یانە هەورامانی بشناسدیٛ فەرەیدون بارامی

فەرەیدون بارامی

101

پەلیانەو هەورامانی ئینا خزمەتو شاعیری فرە وەشەسیاو  هەورامانی ” فەرەیدون بارامی ” ئەژناسیا بە شرام هەورامی ، بابزانمیٛ چەنی باسو ژیوای ویٛش کەروٙ پەی وەنیارەکاو پەلیانەو هەورامانی ، فەرماودیٛ چەنیما بیدیٛ :
بە نامی خوای گەورەی
وەروو باو وبوران و گیڤەو وای جارجار لورەو وەرگێوە لەم ئاورای یا زوزەو چەقەڵێ جە ئاورایی وسەردایی تیکەڵ چەنی سەرداو سڵووەو زمسانی جە هانە گەرمڵەنەو یانێوە تاریکەنە کە تەنیا چراوە قتولێ نەوتیە کرێیبی دارەرە پیچ پیچی دوکەڵو دویرەژنو دوکەڵی دلی حجرەیوە گولانەینە گرمەو سوبەیوە دارینی و کڵپە کڵپو ئایری جە لاییوە دەنگی بی ڕەنگو ئەدالەیوە ناوەشەی دوەگیانە جە لایێ تەرەو موسیقاو ژیوای پەی پەیدا بیەی زاڕوڵەیوە کزو فەقیری جە کونجو یانەی تاریکینە گوش زڕنیوە شەوە هەر نەتەمامێی زمسانی سەرد تاریک و کور جە وەختو؛وادەو بانگو ساحبی تەریخو دوهەمو ئەسفەندو؛ساڵەو هەزارویەرەسەدو سی و حەوتی هەتاویی قیژەو زاڕوڵەیوە یانەکەش چڵاکنارە ، بە ڕەسمو قەدیمی مامانی نەهەش بڕی و کەردشا باڵوسی و دەسوپاش پیچیارە نیاشا دلی نانەشانی. یەواش یەواش هەفتە تەمامیا بە ڕەسمو ئاوەختیە نامیشا نیا (غفور)چند مانگیش پەنەشی کوڕو هامسایما بە نامی غفوری ممرو ئەداو کوڕەکەی هەڕەشی کەرو ئەگەر نامی ئی کوڕیتا نەفاڕدی ویم بە دەسو ویم خنیکنوش بە حورمەتو ئاژەنیوە نامیم فاڕا نامیم منیا (فریدون)بەڵی فەرەیدون یەواش یەواش زل بی تا یاوانی حەوت ساڵی منیچ بە ڕەسمو ئاوەختیە لوانی مەدرەسە تا پولو چواری وانام هەر چاوەختە پیسە وەشە سیایی حەز کەرینی بە هەورامی وانوو وە و بە هەورامی بنویسو ئاوەختە کتێبی مۆلودنامە و وفات نامە و شیرین و فرهاد و لیلی ومجنون و …. حەز کەرینی وانوشاوە وە بە ڕاسی فیر بیانی وەرەوەرە ویچم دەسم کەرد بە نویستەی ٫ویرما ئەوەڵین شێعرەم کە نویستەم ئینی بی؛
فەڵەک سەرجە نو تیغش تیژ کەردەن
زامانی کاریم زۆخاو ڕیژ کەردەن
فەڵەک دەک چون من مازی مەڕیا بی
چون ماسی جە ئاو دریا بڕیا بی
…….
تا کەم کەم دەسم کەرد نویستەی و تەک و توک شێعرەکام وزتی دلی نەواری لوە گیڵێ دلی یانارە .
من تا ئیسە زیاتەر جە پەنجا کتیبیم نویستینی بەڵام بە داخەوە وەرو کەمدەسی هەر نەتاوام چاپیشا کەرو تەنیا کتێبێوەم بە نامێ هەوای هەورامانی .(هوای محمد) چاپ کریا لوا بازار شوکڕو خوای موشتەریش فرە بی ئیسە ویم تەنیا کتێبیچم نیا .
بە هەر حال تا ئیسە هەر خەریکو نویستەی بیەنا و شوکورو خوای خەڵکیچ لوتفو مەرحەمەتی فراوانش چەنیم هەن
پەی نمونەی چند شیعری وەزنورە خزمەتا

شوخم شیرینم دڵدارەکەی دڵ
پاوە یی ماوا لەیلی دور مەنزڵ
تەسکینی زامان کزەی ئیش و چڵ
کفەی فوارەی تافی ئاوی بڵ
ویژنە تاڵەی زامەکەی وڵ وڵ
سڵەمیای سایە ئاهوی سایەسڵ
گوش بدەر وەدەنگ ناڵە ناڵی دڵ
فیراقی دوری یاران هەتا کەی
مەزرای بە تەمای واران هەتا کەی
تەمای مەیلەکەی جاران هەتاکەی
بادەمەی فیراق بوران هەتاکەی
بی عاسا چمان کوران هەتاکەی
دڵ وەش بە وەسڵ هیجران هەتا کەی
منیچ دەم واقو چەم زاقو ماتەم
مەکیشو پەی ویم کوڵ و باری خەم
دیدەم لیڵاویش گرتەن بیەن تەم
چون وەلی داغدار پەی هیجرانی شەم
یەئس فراوان ئومیدم نەم نەم
چیشەن مەحاڵەن وەسلی دیدەکەم
یانی مەیلشەن چەرخی کەج ستەم
تا ئینتیزار بو مەیلی دڵ بی شون
ئومیدش وەسل بالای ئاڵای تون
بەڵی چەرخی چەپ راس بئ شەرتو شون
بەڵام مەیلی من توتون و کوکون
تافمەڵەک مەیلش دوری تو وازو
شەرتەن بەخیەی دڵ وەسڵت ورازو
چ باکم رەقیب بازو یا نازو
بازە چەرخی چەپ هەلێ مەسازو
دڵ بە ئاوەختە ئاوات موازو

پیشانی سوجدەم خاکی پات ساوان
تو بی موبالات باوانی باوان
ئای چندە گیڵام کاوان سەر کاوان
دڵ نە توی کوورەی خەمی توم تاوان
سارای دڵ پەی تو سواق دان ساوان
پەی سیرەکوڵەی چەمەی دڵ ناوان
چند چمان ویژەن خەمی تو ژاوان
چند ئاماو لوام وینەی هەڕ گاوان
من پەی تو خاس وخرابم لاوان
هیمای ناڵەی دڵ وە لات نەیاوان

پەی دینی باڵات چند ئامام لوام
یانەم تا یانەت چند زەمین کوام
چند وەڕاجیم کەرد ئای چندە دوام
گاە گاهێ چون شیت گرەوام خوام
چندە بی پەروا پا نە دڵ نیام
ئای چند وە شونت ناهومید دیام
لای کەس و ناکەس چندە لاڵیام
چند وە رووی ناکەس ناوەش کاڵیام
چند وە ئاسانەی یانەت دڵ ساوان
هیمای ناڵەی دڵ وە لات نە یاوان

دڵ چون گروڵی چند خول وەرده وە
وە ڕوی لاشەم دا چند تل وەردەوە
تانی تای کرژم چند شل کەردەوە
گروڵی خەمان زل زل کەردەوە
تلیا وە وروی ویش وە مل دەردەوە
خولیا خولش وەرد خول خول وەردەوە
چەم پەی تەماشەت بە کل کەردەوە
نەدیم هەر نەدیم ویت کل کەردەوە
عالەمێ زاناش شای چەم سیاوان
هیمای ناڵەی دڵ وە لات نەیاوان

تا کەی بنیشو وەی ڕەنگ زەردەوە
ماتڵ بو وە لای ئاخ و دەردەوە
مایەی سەرمایەم جەردەی بەردەوە
ئاما نەپەرساش شی ویەردەوە
دەروازەی خەمان پەی من کەردەوە
من مەنان وە لای ئاهی سەردەوە
لاونەم بە دڵ وەی چند فەردەوە
ئەحیا بی لاشەم جە نو مەردەوە
تەبڵی بەدنامیم یاوان سەرکاوان
هیمای ناڵەی دڵ وە لات نەیاوان

توی خەمی دووریت نە توی دڵ شانان
نامەی مەوبەتم وە هیچ نەوانان
تاسی دەنگ زڕیام گرد عاڵەم‌ زانان
خەیلیوەن نامەم وە لات کیانان
بو ویت بنمانە چون خانی خانان
دیار بو باڵات جە بەرزە بانان
تاریفت ئازیز عاڵەم بوانان
مایەی مەیلی تو نەزانو زانان
کونە زامی دڵ کولیاوە یاوان
هیمای ناڵەی دڵ وە لات نە یاوان

شوخی دیدە مەس بوڵەند بو پایەت
پەی تەسکینی دڵ بنیشون سایەت
قەدیمان پیسە کەردەن حەکایەت
وەشه ویسی تون شیرین حەکایەت
تو بەی شعوورو فامو درایەت
چیشەن جە ئیمە کەردی ‌ شکایەت
سەبر تا یاوۆ وەختەکو وایەت
تو قیبلەی دڵان بە هەزار ئایەت
حەیفەن چون تویێ مەگیریم‌‌‌ تاوان
هیمای ناڵەی دڵ وە لات نەیاوان

 hewraman
  • ده‌گاو دزڵییٛ

    ده‌گاو دزڵییٛ / عادڵ محه‌مه‌دپوور (باسیٛوی کوٙتا سه‌روو دزڵییٛ)   بە پاو ئا بەڵگە تاریخییا…
  • سوفی حسین نارنجڵەیی

    سوفی حسین نارنجڵەیی حاجی حسێن حمەڕەحیم سوفی  ئەشناسیا بە سوفی حسین نارنجڵەیی ، خەڵکو دەگاو…
  • ب.م.شاروٙ

    پەلیانەو هەورامانی ملوٙ خزمەتوو هوٙنیاری هەست ناسکو هەورامانی ” ب.م .شاروٙ ” ی…
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

حاجی ئه‌وله‌ سه‌ن و کناچه‌کیٛش 

حاجی ئه‌وله‌ سه‌ن و کناچه‌کیٛش  حاجی لای سه‌رینو دیوەخانینە هه‌رێژنه‌ش نیابێ سه‌رو دوێ سه‌…