یانە هەورامانی بشناسدیٛ ده‌گاو ژیواری 

ده‌گاو ژیواری 

120

ده‌گاو ژیواری 

وەڵیٛ جە گرۮ چیویٛ ژیوار واچیٛنە بە ماناو ژیوای و زیٛندەگی کەرۮەی و یاگیٛ نیشتەیرە پەی ژیواییٛ عالی.

جا ژیوار بە دریٛژایی تاریٛخی و بە پاو فاڕوو گوٙڕوو روٙزگاری دویٛ یەریٛ یاگیٛش پەی نیشتەیرەو بەردەوام بیەی فاڕیٛنیٛ،  ئی دەگا کە ئیسە هەنەو سەرشوٙ بەحس کەرمیٛ نزیک بە چوارسەۮساڵا تاریٛخش هەن و ڕوٙ بە ڕوٙ گەشەو تروٙق پەیۮا کەروٙ.

ژیوار کەوتەن پانیشتوو کوٙساڵانی، سەرنیشتوو دەگاو سلیٛنیٛ، وەرهوٙرزوو روار و هەباساوای و وەرپڕوو شاروٙچکەو هەورامانی و وەڵاتوو سەیدی.

نزیک بە 360 یانا ئیسە بە بەردەوامی ژیوارنە ژیوا و نفووسیٛ فرەتەر جە 1500 کەسا چی دەگانە چەنی بیەو نەبیەو روٙزگاری ساچا و هەوڵ و تەقالا ویٛشا پەی ژیوای و عالتەر ژناسای ژیواری مۮا.

جا نزیک بە 300 یانایچ بە هوٙو گیر و گرفتی ناوەرژوٙ و کوٙمەڵایەتی کوٙچوو باروو ژیوایشا جەم کەرۮەنوو و ئاوارەو شارەکاو ئیٛرانی بییٛنیٛ ، ( کانی دینار و جووجەسازی، مەریوان، سەوڵاوا، گوٙرگەیا، سنە و تاران ).

دوور جە تەعەسوٙبی بە باوڕوو من وەشتەرین بافتوو دەگایا هەورامانی ژیوارا ، جا  بە هوٙ جوٙراو جوٙر بیەی گەڕەکەکا دەگا ژیواری کە لایکەموٙ هەر گەڕەکیٛ ئینا ڤەراڤەروو دوی گەڕەکاتەری ژیوارش جە مابەقی دەگاکا هەورامانی جیا کەرۮەنوٙ و ئی بافتە بیەن بە هوٙ ئانەی کە جە لاو حکوومەتیچوٙ پەی سەبتی مللی و جەهانی لایکەموٙ هەوڵوو تەقالا دریوٙ.

پەنەوازا ئاماژەش پەنە کەروو  تەنیا دەگاییٛ جە هەوراماننە کە هەورا نشینییش مەنەن و بەردەواما ژیوارا و جە ڤەرزوو وەهاری و هامنی لایکەموٙ 100 یانیٛ کوٙچ کەرا هەواروو هانەو لاری.

کاروو کاسبی ئی دەگیٛ فرەتەر باخداری (هانار، هەنجیر، هەنگووری و وەزی) و ئاژەڵداری و بڕیٛچشا کریٛکاری جە دەگانەو جبەروو دەگیٛ فرەتەر تارانا.

جە بەشوو زانستی و فەرهەنگی جە ژیوارنە هەرمانە کرییٛنە. جە ڤیەرۮەنە فرەتەر جە بەشوو مەزهەبی و ئایینوو ئیسلامی هەوڵوو تەقالا درییٛنە و عەسریٛ تازەیچ جوانەکا روەشا ئارۮیٛنە دانشگای و جە فرەو شارەکاو ئیٛرانی جە جوٙرا جوٙر بیەی رەشتەکا خجڵوو تەحسیٛڵی و دەرس وەناینیٛ.

 رویٛ فرە ڤەرچەموو دیار جە ژیوارنە 5 و نەوروٙزین کە بە نامیٛ روٙ وانیاین. گرۮ ساڵە جوانەکیٛ ژیواری فرەتەر وانیارەکیٛ کوٙڕیٛ مسیاری، زانستی و فەرهەنگی بە بەشداری خەڵکوو دەگیٛ و دەگایەکا دەورووبەری بەرا راوە کە ئی چن ساڵە کاریگەرییٛ بیٛ ئەپەڕینش بیەن سەروو ئاژەو دەگا ژیواریوە.

جە دەورەو هەڵمەتوو شەپوٙڵوو فەرهەنگی ئاروٙ هەورامانی جوانەکیٛ ژیواری بیٛبەشیٛ نەبییٛنیٛ تاوانشا ئەرکوو ویٛشا پەی پاریٛزنای و گەشەو تروٙقوو زوانوو هەورامی دا و لایکەموٙ جە فرەو دەگایەکا ئی هەرمانیٛشا بەرۮیٛنە و بەردەوامەنە کە لوای راوەو  دوی دەوریٛ فیٛرکاری زوانوو هەورامی و کوٙڕیٛ سەروو ئی فیٛرکاری بە ئەرکوو ویٛشا زانانشا و بەڕاوەبەری هەرمانەكیٛ بییٛنیٛ.

 ئیٛحسان ئەتابەک/ 22 و نەوروٙزوو /95 مەریوان

ژیوار
 hewraman
  • ده‌گاو دزڵییٛ

    ده‌گاو دزڵییٛ / عادڵ محه‌مه‌دپوور (باسیٛوی کوٙتا سه‌روو دزڵییٛ)   بە پاو ئا بەڵگە تاریخییا…
  • سوفی حسین نارنجڵەیی

    سوفی حسین نارنجڵەیی حاجی حسێن حمەڕەحیم سوفی  ئەشناسیا بە سوفی حسین نارنجڵەیی ، خەڵکو دەگاو…
  • ب.م.شاروٙ

    پەلیانەو هەورامانی ملوٙ خزمەتوو هوٙنیاری هەست ناسکو هەورامانی ” ب.م .شاروٙ ” ی…
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…