یانە ئەدەب و هونەر کوڵەی بېچارە

کوڵەی بېچارە

190
کوڵەی بېچارە

باوەیس ـ سڵام
بارام ـ درود
باوەیس ـ کاکە بارام، بؤ با داستانېۉەت پەی باس کەرو و تؤ بنۉیسەش، هەرچند زەحمەتیچا!.
ـ داستانەو چېشی؟ دەی وېت چیش مەنۉیسی؟!
باوەیس ـ داستانەو کوڵەیەنە و حەز کەرو تؤ بنۉیسیش. تؤ خاستەرش منۉیسی.
ـ کوڵە، مەبەست ئوردؤغان نەبؤ؟!
باوەیس ـ نا، برا، مەبەسم هیچ کەس نیا و تەنیا مەبەسم هەر کوڵە وېشا.
ـ دەی ۉاچە با بنۉیسو!
ـ ئەرې، یانەو مامؤیم…
ـ کام مامؤت؟
باوەیس ـ ریشەت بەر بێ! مەر من چند ماموېم هەنې؟ یؤ زیاتەرم هەن؟! مەدە دلې قسەکام!
ـ دەی خاسا فەرماۉە، توڕە مەبە!
باوەیس ـ یانەو مامؤیم یانەشا پەشتەو جادەیۆ بې. ئیتر ئانەنە یانې هۆرامانی وېت مزانی، ئەغڵەب پاڵشا دان لېژییۆ و ئەر جە جادۆ پەیش لۉا بیێنې بە چل پەنجا هەنگامېۉ یاۉېنی لا کەڵەکېۉې بەرزې، کە بە تەۉەنی زلې ڕاسە کریێ بېۉە. کەڵەکەکې وېش دا بې ۉەرو تەڵانېۉې و هەر سەرو پاسارو تەڵانەکېۉە بنە وەزېۉە بې و چۆلا بنە وەزەکېچۆ بنە هەنجیرېۉی مجیفې. کوزېۉەیچ پەشتەو ئینیشانە ۉیەرې و ئۆ دەسو کوزەکېچ کؤگا بې و یاگې ئەرەنیشتەی و هارگا و دوکەڵ و ئاپاسە.
ـ ئێ ئێ، دەی ۉاچە بەهەشت!.
باوەیس ـ ئەرې، بەهەشت. ئیجا یانەو مامؤیم توتېۉی زەرد و چەرمەیچشا بې، کە وەختو وېش و بە توتەکؤڵەی کەیېۉ کە گؤش و قلیچکەشا بڕیە بې هەر ئېندەو پەنجە گۆرېۉې قلیچکەشا پەی ئاستە بېۉە و پا بؤنۆ نامېشا نیا بې کوڵە.
ئیتر کوڵەی بې چارە کەیو گەرەکش بیێ قلیچکە لەقننؤ، جە بې قلیچکەییەنە مەجبور گنې، شانېۉ وارش پېسە لەلۉې بارؤ و بەرؤ. چی ئاخراۉە کوڵە پیر بیە بې و ددانېش بەینا بەین لۉێ بېنې و چەمېش حکمشا ۉەسە بېرە وگؤشېچش خاس نەژنەۉېنې، ئیترعادەتا پیری!
کوڵە هامنانی ۉەرو مەشەتوتا ئەغڵەب پا گەرو دڕەیا و دۆرو بەنگایانە وېش شارېۉە و ئاندە وېش نەدې دیاری، بەڵام ڕۉانەی هەر کەی سەیې لارې بیێنێ و کەڵەشېرې کەردێشا هەرا، ئادیچ ئی و زیېنە و هەر بە نرخەکەو ئۆساینیش و پەی ئانەیە، پېسە ماچا، تیکە نانەکەی حەرال کەرؤ، وېش یاۉنې سەرو کەڵەکەکې و چواردەسوپا و مەحکەم ڕو بە جادە مدرېرە و دەس کەرې بە پاس. ئەڵبەت نە پەی ئادی ئاندە گرنگ بې کە ئۆ چېشی گەفؤ و نە پەی مەردمیچ ئاندە یاگې سەرنجی. گرد کەس یاۉا بېشەنە و ئادیچ پەیش مەسەلې نەبې. فرەو وەختا جە جەرەیانو حەپەکانە جار جار لا کەرېۉە و پیسه‌ گه‌ره‌کش بؤ به بونه‌و بازیو ده‌نگاوه، داۉاو چەنە ۉیەردەی کەرؤ، چەمېۉ پتنې و زۉانېۉ دې لا لچاش و هەم دیسان دەس پەنە کەرېۉە. ئینە داستانەکې بې و دەست وەش بؤ!.
بارام ـ دەی خاسا من هەڵای پەیم مەسەلېنە کە غەرەز چی داستانې و چی ئەۉەگېڵنایە چېشا و پەی چېشی بې؟
باوەیس ـ بەزمې مەنیۆ! غەرەز و مەرەزېۉ نیا کارەنە و تەنیا گەرەکما یادېۉم جە کوڵەی کەردە بؤۉە. هەقم نیا؟
بارام ـ با، هەقتا، هەقو تؤن و هەقو کوڵەیچا، هەقو هەردۉیتانە، دەست وەش بؤ!
باوەیس ـ دەسو تؤیچ وەش بؤ!

سیامەند هەورامی 

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…