یانە ئەدەب و هونەر ڕۊی جەھانیی ھەرمانبەرا

ڕۊی جەھانیی ھەرمانبەرا

66

ڕۊی جەھانیی ھەرمانبەرا

 

کامەن ڕۊ من

کامەن ڕۊ ئېمە

چڼ ڕۋۍ و کەی،

ئەی ھامدەردی ھەرمانبەر

ئەی بەڎبەختی ھەڕبەسەر

بەرو ھەرمانۊ من و تۊ

پەی کۍ بۊ بە سامان و زەڕ؟

 

ھەر کات تاریکایی ژیۋاو ئېمە

پەی ھەمیشەی کۆت وەر

ئا شەۋەزەنگۍ کۊتاییش مێۋ؛

ڕاسی ڕازۊ ھەژاری و ھەرمانۍ

پەی گرڎ کەسی گنۊ بەر

 

ئېمە بېبەشۍ و ڕەنجدەرۍ

ئاڎۍ سەروەرۍ و ڕەنجوەرۍ؛

دۆڵەمەڼی و ڕامیارۍ و فەرماندەرۍ

درۊزنۍ و تەمەڵۍ و مشەوەرۍ

سەراپاو ساڵۍ ئېمەنمۍ خەموەرۍ

کەچی ھەر ئاڎۍ با بەختەروەرۍ

 

ئەی ڕۋۍ کېنۍ، ڕۋەکۍ تەرۍ

ڕۊ ئېمەی ھەژاری و ھەرمانبەری

یان ڕۊ ئاڎیشا ؛

ڕامیارۍ، فەرماندارۍ و مشەوەرۍ

 

ئېمە ھیتیارۍ و ئاژەڵدارۍ و ھەرمانبەرۍ

بەرھەممارمۍ پەی کۊمەڵۍ؛

سەرپەنا و پۊشاک و  نان و کەرۍ ..

کۍ ڕازنۊ سفرەو “نانەوەری سفڕەدڕی”

چی مشیۊ ھەر بەشۊ ئېمە بۊ :

ئاورای و کۊچەری و کۊنەدڕی؟

 

 

من نمەزانوو کامەن ڕۊ من

ڕۊ : ھامسەرۊ من ،

ڕۊ : زاڕۊڵەکا من،

ڕۊ : ھامپۊلاو زاڕۊکەڵەو من،

ڕۊ : مامۊسایا زاڕۊکەڵەو من،

ڕۊ : ئەڎا و تاتەو یاۋەرا زاڕۊکەڵەو من،

ڕۊ : ھامسایاو من،

ڕۊ : ھامھەرماناو من،

ڕۊ : ھامدەگایا و ھامشاریا من؛

ئەر “گەڎەی پەڕ، بەرو دەسی مانیاین”

کامەن سېری و وەشی ئېمە،

کامەن ڕۊ و کامەن مافو من؟

 

ئېمەنمۍ چینۍ پڕۆلیتارۍ

بېھەرمانۍ و نەڎارۍ

پاڵاۋرازۍ و گاۋانۍ

کۊڵبەرۍ و خزمەتکارۍ

مامۊسێ و ھیتیارۍ

گرڎ سەراپاو ساڵۍ

ئاورێ و  مانیێ و گرفتارۍ

بۍ سەرپەنێ و کۊچەرۍ

ئەی ھینو کېنۍ

٣٦٤ ڕۋەکۍ تەرۍ؟

 

سی ئەپڕیلی ڕۊکېن،

دۋۍ ئایاری ڕۊ کېن،

نۆرۊز ڕۊ کېن؟

ۋەھار، ھامن

پاییز، زمسان

دەشتە و دۊڵە و کۊ

تاکو چەم بڕکەرۊ

دارایی کېن؟

گرڎو ڕۋا ساڵۍ

گەرما و سەرڎا و تاڵی

سەراپا ھەرمانە و بەڎ حاڵی

گرڎو تەمەنیم، شەۋ و ڕۊ

پېسەو تۊ و ئاڎۍ

ئاورانا و مانیا و کرېچی …

ئەی چی بەشۊ ئېمە ھەر مەینەت بۊ

ڕەنجما بلۊ باخەلۊ ڕامیاری و مشەوەری؟

 

ئەر کەمېۋ چەبارەش ۋیرکەرمۍ

من و تۊ و ئاڎۍ

ھەر یاگېۋو دنیای بیمۍ

بە ھەر زۋانېۋ قسېکەرمۍ

ھەر حەزېۋما بۊ و ھەرچی بوەرمۍ

بە یەک یاسا چۆسیێمۍ

بە یەک مەرز بەربەسکریێمۍ

بە یەک کوتەک فەلاقەکریێمۍ

بە پەتېۋە قەنارەمڎەیمۍ

بە یەک ئەفسانە کۊیلەکریێمۍ

بە یەک سیستەم سەروەریکریێمۍ

بە یەک ڕەۋایی ڕەنجموەریێمۍ

تاکەی پەی سەروەراما جەنگکەرمۍ

تاکەی پەی “نەتەوە”و سەروەرا

واڵە و برایی مرۊڤایەتی دلېنەبەرمۍ

تاکەی باجو وەشباۋەڕی وېما دەیمۍ؟

 

ئەی ھامچینی ھەرمانبەر

ئەی بەڎبەختی دڵوەشکەر

کەی تۊ چە وەشباوەڕی مزیەی بەر

کەی ئازاڎی و یەکسانی و داڎ،

کەری بە یاسا و سەروەر

کەی وېت وېت ڕزگارکەری

کەی بەڎبەختییەکات دلېنەبەری

کەی چی دنیانە بەھەشت کەری مەیسەر؟

 

#ئاکۊ_مارانی

٣٠ی ئەپریلو ٢٠١٨

١٠ پاژەرەژو ١٣٩٧

www.facebook.com/ako.marani

https://t.me/AkuMarany

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەمارو زانایی بیٛسارانی 

هەمارو زانایی بیٛسارانی پەیجوٙریێوەن بە قەڵەمو کورش ئەمینی ، بە تیٛر و تەسەلی لوان تانو زا…