قەیوم دانشوەر

60

ئیجار جە بەشو هەورامانی بشناسدیٛ ملمیٛ خزمەتو هوٙنیارێوی  خەیاڵ ناسکو فراوانو هەورامانی ، جە دەموو دەسو ویٛشەو  بزانمیٛ چیٛشش نویستەن :

دەسش یاونێ بە تیکێو نانی
((قەیۆم)) نویسش دۆسەکەی گیانی!
تا جە باپیرات چێوێو بزانی .

نامێم قەیۆم کوڕوو حەمەکەریمی کوڕوو حاجی نامڐاری کوڕوو حەمەعەلی . ساڵەو ۱۳۳٥ی کۆچی ڕۆجیاری جە دەگاو((نەروی))ناوچەو هەورامانوو لهۆنی ئامانا دنیا .

ساڵەو ۱۳٤۰ی ڕۆجیاری مەدرەسە ئامان پەی دەگاکێما ، هەرچنن ساڵێوم کەم بیەن پەی
لوای مەدرەسەی بەڵام ئازەمانە ئینە لەیەک نەڐریانەو . تاتەم چەنی براگەورەکەیم نامێ هەردویما نوێسێنەش و کیاسێنمێش مەدرەسە .
من شش ساڵێ دەرزم وانان بەڵام تا پەلەو پەنجوو سەرەتایی یاوانا، ئێتر دەسم جەمەدرەسەی کێشان و چەنی تاتەیم خەریکیانا ئەرکوو هەرمانوو یانەیەو تاساڵەو ۱۳٥۳ی ڕۆجیاری ، چاولای چەنی مامۆزاویم هەکە جە شەریکەو وەشکەرڐەوو جاڐەو نوسووڐێ پەی مەریوانیەنە هەرمانەکەرێو لاو پسپۆڕا جاڐە وەش کەرڐەیەو  فرە قوربش بێ، بەرڐاشوو لوایمێ پەی شارە
دوورەکەو ڕەشتی هەرمانەو جاڐەی کێشتەی .

جە ساڵەو۱۳٥٤ی تا ۱۳٥٦ی ڕۆجیاری لوانێ خزمەتوو سەروازی سەروازیم تەمام بی دیسان گێڵانێوە پەی ڕەشتی دەسم کەرڐەو هەرمانە
چوار ساڵێ ڕەشت . دوێ ساڵی مازیندەران .
دوانزە ساڵێ بەندەر عەباس. ساڵێو سیرجان .
دوێ ساڵی عەسەلوویەو بەندەر بووشەهری .
دوێ ساڵێ شاروو بەمی چەولاو کرمانی.
چوارساڵێ تاران و قەزوین . ساڵێو عیلام .
ساڵێو ئەهواز . پی جۆرە عەمرم جە غەریبی و
دەربەدەریەنا ویەرڐەن من دایێم دور جە هامزوانام بیەنا بەڵام ناستەنم زوانەکەم فەوتیۆ
سپاسوو خوڐای بەبەزیی کەروو هەکە نێعمەتوو تەبعەو شێعرێش وستێنە دلێو مەژگیم و دڵیم تا بتاوو خزمەتێوی هەرچنن کەم و ناقابل کەروو بە زوانوو فەرهەنگوو نەتەوەکەیم من خاس مزانوو هیچ هەرمانێوەی فەرهەنگی ئەدەبیە بێ عەیبە
نیەنە هەرمانەکێ منیچ هەرپاسە ، کەموو کوڵیش فرەن هیوادارەنا بنیەیدێش پاو کەم واناییم و دەس نەیاواییم کە کتێباو شاعێروو نویسەروو پسپۆڕە فەرهەنگیەکاو هەورامانی .

(قەیۆم دانشوەر ) دەگاو نەروی
…….
بەنامێ خوڐای تاکوو بێ باکی
ئێنسانش وەش کەرڐ جە مشتێو خاکی.
عێلموو قەڵەمیش دا پەی سۆقاتی
کەرڐش ئەشرەفوو گرڐ مەخلۆقاتی .
……..
ئەگەر پەرسی تۆ ، حاڵوو من خەمێ دایێم ئەوەر بەرا .
دڵم تەشتوو بنەو تفان بە ورڐە تف کەفە سەرا .
مەژگم جە مڵکوو خەمانە زموو هامن تفەو چنا .
پەی پڕووزنای ورڐە تفی سانالێ ئاواتەش وەرا .

ئەگەر تۆ بلی هەرسیم لافاوا لافاو ملۆرە تەڵانەو ساوا .
بە هەرسەو چەمام ساحیبێ ساوا تەڵان بە تەڵان ساناڵێ (ساوا)

بامن بلوو چی دەگانە هەسارەکێش تاریکێنێ
لافاو فرەن ڕەڐ نمەبۆ کۆڵانەکێش بارکێنێ .
لاوی سۆڵوو چەمەو (چەما) شاڐیش وسەن یانەو خەما .
وەشی نیا جە دڵمانە خەمێ هامسەی نزیکێنێ .

ئازیز ! تۆ لوای نەمش کێشا چەم
بەستت دڵمەرە دەسپێچەنەی خەم .
بە لکەکۆرێ سەرێت دان پیوە
مەحکەم بەسەنت داروو بێشکێوە .
دەسەو زانایا بەیا نمەزانا
کەرڐەی ئالکێ بەکێ ئاسانا .
پەرسا چا دڵیە بەخەم ئەسیرا
ئاڐ زانۆ کارشا بەدەس کێ گیرا .

خەفەت خەرمانا جە لاو من نە شەنکەرێو نە شەماڵێو .
شەماڵوو شەنکەر وتێنێ نە قاسێدێو نە هەواڵێو .
تەرسوو بە ئایێروو دووریت سۆچۆ خەزانەو شەماڵی.
یا بە ئاهوو دڵی زاریم گڕ گنۆ یانەو هەواڵی .

خەم بی بەجۆڵا دڵم پاچاڵە
چەم کەرۆ ئاوێ دڵ کەرۆ ناڵە .
جە سەیلی ئەسرین دیڐەی بێ ((دیڐەم))
خەم نە پای جەسەم نیشتەن هەراڵە .

یاران با باسش بنویسوو پەیتا
دەورەو جوانی باباو تاتەیتا .
دەسوور پاسە بێ ئاقەڐیم زەمان
نانە بەلوو بێ سفرە نانەشان .
چاشتی دۆخەوا یا دوینە بێ
دەروونشا بێ غەش پاک جە کینە بێ .
زووفوو یانەی گۆزە هەڕینێ
نەفت و چراو گاز ساقه تەڕینێ .
کۆمیت و یەخچاڵ کەنۆڵە هەڕێ
باقی ئەساسی گۆشڵێ و جەڕێ .
فەرشوو یانەیشا گڵێمە چەرمێ
پەی نەقشی تارێخ با باسش کەرمێ .
جۆڵا پارچە باف دۆم کارخانە کەوش
دەزگاو میزانشا مەکۆو کۆڵە درەوش .
پەتوو مەلافە گرڐ مەوجوو جاجم
دەزگا ڕێسننەی واتەش بی لازم .
یانێو لەتەرێ چزێوەو چۆڵکێو
پەنەش ڕێسێنێ گرڐ پەژموو کوڵکێو .
ڕەسمی زەماونن دەسوور پاسە بێ
هەسەرێ باردێ یەک نەفەر جاڕدێ .
هەسەرەی خاسە مەوجەش وزدێ سەر
هەتاکوو وەیوە تەشریف بارۆ بەر .
وەیوەی باڵا بەرز هەی باڐە باڐە
زەما جە سەربان بیەن ئاماڐە .
هەتا وەیوەکێ بەی وەروو بەرەیش
ئاڐیچ ساوێوە دۆ تەوقەو سەرەیش .
ئاوەختە بە خەیر وەیوە ئەی یانە
دەسوور پاسە بێ قەڐیم زەمانە .
تەلەو وەیوەکێ تاریفش وەشا
مادی ئەوەڵیش درەختی کەشا .
شانەو لەتەرەو چەمچە چوینێو
جاجموو گڵێموو جەڕە هەڕینێو .
تەختێوی تاشیا جە داری کەکەو
پەی سەر کیتەڵەی نامێش سەر گۆژنەو .
تەوەقی چوین یانێو لەنگەری
تەشپێڵەی چوین پەی شۆربا وەری .
هەر چا ڕۆنە کە زەماونن کریێ
چەنی وەیوەکێ پەی زەمای بریێ .
کاتێو کە زەما ئەساسی وینۆ
وەختەن شاڐی مەرگ یاکوو بێ هۆش بۆ .
دماو ماوێوی زەما جیابێ
جە خەتوو ئەڐاو تاتەکەیش لادێ .
بە دەسی هاڵی بێ بە نۆ یانە
ئاساڵە لوێ بێ بە شوانە .
ئەگەر ساڵەکێش‌ بێ وەی دەیاسەر
ساڵێ ئاتیێ بێ بە وەرزیەر .
بە هەزار ڕەنجوو دڵ پەرێشانی

خەمێ ئامەی ملمەرە هەرسیم پلوورە واران
وەشی نیا دڵمەنە شاڐیم ئاوارەو شاران .
تەرسوو مروو پی خەما شاڐیم شاری غەریب بۆ
دژمەن بە هەرسەو دروا شینم شیونۆ یاران
ق د ن

پێسە وارانوو وەهاری خەمێ وارانێ پەی چەما
سەرەم دایێم( پیر ڕۆسەما) مەبڕیۆ جە هەوروو تەما
ئاهوو دڵی پێسەو تەمێ نیشۆ کویسانا لەشیم
چەم بۆ پلوورە وارانە بروو بژانگ بەناو کەما
زەرڐە لۆ سیما ڕوومەتێم مەر زافەرانوو مەشهەدی
مەزانوو من چ سەنگێوم دابۆ میناو جاموو خەما
(قەیۆم دانشوەر نەروی) ۱۳۹٦/۲/۱۱

پەلیانەو هەورامانی هەرجاریٛو ملوٙنە خزمەتو یوٙ جە هوٙنیارەکا ، نویسەرکا ، کەسایەتیەکاو هەورامانی ، مشناسوٙشا بە وەنیارەکاو پەلیانەو هەورامانی .

 hewraman
  • ده‌گاو دزڵییٛ

    ده‌گاو دزڵییٛ / عادڵ محه‌مه‌دپوور (باسیٛوی کوٙتا سه‌روو دزڵییٛ)   بە پاو ئا بەڵگە تاریخییا…
  • سوفی حسین نارنجڵەیی

    سوفی حسین نارنجڵەیی حاجی حسێن حمەڕەحیم سوفی  ئەشناسیا بە سوفی حسین نارنجڵەیی ، خەڵکو دەگاو…
  • ب.م.شاروٙ

    پەلیانەو هەورامانی ملوٙ خزمەتوو هوٙنیاری هەست ناسکو هەورامانی ” ب.م .شاروٙ ” ی…
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

حاجی ئه‌وله‌ سه‌ن و کناچه‌کیٛش 

حاجی ئه‌وله‌ سه‌ن و کناچه‌کیٛش  حاجی لای سه‌رینو دیوەخانینە هه‌رێژنه‌ش نیابێ سه‌رو دوێ سه‌…