یانە گردین خەت نیگارێ”نازکا”ی دەستکەردو ئانزانی یا گیانەوەرێ ئاسمانی!؟

خەت نیگارێ”نازکا”ی دەستکەردو ئانزانی یا گیانەوەرێ ئاسمانی!؟

75

خەت نیگارێ”نازکا”ی دەستکەردو ئانزانی یا گیانەوەرێ ئاسمانی!؟

کۆمەڵە خەت نیگارێ سەرنج دارێو”نازکا” (Nazca Lines)

یۆ جە شۆنەمای(اثر) باستانی جهانیەن کە تا ئیسە مەنێنێ و چەنی وەش بیەو و هەرپاسە سازوکارو ئی نیگارانە هەڵای پەی زانشمەندا ڕۆشن نەویەن و پسەو سڕێ گەورەی مەنەن.
ئی شۆنەمای ئینای جە وەڵاتو “پێرو”(Peru) ئامریکای پانیشتی.
پەی یوەم جاری جە ساڵەو1927ی، موسافرێ باڵەپرێ(هواپیما)وەڵاتو پێروی جە ڕاسەرو ساراو”نازکا”ی چەمشا کەوت ئی خەت نیگارانە و دماجار کەوت سەرو زوانا و زەنجێرێ تەر جە زەنجیرە تەمەدونو باستانی جهانیش وست دلێو لاپەڕەو ویەردەو ئانزانو ئارۆی.
ئی خەت نیگارێ بە خەت نیگارێ” Nazca Lines ” ، نامیێ بیێ و خاڵێ کرێڵی کە مشیۆم پەنەش ئێشارە کریۆ ئانەن کە ئی خەت نیگارێ جە زەمینەنە ئەسڵەن نمەپیویا و مشیۆ جە ڕاسەرو زەمینی و بەرزایی ئاسمانیوە تەماشا بکریا تا شێوازو گردی ئی نیگارا بگنۆ چەمۆ.
ئێژاو واتەیا کە نزیکو 150 نەخشێ جیاجیاپسەو:پەلەوەر٫توتە٫ماساوی٫مەیمون٫نەهەنگ٫پەسپەسەکڵەٚ٫گیانەوەری ئاسمانی و… چی خەت نیگارانە تا ئیسە مەنێنێ و پانایی 517 کیلومێتری چوارگۆشی بە وێشاوە مگێرا.
خەڵکو “نازکا”ی جە میانو سەدٚەو 200 وەڵێو عیسای تا 650 عیسایی ژیواینێ.مەردمو ئا زەمانو “نازکا”ی بە لاداو تۆ سەرینو خاکو ساراو نازکای و یاوای بە تۆ “ئاهەکی”(آهکی) چیرینی،ئی خەت نیگارێشا خۆڵقناینێ.
چێوێ کە پەنەوازەن واچیۆ ئینەن کە چی یاگێنە بە پاو وەشت و وار و وای کەمی ئی خەت نیگارێ کەمتەر توشو سویای و جە بەین شیەی بیەنێ یانی ئی خەت نیگارێ هەر پا دەق و شکڵو وێشانە مەنێنێ و توشو فاڕیای فرەی نەویەنێ.
چێوێ کە هەڵای پەی فرە کەسی ڕۆشن و ئاشکرا نیا چەنی ساز بیەو ئی خەت نیگارانەنە یانی جە 12 سەدٚێ چیوەڵ کە تفاق و ئیمکاناتی هەوایی و باڵەپەڕی پسەو ئاڕۆی نەبیەن و هەڵای ئانزان بە کێشتەو و گیرایی(جاذبە)زەمینی شیرە نەویەن چەنی مکریۆ دەسێش دابۆ بە وەش کەردٚەو و سازناو پێسە هەرمانێ گەورێ و سەرنج داری؟ ئایا گیانەوەرێ ئاسمانی و بێجگە ئێنسانی و متافیزیکیێ ئی کارشا کەردەن یا نە، دەسو ئانزانی دوەپاش ئینا چەنە!؟
جالبتەر ئینەنە کە بڕێ چی خەت نیگارانە بە شێوازو “هندسە” بە دیقەت و ڕێک و پێکی فراوان وەشێ بیەنێ و زانشمەندێ ماچان کە سازناو و پلان متەو پێسە چێوێ فەقەت جە ئاسمانەنە تاوۆ شکڵ گێرۆ و خۆڵقناو ئی خەت نیگارا بێ وەسیلە و کاردەستێ باڵندەیی و هوایی دور جە زەینیا!!
بە پاو ئەفسانێ قەدٚیمی تەمەدونو “ئینکا” ی پیجۆرە ئامان کە: خواوەنێ بە نامێ”Viracocha” کە ئافرینەرو گرد چێویەن جە وەش کەردٚەو ئی خەت نیگارانە دەسش بیەن و میانو شێوازو ئی خەت نیگارانە چەنی ئاژە و ئاوەزو ئا عانو خەڵکو”نازکا”ی پەیوەندیوە ڕاسەڕا هەن و ئایین و کەردٚەوەو خەڵکو “نازکا”ی چەنی ئی نیگارا بە یۆی فرە موەرا.
بڕێ جە زانشمەندا ماچان کە ئی شۆنەما باستانیە جزو یوەمین دەستکەردو هێندسی جهانیەن و پەیوەندی ڕاسەڕا(مستقیم) ئی خەت نیگارانە چەنی هەسارێو ئاسمانی و هەرپاسە شێوازو ڕاو جاو سامانەو  ڕۆجیاری،یاگێ پرسیاری و سەرنجیا.
یۆ چی 150 خەت نیگارانە نیگارەو پەسپەسەکڵێن کە بە نیاو جامێ(ئاینە) جە ڕاسەرو ئاسمانو ئی نیگارەیە متاومێ ئەندام و پای ئی پەسپەسەکڵیە چەنی شکڵ و نیگارەو ئاسمانی سەیاڵی (Orion)[صورت فلکی شکارچی]هەمپۆشانی بکەرمێ!! پیجۆرە کە ئی پەسپەسەکڵە، پایو دریژێش هەن کە نیشانە مدٚوۆ چەنی درۆشیاتەرین(درخشندە ترین) هەسارەو نزیک بە زەمینی بەنامێ(Sirius) کامڵەن هەمپوشانی مکەرۆ و بەڕاسی ئینە یاگێ پرسیاریەن.
سا تاومێ واچم سازنەرێو ئی خەت نیگارانە چەنی دۆخ و ڕاوجاو هەسارێ ئاسمانی ئاشنای بیەنێ و دەسەڵاتو کاردەستێ باڵ گێرتەی و سەیرو بەرزایی زەمینیشا بیەن.
جە لای تەریوە وردکاری و کنوکاشو مێدٚان/خەرمانەو “گیرایی”(میدان گرانشی-Gravitational field)و یاونەری ئێلێکتریکی(رسانایی الکتریکی) دەوروبەرو ئی خەت نیگارانە چەنی یاگای تەری جیاوازیش هەن! و چی بابەتۆ هەم، جالب و سەرنج دارا.
ئی یاگێ جە بارەو مەوادی کانی و چێرزەمینی داراو”نیترات”(Nitrate)فرەیەن و جە خۆڵقناو ئی خەت نیگارانە چی مەوادیە بە فراوانی کەڵک گێریان و ئینە نیشاندەرو پەیوەندی مادەو”نیترات” و ئی خەت نیگارانەنە.
بەڵام دماو ئی گرد وردکاری و کنوکاشی زانشتی هەڵای فرە جە سڕو سازناو ئی خەت نیگارا ڕۆشن و ئاشکرا نەویەن و ئینەیچە سابت کەرۆ کە دەورانێ جە ژیواو ئانزانی شارستانیەت یاوان ئەوپەڕو بەرزایی و ئەندیشەی.
پەیوەندی گیانەوەرێ ئاسمانی و ئانزانو ئا عانەیە و خۆڵقناو ئی شاکارەیە بەشێ تەر جە پرسیارو ئارۆیەن کە هەڵای جوابێ دروسێش پەی نەئێزیانۆ.

بابەتێ تەر چی بارۆ؛پەیلواو “ئێریک فون دێنیکن”یا کە ئەپی باوڕەن کە ساراو نازکای و ئی خەت نیگارێ جە ئەسڵ نیشتگاو کەشتی ئاسمانی گیانەوەرای متافیزیکی بیەن!!!و بە سوری سەرو ئی بابەتیە قسێش کەردێنێ.

“ئێریک فون دێنیکن” جە کتێبو”ئەڕابەو٫ئارەبانەو خواکان” (ارابە خدایان)ماچۆ:چا زەمانەنە، بڕێ جە گیانەوەرێ ئاسمانی ئاماینێ پەی زەمینی و کەردٚەوێ و ئازمونێ متافیزیکیێشا نیشانەو ئانزانی داینێ کە پەی ئاسانی ئاماو لوایشا چی خەت نیگارانە ئێستفادەشا کەردەن و بە جۆرێ ئی خەت نیگارێ ،رانمونی کەرو نیشتەرەو سەرو زەمینیشا بیەن!!!
هەرچی بۆ ئی خەت نیگارێ ئەرزش و قۆرسایی باستانشناسی و ئێنسانشناسی و تاریخیشان هەن و نیشاندەرو ماوێ جە ویەردەو بەشکوهو ئانزانو دوێ هەزار ساڵێ چێوەڵیەن.

ماکوان هەورامی

نەخشەو “خەت نیگارێ نازکای”
ئانزان یام گیانەوەری ئاسمانی!؟
تەشک و ئەنازەو بڕێ جە “خەت نیگارەکاو ” نازکای”
 hewraman
Load More In گردین

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

یوەمین “ئەنیمێشن”و جهانی

یوەمین “ئەنیمێشن”و جهانی جە سەرزەمینو باستانی”شاری سۆتە” جە ٦٥ کیل…