی ” گنی وەرانوەروو پەنج کەلیماوە، تووشوو هەمان ئا شۆکە دەروونییە مەی کە وەڵتەرنە واتم، ئەگەر ئاسۆو چەمەڕوانیت، دلێ وینایێ تازەینە نەبۆ، ئجۆت شاعیر وڕاوێش کەردێنێ، چوون بە فکریای وەڵینە تەقەڵەو هیچ خەیاتێ گجیی من، شپرز، ئەفغانستان، دنیا….. هتد مەورازیۆوە، مشۆم بێنە دلێ وانایۆ تازەی و وەردەنگ عەینوو خەیاتێ مۆدێرنی بە چەنە و ویری تازەیش تەقەڵێ بڐۆ و لکنۆوە و یاوۆنە، یان مەرجیچ نیا بەتەمامی یاوۆنە، گرنگا چێوێ نەوچیا لەززەتبەخش بژنەوۆ، وانایۆی ئەوەڵجار و دووەمجارنە چێوێش مشتە مەگنۆ مەجبوورا مانیۆ، تا یاوۆنە، تۆکڵەکەی ماڕۆ تا یاوۆ مەژگەی.

چێوە شیعره هەر ڕیتم و ڕیزکەردەی نیا، چێگەوە شیعرە مشۆم داراو بوارێوە مەعریفیی جیددی بۆ کە کەوێڵەکەش سەروو بنەماو پەرسێ جیددیێ تازێ مەرزنێبۆرە، چێوە ئیتر شیعرە وێش هەرمانە کەرۆ، وێش ڕووداو خولقنۆ واز جە دۆخوو بەرگری مارۆ و مێ دلێوە کەشف کەرۆ، پەرسێ کەرۆ چێگەوە وەردەنگ وەرێسەو ویری وەڵینەیش پڕچیۆ مشۆم سەرجەنۆ خەریکوو ڕێستەیۆ وەرێسێ بۆ تا دلێ ویرۆکەردەی تازەیشنە حەیلانێ جووڵیای و یاواینەی و وێستەیۆ وروزۆ، چێوە وەردەنگی چەمکز و گۆشکەڕ و هەناسەسوار، قودرەتش مەمەنۆ مشۆم ئەبدەیتوو ویری و وانایۆش کەرۆ و شۆنەو عەمەڵ زیبایی یاواینەیشرە گێڵۆ، ئننا واتەیەکاو شاعیری گنا جـبەروو ئاسۆو چەمەڕوانیشۆ و سفر بەدەسەوە.

سوهەیب فاروق

 hewraman
Load More In پەیلوای

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

“نامەو ئەنیشتاینی پەی خوای” ورەشیا بە یەریٛ میلیون دولاریٛ

“نامەو ئەنیشتاینی پەی خوای” ورەشیا بە یەریٛ میلیون دولاریٛ نامیٛوە جە ئالبرت ئ…