یانە پەیلوای چەم وستەیێو سەروو ڕۆمانەو «سیاوڕێحانە»ی

چەم وستەیێو سەروو ڕۆمانەو «سیاوڕێحانە»ی

70

قاژە سیاوەکا سەرباڵشا ڕەشتەن
بەینوو من و تۆ تازە گوزەشتەن
«فۆلکلۆر»
چەم وستەیێو سەروو ڕۆمانەو «سیاوڕێحانە»ی نویستەوکاک«حەمەڕەزا بەهمەنی»
دەسشا وەش بۆ و قەڵەمشا پاراوتەر جە وەڵی کاک ڕەزای بەڕێز.
فرە ڕوشنا کە ئەگەر ئی ڕۆمانێ چەنی ڕۆمانا خارج جە وەڵاتی و تەنانەت ڕۆمانە ئێرانیەکا مۆقایێسە کەرمێ ڕەنگا پلەو پایەش فرە بەرز نەبۆ،بەڵام تا بیەن هەر چیمنە بیەن کە مۆقایێسە ئەوەڵ کەڕەت جە نزیکاوە دەسش پەنە کەردٚەن و هەر وەروو ئانەیە ئەگەر سەرەنجێو دەیمێ دلێ ماباقی ڕۆمانەکا هەورامانی کە تا ئیسە نویسیێنی و بە داخەوە شمارشا کەمتەر جە شماروو ئەنگۆسا دەسیا، ڕەنگا ڕۆمانەو سیاو ڕێحانەی بتاوو جە سەروو فێهرێستەکەیەو یاگێ وێش کەرۆوە.پەنە وازش مزانوو عەرز کەروو هەرپاسە کە ئینتیزار نیا دەریاو ڕۆمانێ جە هەورامانەنە فرە قووڵ بۆ هەر پاسەیچە مەبۆ ئینتیزار بۆ کە نەقادیچ مەلەوانێوی حرفەئی بۆ.ئەدەبیاتوو هەورامانی پێسە زارۆڵێوی نۆڕەسیا کە ئیسە خەریکا کەم کەم هۆرستەنو سەروو پەیا و پای گێرۆ و نیازش هەن کە دەسش گێرا نە وەک بۆقەش بنیا پۆ.و ئەمما :
-ڕۆمان شرووعێوی وەشش هەن وحەرپێسەو فرەو ڕۆمانە فارسیەکا وانەری کێشۆ شۆنەو وێشەرە و ڕەنگا یۆ جە نۆقتە قەوەتەکا ئی داستانێ ئانە بۆ کە جە درێژەو وانایشەنە وانەر نمەتاوو چەنەش جیا بۆوە و حەر گەرەکشا بزانۆ ئاخرش چێشش پەنە مێ؛ وەردەنگ تەژنەن پەی ئیدامەو وانایش.پەی نموونەی:«مامۆش جە درێژەو قسەکاشەنە،هەناسێوتەرش هۆرکێشا و واتش:«سامان گیان،تۆ تا ئیسە هیچ کەسی پەی باس نەکەردٚەنی که تاتەت چەنی مەردٚ…لاپەڕە35»
-گردٚوو ڕۆمانەکێ تەنیا یەک فەسڵا و پێسە ڕۆمانە فارسیەکا فەسڵ، فەسڵ نەکریێنەوە ڕەنگا ئینە جە خاڵە زەعیفەکا ئی ڕۆمانێ بۆ.
– هەر چندٚ جۆغرافیاو ڕۆمانەکێ هەورامانا بەڵام جە کۆلەکێ تەڕەنە نامێ هیچ یاگێوو هەورامانیش نیێنە چەنە کە بە پەیلواو من هەم متاوو نۆقتە زەعف بۆ و هەم نۆقتە قوەت . بەڵام بڕێو ئادابێ و ڕسوومێ هەورامنیش چەنە گۆنجیێنێ کە ئیسە کەم کەم ڕەنگەشا کاڵە بیێنو. پێسە:«…ساڵحی براش(ئی حاجی ساڵحو ئیسەیە)کە تازە ژەنەکێش مەردێبێ براژەنەکێ وێش بە کناچێوەی ساوێوە مارەش کەردۆ…»
-ڕەنگا یۆ جە نۆقتە قوەتا داستانێ ئینە بۆ کە قارەمانەکێ بە دوێ زوانی قسێ کەرا .پەی نموونەی زوانوو نازەنینێ زوانوو دەوەروو پاوەیا: «نا ئەمن نمەژناسوش کێن.» و زوانوو سامانی زوانێوتەر خەیر چانەیەنە ڕەنگا زوانوو دەور و بەروو نەوسودٚێ بۆ:«دمایی پەیت باس کەروو.»
-من پاسە بەرداشتم کەردٚ کە هەر چندٚ ڕۆمانە کەیلەنە جە عەشقی بەڵام غەلەبەو عەقڵی ملوو ئێحساسی و عەشقی جە دلێشەنە هویدان:«دالیا مزانی ئینە قومێ منەنێ،بەڵام تا ئیسە نەزانانم ئینێ ئۆرووپانە.»جە فرەویاگاوە تەسەلۆتوو عەقڵی ملوو ئێحساسیەنە هاوارێ کەرۆ!
-دیارا غەڵەتێ ئێملایێ دلێشەنە هەنێ کە ئۆمێدوارێنمێ جە چاپی ئایەندەنە ڕەفع و رجوێ بانێ.
-بڕێو یاگێنە کەلیماتێو ئامێنێ کە فرەتەر جە هەورامانوو بەشوو عەراقیەنە ئێستعمال کریا و ڕەنگا ئینەیچە یۆ جە خاڵە بە قوەتەکا داستانێ بۆ:«قاپەکێ . تاپۆ.»
-دیارا نووسەری پێسەو ماباقی نووسەرەکا نەتاوانش و جە تەوانشەنە خارج بیەن کە پەی کەلیماتێوی پێسەو:”ئێسترێسی و ….»جایگوزینی هەورامی بارو.بەڵام هەر فرە ئۆسایانە کەلیمێ پڕ ڕەنگێ هەورامیێش گۆنجنێنێ :«وەرم ئاڵوسین.سەر و مەقۆل»
-بەهرە گێرتەی جە زەربولمەسەلا نیشانە مدٚو کە نویسەندە چندٚە ئێحاتەش ملوو زوانی هەورامیەرە بیەن:«سەرەت هەراڵەنە نە جیکیان.کولەکێ تەڕەنە نیەنە.»
-جە بڕێو یاگێنە هەرئەجێم تابلۆو «لەبخەندوو ژکۆند»یا ئاندٚە وەش نویسیان مەپەرسە.ئەدٚاو نازەنینێ لایێوەدڵنگەرانەنە ئەچی وە شەویسیە و لایێوتەریچەو وەشحاڵەنە:«جە لێوۆ نارەحەتە بێ پەی ئایەندەی نادیاریشا،جە لێویچۆ لەزەت بەرێ جە تە ماشا کەردەیشا کە چن بە یەکتری موەرا و ئاشقانە یەکترشا گەرەکا.»
-………..
-دۆسا و وەشە ویسا دەعوەت کەروو بە وانای ئی ڕۆمانێ کە سەرەڕاو ئانەیە مۆشکڵێ و زەعفێ خاسێ وێش هەنێش و نویسەندە بە سعەی سەدر ئامادٚەو هەر گۆنە نەقدێویا بەڵام بەڕاسی نۆقتە قەوەتەکێش ئاندٚە فرێنێ کە زەعفەکێ پێسەوشۆڵەو چراوێوێ مووشیلێ کەم دیارێنێ.من ڕاش فرە فرەتەر چینەیە بێ کە بنویسوو سەرش بەڵام بە ئیجازەتا هەر ئەپینەیە ئیکتفام کەرد.ئەیزەن دەس وەشی دووبارە کەروو جە کاک حەمەرەزا بەهمەنی بابەتوو نویستە ئی ڕۆمانێ کە هەدیەش دا بە کتێبخانەو هەورامانی .ماتڵێنمێ کە هەمتەرما پەی بنویسو.
وەلی فەتاحی

 hewraman
Load More In پەیلوای

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیر سکڵه‌

پیر سکڵه‌   داریوش ڕه‌حمانی په‌ی نه‌به‌ز هۆرامی ئه‌جۆت پاسه‌نه.پاسه‌نییه‌ن.ئه‌ڵبه‌ته‌ پاسه…