یانە ئەدەب و هونەر شەوێوە دلێ زمسانێوی سەختیەنە

شەوێوە دلێ زمسانێوی سەختیەنە

77

شەوێوە دلێ زمسانێوی سەختیەنە:
خاوەرە: بە دەنگو گژەو واو سەردو زمسانی کە جە پەنجەرەو هۆذە گۆلانەکێشانە ئێ دلێ، جە نیمە وەرمەنە هایش بیۆ، ئانذە نەبێ کە وەرمش کۆتەبێ پۆرە، سۆبەو یانەکەی کۆشیابێوە، هەوێوی سەرد جە قەراخو بەرەکەیە، ئێ دلێ.
جار جار ئێشێ گۆلانێش پەی ئێنێ، بەڵام هۆڵ دێ کە وێش گێرۆ و دەنگش بەرز نەکەرۆوە. تەکانێوەش دانە وێش کە هۆرزۆوە تا هێزمێو بنیۆنە دلێ سۆبەکەی، بەڵام نەتاواش.
بێ دەنگیێوی خەمناک یانەکەش گرتەبێرە، دیار بێ گرد وتێ بێنێ و هیچکەس هایش نەبێ. گەرماو نەفەسەکا شیلانێ کناچێ گۆلانێش کە یەرێ سالێ زیاتەرش نەبێ، چیرو باڵیشەنە هەس پەنە کەرێ، هۆڵش دا کە بە ئارامی شیلانێ جە وێش جیا کەرۆوە، تا بەڵکو هایش نەبۆوە، بەڵام شیلانە پاسە چەسپیێبێ لەمەشەرە کە بە هیچ جۆرێو نەتاوێ جە وێش بڕنۆشەرە. پاسە دیار بێ شیلانە زانێ کە دلێ ئا لەمێنە، براڵێو یا واڵێوە تەرەش پەی ئاذێ چەنەنە. 
بە هەر جۆرێو بی، شیلانەش جە وێش جیا کەردۆ، تەکانێوەش دانە وێش، ئی جارە هۆرسۆ، لوا روەو سۆبەکەی. 
سەرە گێجێوی گرتێبێرە. نامیارەو دەسش بەرد پەی قۆتەلێوی کە بنیۆش دلێ سۆبەکەی، ئێشێوی قۆرسش پەی ئاما کە هەردوە زەنگۆڵەش جە کار وسە. دەسش گرت سۆبە سەردەکەیۆ کە نەداریۆوە، هۆڵش دا کە بێ دەنگە بۆ، تا کەمالی شوش و زارۆڵەکێتەرێ هایشا نەبۆوە، بەڵام ئانذە ئێشەکەش قۆرس بێ کە دەمش پەێش نەقوجیێ، گۆشەو فەقیانەو گجیەکەێش نیاشەنە دەمش تا بتاوۆ بە تننی دذانێش پۆرە فشارۆ بەڵکو دەنگش نەلۆ بەر، بەڵام هەر نەتاواش وەرو هاواریش گێرۆ.
بە یەکەمین ناڵەش، کەمالی شوش وەرمەنە چڵەکیارە، دیار بێ کە ئاذیچ بە خیاڵێ ناوەشێوە وتە بیەن.
کەمال ئاما روەشۆ واتش” چێش بی خاوەر : وەختش یاوان بلو شۆنەو مەتی خەجێ”؟.
خاوەرە، کە هەڵای دەسش جە سۆبە سەردەکەی نەکنیابێوە،سەرەش بەرز کەردۆو تەماشێوو کەمالیش کەرد، خاس زانێ کە جە وجوودو هیچ پیێویەنە مەگۆنجیۆ کە دەرکو ئێشو ئازارێوی کە ژەنێ چا وەختانە کێشۆش کەرۆ.
چا وەختەنە کە کەمال نزیکەش کۆتۆ، هۆڵش دا، سەرەش هۆرگێڵنۆوە پۆلارە تا کەمال فەقیانەو گجیەکەێش نەوینۆ کە نیابێشەنە دلێ دەمیش، جوابش داوەو واتش ” نا جارێو مەلە شۆنیش”.
قسەکێش نەتەمامێێ بێنێ، کە ئی جارە دەنگو هاوارەکاش، شکۆفە کناچە گۆرەکێچش جە وەرمەنە چڵەکنارە.
شکۆفە کە ١٥/١٦ سالێ زیاتەرش نەبێ، بە پەلە لوا دەمو ئەذێشۆ، کە دیش ئەذاش جە دەسو پا کۆتێنە، قیژناش و روەش کەردەنە تاتەێشو واتش” تاتە گیان توخوا کارێو کەرە ئەذام خەریکا مرۆ،”
جە قیژەو هاوارو شکۆفەیۆ، شیلانە کناچە یەرە ساڵەکێچشا کە چیروو لێفەکەو ئەذێشەنە وتێبێ بە گرەوە هایش بیۆ.
شکۆفە کە دیش واڵەکێش تەرسێنەو گروای گرەوۆ، بە پەلە لوا و گرتەشەنە باوشیو لێفەکەش داپۆرە. کەمال کە سەرو سەرەو خاوەرێ ژەنێشۆ مدرا بێرە، سەرسام مەنە بێ و نەزانێ چێش کەرۆ.
یانەکە جە بەری سەردتەر بێ، کەمال نەما قۆتەلەکەی کە وەرو ئارگاو سۆبەکەیەنە بێ، نیاشەنە دلێشو ئێرەکەش کەردۆ. 
ساعات دۆرو دوێ شەوێ بێ، دەنگو هاوارو ناڵەو خاوەرێ ژەنیش دڵش سۆچنای سۆچنێ، چانەیە خرابتەر ئانە بێ کە زانێ، هیچ قوتێو یانەکەنە مەوجود نیا!، تەنانەت دوێ مشتێ برنجیچ کە بتاوۆ شۆربێوەش پەنە وەشە کەرۆ پەیدا مەبۆ. 
لوا روەو بەر، کە بەرەکەش کەردۆ، ئیجا زاناش کە وەروێوە فرێ وارێنە، تۆفانێوی سەختا و سڵێوێو دەسش پەنە کەردەن. مەژگژ خاس کار نەکەرێ، کە بزانۆ چێش کەرۆ، یانەکەشا چۆپەڕو دگێوە بێ، تەنیا ئانە ئاما مەژگشەرە کە بلۆ شۆنەو مەتی خەجێ (مەتی خەجێ ئا پیرە ژەنێ بێ کە خەڵکو دەگاکێ، وەختو زارۆڵە بیەی ژەنەکاشا چڕێنێش پەی مامانی)و بارۆش پەی یانەو وێشا.
وەروەکێ تا کەشکەزەنگۆڵێش یاوێ، بە زەحمەت تاوێ هەنگامێ فارۆوە. دماو چارەک سەعاتێوی پیمای وەروێ، ئیجا یاوا وەرو داڵانەکەو یانەو مەتی خەجێ. 
چن جارێ چڕیەش وەنە: مەتی جەجێ؛ مەتی جەجێ؛،،،،، مەتی جەجێ، جوابش نەبێ، نائۆمێد بی و گەرەکش بێ گێڵۆوە، دروس چا وەختەنە، مەتی خەجێ جە دەڵاقە گۆلانەکەو یانە تاریکەکەێشەنە، سەرش بەر ئاردو واتش ” ئانە کێنی چێشت گەرەکا؟” کەمال بە پەشۆکیایی واتش “مەتی خەجێ گیان من کمالەنا، فریاما گنە، خاوەرە مدریێنە پەنە، فرە حاڵش خرابا!، بۆ چەنیم با بەروت چەنی وێم” مەتی خەجێ زاناش کە کەمال فرە پەرێشانو وەزعەکێن، واتش: ” دەی رۆڵە کەمال گیان، من سەرەم نیا پۆ بەو، بەڵام رۆڵە خۆ تۆ مزانی من ماوێوا قاچێم نمەیام چەنی، دەی ئیسە پی سەرداو سڵەوەنە چەنی بتاوو وێم بیاونو لا شمە”.
کەمال ناسش قسەکێ مەتی خەجێ تەمامیا، داڵانەکەنە زوو لوا سەرو واتش ” بۆ کۆڵیم با وەختەکەما نەلۆ، مەتی خەجێ کە زاناش کەمال وەزعەش خاسە نیەنە، فکرش شیۆ تەنانەت پاڵاکێچش کەرۆنە، بە پەلە لوا کۆڵی کەمالی.
ڕاکێ فرە سەختەو باریکە بێ، وەروەکێ ئانذە فرێ بێ کە قاچێ مەتی خەجێ کە کۆڵێ کەمالیۆ بێ، کیشیێنێ وەروەکێرە. چن دەیێقێش پۆ نەشی، کە هاوارو مەتی خەجێ هۆرس: “رۆڵە کەمال قاچێم تەزێ؟!” کەمال تازە نەیارێ مەتی خەجێ سەرو کۆڵێشۆ بنیۆرە، تازە چێشش پەنە کریێ ئەگەر کۆڵێشۆ نیێشەرە خرابی خرابتەر، بە هەر زەحمەتێو بی دماو ٢٠ دەیێقێ یاوناش یانەو وێشا. 
هەڵای نەیاوێ بێنێێ دلێ بەرەکە، کە دەنگو قیژەو شکۆفەی زەنگۆڵێ کەمالیش لەرزنێ، مەتی خەجێش کۆڵێشۆ نیارەو لوا سەرو سەرەو خاوەرێ، مذیۆ بێهۆشە کۆتێنەو بە حاڵ نەفەسە کێشۆ، بە هەردوە دەسێ داش سەرەو وێشەرە!!!، هاوارێش لوێنێ تا ئۆپەڕو دەگێ.
بە دەنگو هاوارێ کەمالی، خاوەرە ئاماوە هۆش، مەتی خەجێ کە خاوەرەش دیە پا وەزعێوە، ئیشو ئازرو قاچاش کە وەروەکێ سڕێ کەردێبێنێ، ویرش شیۆ، دەسش کەرد دۆعاو مناجات کەردەی پەی خاوەرێ کە زوتەر نەجاتش بۆ. زوو زوویچ چڕێ گۆشێ خاوەرێرە کە بەشکەم ئی جارە خوا کۆڕێوشا دۆ پەنە!، دوبارە کەردەی ئی قسێ مەتی خەجێ، خاوەرێ زیاتەر بێ رۆحیە و زەعیفە کەرێ، ئاذە تەنیا گەرەکش بێ نەجاتش بۆ، ئیتر زارۆڵەکەش کۆڕا یا کناچێ، پەێش فەرقش نەبێ.
خاوەرە تا دەمدەمی سەحبی چەنی مەردەی زۆرانیش گرتە، چونکە ئانذە بەذەنش زەعیفو ناتەوان بێ کە وەرگەو چاو زیاتەری نەگێرێ. 
بە دەنگو ئەوەڵ کەڵەشێری، دەنگو گرەوەو زارۆڵەکەی پێچیا دلێ هۆذە گۆلانەکەیەرە، بە پێذا بیەی زارۆڵەکەی، مەتی خەجێ بێ دەنگە بیە! بێ دەنگی مەتی خەجێ، مانێوە گۆرێش بێ پەی خاوەرێ، دیار بێ ئی جاریچە کناچێش بیێنە.
شکۆفە کە شیلانەی واڵێش باوشیشەنە وتێ بێ، شیلانەش نیارەو بە وەشحاڵیۆ ئاما نزیکەو ئەذێش کۆتۆ.
کەمال کە گۆشەو یانەکەیەنە لیفەکەش دابێ ملو قاچاشەرە، هۆرسۆ و ئاما نزیکو خاوەرێ کۆتۆۆ، خاوەرە کە تەمامو گیانیش غەرقو ئاوو ئارەقی بێ، سەرەش هۆر گێڵناوە روەو کەمالیو بە نگێوی پەڕ جە وەشەویسیۆ تەماشێوو کەمالیش کەرد.
هەڵای کناچەکێش نەذیێ بێ، فرە حەز کەرێ کە هەسو ئێحساسی ئەذایانەش چەنی کەمالی بەش کەرۆ، دەسش بەرد و کناچەکێش کێشا سەرو سینەێش، ئەوەڵ جار بێ کە تەماشەش کەرۆ، وەختێو تەماشەو روێش کەردش، جە چەمێشەنە هەڵسی هەڵقێشا بینا، نگاش هۆر گێڵناوەو روەو شکۆفەی، زەردەخەنێو کۆت سەرو لچاش، هەر بە چەمێ بە شکۆفەیش یاونا ، “ئەها چەنی تۆ ئەجۆ ساوێوەندێو کە کریێندێ دوێ کۆتێ؟”.
ئانذەش پۆ نەشی کە هەردوێشا کۆتێنە دلێ ئارامشێوی قوڵێو وەرمشا کۆت پۆرە.
رۆ بیەبێ، وەروە دنیاش چەرمە کەردەبێ، تەقەو بەرەی ئاما، دێدە نەجاتەی هامساشا بێ کە چەنی کناچەکێش، کەردشا بەرەرە، دێدە نەجاتە شەوێ ویەردێ مەتی خەجێش دیێبێ کۆڵێ کەمالیۆ کە بەرایش بەرۆ پەی یانەو وێشا، فەردێو برنج و کاسێوی پەڕ جە کەرێشا ئاردێبێ، شادیوشا وسەنە یانەکەی، دێدە نەجاتە روەش کەردەنە کەمالیو واتش ” کەمال گیان رۆڵە ئۆ خوای زیاد بۆ،خاوەرە بە سڵامەت نەجاتش بی، کۆڕ بۆ یا کناچی هەر کامێ با فەرقشا نیا چونکە خوای دێنێ.”

ڕەزا بەهمەنی


                                      

  • وێنە نویستە

    وێنە نویستە ئێگە”پولینیزیا”وفەڕانسەیەن، میان ئاوێ جە پاناوو”ئارامی پانیش…
  • هاگاڎاریێوە جە گجارنامەو ڕوٙجیاریوە

    هاگاداری گجارنامه‌و ڕۆجیاری[فه‌رهه‌نگی، ئه‌ده‌بی و هونه‌ری] به‌ فورم و شێوازێوی‌ تازه‌ و ئ…
  • تەوەن نیگارەو هەورامانی

    تەوەن نیگارەو هەورامانی یۆ جە شۆنەماباستانی و کۆنێ کە جە وەڵاتو ئێرانی و سەرزمینو هۆرامانی…
  • وێنە نویستە

    وێنە نویستە ئێگە”پولینیزیا”وفەڕانسەیەن، میان ئاوێ جە پاناوو”ئارامی پانیش…
  • هاگاڎاریێوە جە گجارنامەو ڕوٙجیاریوە

    هاگاداری گجارنامه‌و ڕۆجیاری[فه‌رهه‌نگی، ئه‌ده‌بی و هونه‌ری] به‌ فورم و شێوازێوی‌ تازه‌ و ئ…
  • تەوەن نیگارەو هەورامانی

    تەوەن نیگارەو هەورامانی یۆ جە شۆنەماباستانی و کۆنێ کە جە وەڵاتو ئێرانی و سەرزمینو هۆرامانی…
 hewraman
  • بانگوو ژەنێ دلیٛ شەوەو نەریتینە

    بانگوو ژەنێ دلێ شەوەو نەریتینە لاکەردەیۆیێ جە شیعرێ ـ مەهوەش درووستکاریٛ. شیعرەکێ: ئاسمانو…
  • تەمەن 

    تەمەن  زمسان بار و بنەش هۆر پێچابێ ، شەوێ واتم سۆحا هایم بیوە، گجیە سوورەکەیم کەروو وەرم، …
  • خنیکیای سیروانی

    خنیکیای سیروانی ئەهوورا مەزدا و پیر شالیار، تەسکینوو دڵیشا هاژەو دەرەوەزەنا و قاسبە قاسبوو…
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

وێنە نویستە

وێنە نویستە ئێگە”پولینیزیا”وفەڕانسەیەن، میان ئاوێ جە پاناوو”ئارامی پانیش…