نانە

156

نانە

ولفگانگ بورشرت
هۆرگێڵنای:سەعدوڵڵا خوونخام

ژەنێ کتووپڕ وەرمەنە چڵاکیارە. دوێ و نیموو نیمە شەوێ بێ< کەمێو لوا ویرێرە کە پەی چێشی وەرمەنە چڵاکیێنارە:”یو جە ئاشپەزخانەکەنە داش سەندەڵیوی!” گۆشێش ڕووبە ئاشپەزخانەکەی تێژێ کەردێوە< گرد لایو ئارام و بێدەنگبێ. گرد لایو فرە بێ دەنگ بێ و وەختیە دەسش ئارد تەختەکەیرە، لاپاڵیچش هاڵی بێ < دەلیلۆ ئی بێ دەنگیشە زانا، چوون دەنگوو خوڕ خوڕوو پیای نێ ، یاگۆ وێشەنە هورستەوە و پاخروا دلێ ڕاڕەوە تاریکەکەینە لوا ڕووبە ئاشپەز خانەکەی. هەنترینشا ئاشپەز خانەکەنە وینا. دوو و نیموو نیمە شەوێ بێ ، ژەنێ سەرو یەخچاڵەکێوە چێویە چەرمەش وینا و چراوەکێش گیسنانە ، هەردوی ڕووبە ڕو هەنترینی مدرایبێنێرە و هەر کامیچ تەنیا گجیوەشان پۆرە بێ، دوێ و نیموو نیمە شەوێ ئاشپەز خانەنە  ، دۆڵەو نانەکێ سەروو مێزوو ئاشپەزخانەکەینە بێ.ژەنێ دیش پیاکە تیکێوەش پڕچنان پەی وێش، کاردەکێ هیشتای لاپاڵوو دۆڵەکەینە بێ سەروو مێزەکەیچوە نانە ڕەقە پژگیابێ ، ژەنێ گرد شەویە و بە پاو عادەتی سەروو مێزەکەی سەڕێ، گرد شەویە، ئیسە سەروو مێزەکەیوە نانە ڕەقە پێویی، کاردێوەیچ هیشتای چاگەنە بێ ، ژەنێ سەردی کاشیەکاش سەروو لاشەیشەوە حێس کەرد و چەمێش جە دۆڵەکەی وست.
پیاکەی وات: پاسەم زانا ئەچێگە چێویە هەن ، گێڵا پیلاو پەولاشەرە ژەنێ جوابش داوە و واتش: منیچ چێویەم ژنەفت ،
چەنی وێش ویرش کەردەوە کە ئی پیامە جە شەوێنە و بە گجیوە چننە پیر مدۆ چەموە ، پا ئەنازە کە سنەش هەنە، یانی شەسوو یەرێ ساڵێ ، پیاکە ڕۆنە کەمیە جوانتەر دێ چەموە ، پیاکەیچ بە وێش واتش: ئی ژەنێ چننە پیرە بیێنە، بە تایبەت بە گجیوە فرە پیر مدۆ چەموە ، شایەد دەلیلش دژیای قژاش بۆنە، شپرزی ژەنا جە شەوێنە، پەی وەزعیەتوو قژاشان مەگێڵۆنێوە، قژێ بڕیە جارێ بنیادمی پیر نیشان مدانێ، تۆ مشیایە پاڵایت کەردایێنە، بە پای پاخروا سەروو کاشیەکاوە سەردت مەبۆ، ژەنێ تەماشاو پیاکەی نەکەرێ، چون پەیش هەزم نەبێ کە پیا دماو سی ونو ساڵا ژیوای ژەن و پیایی ئیسە خەریکەن چەنیش درۆ مەکەرۆ .
پیاکە دیسان واتش: پاسەم زانا ئەچیگەنە چێویە هەن، دمای سەرەش کێشا پیلا و پەولا ئەشپەزخانەکەیرە، من دەنگێوەم ژنەفت و دمایش ویرم کەردوە کە ئەچێگەنە چێویە هەن. منیچ دەنگێوەم ژنەفت، بەڵام زاهێرەن خۆ چێویە نەبی.
ژەنێ دەوریەکەش سەرو مێزەکەیوە هورگێرت و نانە ڕەقەکەش جەموە کەرد، پیاکە بە دەنگ لەرزایوە ئەوەخواش کەردوە: نە زاهێرەن چێویە نەبێ، ژەنێ لوا یاری پیاکەی و واتش: بۆ بلمێ، حەتم جبەروە بیەن، بۆ بلمێ سەرو یاگەکێما، سەروو ئی کاشیە سەرداوە سەردا موەری، پیاکە دیا پەی دەلاقەکەی و واتش: درۆسەن حەتم جە جبەروە بیەن، من پاسەم زانا ئیگەن.
ژەنێ دەسش کێشا پەی کریلوو بەرقەکەی و چەنی وێش واتش: عازا مشۆم چراوەکێ کوشنوە، ئەگینا چەمم مەگنۆ بە دەوریەکەی، نمەبۆ تەماشاش بکەرو.
ژەنێ بە پیاکەی واتش: بۆ بلمێ، حەتم جبەروە بیەن، وەختیە وا مەگنۆ، ناودانەکەیچ ماڵۆ دیوارەکەیرە، حەتم ناودان بیەن، هەمیشەی وەختیە وا مەگنۆ، دەنگوو ئادیچی بەرزەو مەبۆ ، چراوەکێش کوشناوە، هەر پاسە کە پا ڕووتەکاشان سەروو زەمینیوە کێشێنێ، دلێ ڕاڕەوە تاریکەکەینە، یواشیە لوان ڕووبە ئوتاقۆ وتەی.
پیاکەی وات:ئەرێ حەتمەن وا بیەن، ئێشەو هەر وا کەوت، سەروو تەختەکەیوە وەختیە درێژ کیشیایی، ژەنێ وات: ئێشەو هەر وا کەوت حەتم دەنگوو ناودانی بیەن. دروسەن ئەوەڵ پاسەم زانا کە دەنگ جە ئەشپەزخانەنە بێ. وەلی حەتمەن ناودان بیەن، پیاکە ئینەش جۆریە وات کە ئەجۆ خەریک بێ وەرمش گنێ پۆری، بەڵام حەقیقی نەبیەی دەنگیش هەمیشەی ژەنەکێش حێسش کەرێ، وەختیە کە پیاکەش درۆش دایە.
ژەنێ وات: هەواش فرە سەردەن من مەلوو چیروو پەتوی، شەوەت وەش. پیاکە جوابش داوە : ئەرێ فرە سەردەن، شەو تۆیچ وەش، کتووپڕ گرد یاگێو بێ دەنگ بی.
ژەنێ دمای چن دەیقا ئێحساسش کەرد پیاکە یەواش یەواش خەریکەن چێو مژاوۆ ، ژەنێ پەی ئانەی کە پیاکە نەزانۆش پەنە هایشەن، بەتایبەت ئارام و یەواش هەناسە دێ ، بەڵام پیاکە ئێنە ئارام و یەواش ژاوێ کە ژەنێ وەرمش کەوت پۆرە.
وێرەگانوو ڕۆ دماینی کە پیاکە ئاماوە پەی یانەی، ژەنێ چوار تیکێ نانەش پەی نیارە، ئینە جە حاڵێنە بێ کە پیاکە ڕوەکای تەری تەنیا یەرێ تیکێش پەی واردەی بێنێ ، ژەنێ وات : تۆ چوار تیکێ بوەرە، من گردوو بەشەکەیم نمەتاو بوەروو، تۆ تیکێو فرەتەر بوەرە ، ڕاسیەتش پەی من فرە خاسیچ نیەن ، وەروو لامپەکەینە لوا ئەولاوە، ژەنێ دیش کە پیاکە لار بیەنوە سەروو دۆریەکەی و فرە نزیکەن پەنەشەوە، پیاکە دیا ڕووبە سەری، ئەچێگەنە بێ ئیتر ژەنێ تەئەسفش وارد پەیش.
پیاکە سەروو دۆریەکەیوە واتش: دەی خۆ تو نمەتاوی تەنیا دوێ تیکێ نانە بوەری، متاوۆ، چوون شەوانی نانە چەنی مەعدەیم سازگارە نیەنە، بورە پیاکە بوەرە ، دمایچ ژەنێ چیروو لامپو پاڵوو مێزەکەینە نیشتەرە

 hewraman
  • هەڵقە دوکەڵێو!

    هەڵقە دوکەڵێو؛ ڕوٙمانێوە کوڵە بە قەڵەمو بەختیار لهونی، وەڵاو گەو هەورامانینە بواندیٛوە، حە…
  • ئه‌ڎای غیرتیە و لالۆی قه‌وم دوس

    ئه‌ڎای غیرتیە و لالۆی قه‌وم دوس داستانێوه‌ جه‌ کاکه‌ موحه‌ممه‌دغه‌ریب مه‌عازی نژادی  …
  • ویرەوەریە جە ڕۆ کۆمساو 1391 ی

    ویرەوەریە جە ڕۆ کۆمساو 1391 ی ڕوێ شۆنەو کۆنگرە تارێخیەکەو مامۆسا ئۆسمان هەورامیرە (1391 .2…
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیکوڵی:  tribulus terrestris

پیکوڵی:  tribulus terrestris پیکوڵی یام پیکوڵە، گیواوێن وەھارێنە سەوز بۆنە، سەرانسەرو دنیا…